Jeremaia 6 - AI VOLA TABU

O ira na meca era sa talai mai me ia nai valu ki Juta e na vuku ni nodrai valavala ca na lewena, 1-8. Sa cudruvi ira na Kalou e na vuku ni nodrai valavala ca, 9-17. Sa tukuni yani na nona cudru, 18-26. Sa lesi ko Jeremaia me vakatovolei ira me vaka e dau vakatovolei na siliva, a ra sa tukuni me siliva biu, 27-30.

¹ DOU dro tani vata, koi kemudou na luve i Penijamini, mai na loma i Jerusalemi; ia mai Tikoa, dou uvuca na davui, ka mai Peci-akarimi, dou vakaduria na buka mei vakatakilakila: ni sa dua na ca sa rairai mai na mata ni tokalau, ia e dua na veivakarusai levu.

² Au sa vakatauvatani koya na gonealewa ni Saioni kei na dua na alewa matavinaka ka tabu siga;

³ o koya eratou na lakova mai nai vakatawa kei na nodratou qele ni sipi; era na mai birika vakavolivoliti koya na nodra vale malo; era na dui kana yadua e nona tikina.

⁴ Dou vakaraui valu vua; dou tu, me da lako cake kei na siga levu. Ule koi keda! ni sa kala na siga, ni sa balavu mai na yaloyalo ni yakavi:

⁵ dou tu cake, me da lako kei na bogi, me da vakarusa na nona veivale vakaturaga.

⁶ Ni sa vakaoqo na vosa i Jiova ni lewe vuqa, Dou tavakabalea na kau, ka viri suva kei Jerusalemi: o qo na koro me cudruvi; sa oti ko koya e nai valavala vakausausa e lomana.

⁷ Mo vaka ni sa vakadavea na mata-ni-wai na kena wai, sa vakadavea vakakina ko koya na nona ca: nai valavala kaukauwa kei na veivakacacani sa daurogo kina; sa tiko ga e mataqu na mate kei na vue.

⁸ Mo vakavulici, Jerusalemi, de tawase tani vei iko na yaloqu; deʼu cakavi iko me lala, me vanua o sega ni tawa.

⁹ Sa vosa vakaoqo ko Jiova ni lewe vuqa, Era na vetia sara na kena vo ni Isireli me vaka na vaini: mo vakalesuya tale na ligamu ki nai sova mo vaka na dauveti vaini.

¹⁰ Meʼu vosa vei cei, ka ia kina na vakatusa, me ra rogoca? raica, sa tawa cilivi na daligadra, a ra sa tawa vakarorogo rawa: raica, na vosa i Jiova sai rogo ca vei ira; era sa sega ni vinakata.

¹¹ Ia kaʼu sa sinai kina e na cudru i Jiova; kaʼu sa oca ni vosota: kaʼu na sova yani vei ira na gone o taudaku, vei ira vata kei na nodrai soqosoqo vuni na cauravou: ni na tauri vata na tagane kei na watina, na qaso kei koya sa vuqa na nona siga.

¹² Ia ena musu vei ira na tani na nodra vale, o qori vata kei na nodra veiwere kei na watidra: niʼu na dodoka na ligaqu vei ira na lewo ni vanua, sa kaya ko Jiova.

¹³ Ni ra sa daukocokoco kecega na kaisi ka yacovi ira talega na turaga; a ra sa cakacaka vakailasu kecega na parofita ka yacovi ira talega na bete:

¹⁴ a ra sa vakamavotaka na nona vue na gonealewa ni noqu tamata me vakaca, ni ra kaya, Na vakacegu, na vakacegu; ni sa sega na vakacegu.

¹⁵ Se ra madua beka ni ra sa kitaka na ka vakasisila? e segai, era sa sega sara ni madua vakalailai, sa sega sara talega ni kila madua na matadra: o koya o qo era na bale vata kina kei ira sa bale: e na gauna kaʼu na cudruvi ira kina era na vakabalei sobu, sa kaya ko Jiova.

¹⁶ Sa vosa vakaoqo ko Jiova, Dou tu e na sala, ka vakararai, ka taroga nai lakolako makawa, se evei na sala vinaka, ia dou lako ga kina, dou na qai kunea kina na vakacegu ni yalomudou. A ra sa kaya, Keimami na sega ni lakova.

¹⁷ Au a lesia talega e so me nomudoui vakatawa, ka kaya, Dou vakarorogo ki na domo ni davui. A ra sa kaya, Keimami na sega ni vakarorogo.

¹⁸ O koya o qo dou rogoca kina, na lewe ni veivanua, ka kila, koi kemudou nai vavakoso, na ka sa tu vei ira.

¹⁹ Rogoca, vuravura: raica, kaʼu na vakayacora na ca vei ira na tamata o qo, io na vua ni nodra nanuma, e na vuku ni ra sa sega ni rogoca na noqu vosa, se na noqu vunau; era sa biuta ga.

²⁰ A cava na betena ni sa kau mai vei au na ka boi vinaka mai Sipa, kei na kalamo vinaka mai na vanua vakayawa? a nomudoui soro kama sa sega ni donu, kei na nomudoui madrali sa sega ni kamikamica vei au.

²¹ O koya sa vosa vakaoqo kina ko Jiova, Raica, kaʼu na tauca vei ira na tamata o qo na ka me ra toqi kina, a ra na bale vata kina na qase kei na luvedra; na tamata kei na wekana erau na rusa.

²² Sa vosa vakaoqo ko Jiova, Raica, e dua na mataqali sa lako mai na vanua mai na tokalau, ia e dua na matanitu levu ena vakaturi mai nai yalayala kei vuravura:

²³ a dakai kei na moto era na lukuta; era sa yalokaukauwa, ka tawa kila loloma; a domodra ena vadugu me vaka na Wasawasa; i era sa vodo tu e na ose, ka lautuva me vaka na tamata me ia nai valu vei iko, na gonealewa ni Saioni.

²⁴ Keitou sa rogoca na kenai rogorogo: sa malumalumu mai na liga i keitou: a rarawa sa tauvi keitou, kei na yaluma me vaka na alewa sa taratara.

²⁵ Kakua ni ko lako yani ki na were, ia na gau-ni-sala mo kakua ni lakova; e na vuku ni seleiwau ni meca kei na rere sa tu o na veiyasana.

²⁶ O iko, na gonealewa ni noqu tamata, vauci iko o nai sulu taqarotu, ka qiqi o na dravusa: mo ia na tagi, me vaka e dua sa tagicaka na luvena e dua bau ga, na tagi rarawa sara: ni na vakidacala na nona lako mai na dauvakacaca vei keda.

²⁷ Au sa lesi iko mo vale-cecere e na kedra maliwa na noqu tamata, mo vale kaukauwa, mo kila ka vakatovolea kina na nodrai valavala:

²⁸ o ira kecega era sa dauvuki yalovakatani, era sa dauia na vosa veivakacacani: era sa parasa ka aironi; o ira kecega era sa dauvakacaca:

²⁹ sa kama nai iri ni buka, a sa oti e na buka na uma; sa tawa yaga na nona ia na vakariri na dauvakarai siliva: ni sa sega ni takivi tani na tamata ca:

³⁰ era na vakatokai me siliva biu, e na vuku ni sa biuti ira ko Jiova.