Jeremaia 52 - AI VOLA TABU

O Sitikiya, sa tawa vakarorogo vei tui Papiloni, 1-3. Sa kabai ko Jerusalemi, ka rawa; sa moku ko iratou na luvena tagane ko Sitikiya, a sa vakamatabokotaki ko koya, 4-11. O Nipusaretani, sa vakama ka vakacacana na koro, 12-23, a sa kauti ira ki Papiloni era bobulataki, 24-30. Sa yalovinaka tale ko Ivili-mirotaki vei Jioiakini, 31-34.

¹ SA ruasagavulu ka dua na yabaki i Sitikiya ni sa buli ko koya me tui, a sa tini ka dua na nona yabaki ni sa lewa tiko mai Jerusalemi. Ia na yaca i tinana ko Emutali, na luve i Jeremaia na kai Lipina.

² A sa caka ca ko koya e na mata i Jiova, me vaka na ka kecega sa cakava ko Jioiakimi.

³ Ia ni sa cudru ko Jiova sa vaka tu o qo mai Jerusalemi kei Juta, ka yacova na gauna sa biuti ira tani kina e matana, ia sa talaidredre tiko ko Sitikiya vua na tui Papiloni.

⁴ A sa yaco e nai kaciwa ni yabaki ni nona lewa, e nai katini ni vula, e nai katini ni siga ni vula, sa lako mai ko Nipukatiresari na tui Papiloni, o koya kei na nonai valu kecega, ki Jerusalemi, a ra mai tiko kina me kaba, a ra tara na kena vale-kau vakaivalu me vakavolivolita.

⁵ A sa buku na druadrua ni koro ka yacova nai katini kadua ni yabaki i Sitikiya.

⁶ Ia e nai kava ni vula, e nai kaciva ni siga ni vula, sa levu sara na viakana e na koro, a sa sega na kedra madrai na lewe ni vanua.

⁷ Sa qai basuki na koro, ia ko ira kece na tamatai valu era sa dro, ka lako tani mai na koro kei na bogi e na sala mai na matamata-ni-koro e na tadrua ni bai o rua, mai nona were na tui; (ia ko ira na kai Kalitea, era sa tiko vakavolivolita na koro:) a ra sa muria na sala kivakaki na buca.

⁸ Ia na nodrai valu na kai Kalitea era sa cicimuri koya na tui, ka vauci Sitikiya e na buca mai Jeriko; a ra veiseyaki tani vua na nonai valu kecega.

⁹ A ra sa taura na tui, ka kauti koya cake vei tui Papiloni ki Ripila e na vanua ko Emaci; a sa lewai koya maikea ko koya.

¹⁰ Ia ko tui Papiloni, sa vakamatei iratou na luve i Sitikiya e matana: o ira kece talega na turaga ni Juta sa vakamatea ko koya mai Ripila.

¹¹ Ia na mata i Sitikiya sa leuta ko koya; ia ko tui Papiloni sa vesuki koya e na sinucodo, ka kauti koya ki Papiloni, ka vakacurumi koya ki na vale ni veivesu ka yacova na siga ni nona mate.

¹² Ia e nai kalima ni vula, e nai katini ni siga ni vula, a ya nai katinikaciwa ni yabaki ni lewa i Nipukatiresari na tui Papiloni, sa qai lako mai ko Nipusaretani, na turaga ni valu ei vakatawa, sa qaravi tui Papiloni, ki Jerusalemi,

¹³ a sa vakama na vale i Jiova, kei na vale ni tui; ia na vale kece mai Jerusalemi, kei na nodra vale kece na turaga, sa vakama ko koya o na buka:

¹⁴ ia na nodrai valu kece na kai Kalitea, era tiko kaya na turaga ni valu ei vakatawa, era sa basuka sobu na bai ni Jerusalemi kecega e na veiyasana.

¹⁵ Ia e so na tamata kaisi, kei na vo ni tamata era vakavoci e na koro, kei ira sa vuki, era vuki ki tui Papiloni, kei na kena vo ni lewe vuqa, sa kauti ira vakabobula ko Nipusaretani na turaga ni valu ei vakatawa.

¹⁶ Ia e so na kaisi ni vanua sa vakavoca ga ko Nipusaretani na turaga ni valu ei vakatawa, me ra daucaka vaini ka daucaka were.

¹⁷ Ia na duru parasa ka tu e na vale i Jiova, kei nai tutu kei na Wasawasa parasa sa tu e na vale i Jiova, sa vorota ga ko ira na kai Kalitea, ka kauta na kena parasa kecega ki Papiloni.

¹⁸ Ia na kuro, kei nai sivi, kei nai koti ni cina, kei na sedre, kei nai taki, kei nai yaya parasa kecega, era sa daucakacaka kina, era sa kauta tani talega.

¹⁹ Ia na bilo, kei na sedre ni dravu, kei na dari, kei na kuro, kei nai tutu-ni-cina, kei nai taki, kei na bilo; na ka koula na kena koula, kei na ka siliva na kena siliva, sa kauta tani ko koya na turaga ni valu ei vakatawa.

²⁰ A duru e rua, e dua na Wasawasa, ka tinikarua na karavau parasa sa toka e na vu ni tutuna, a ya ka cakava ko Solomoni e na vale i Jiova: ia na kena bibi ni parasa ni yaya kece o qo sa tawa kilai.

²¹ Ia na duru, sa caga tolusagavulu ka ono na kena cecere e dua na duru; ia na wa caga ruasagavulu ka va sa kenai lako; ka caga dua na kena vavaku: a sa vakalomalomana.

²² A sa dua na domodomo parasa e delana; ia na kena balavu e dua na domodomo sa caga tini, a sa vaka na lawa kei na vua ni karaniti sa ceuti vakavolivoliti, ia sa parasa wale kecega o qo. A sa vaka talega kina nai karua ni duru kei na kena vua ni karaniti.

²³ Ia na vua ni karaniti e na matana e va sa ciwasagavulu ka ono; na vua ni karaniti kecega e volita na daku ni lawa sa dua na drau.

²⁴ Ia na turaga ni valu ei vakatawa sa kauti Siraya na bete levu, kei Sifaniya nai karua ni bete, kei iratou nai vakatawa ni katuba e lewe tolu:

²⁵ ia mai na koro, sa kauta tani ko koya e dua na matanivanua sa lesi me vakaraici ira na tamatai valu; kei na tamata e lewe vitu vei ira nai tokani ni tui, eratou sa kune e na koro; kei na turaga sa dauvola ka ni valu, ka dauvakasoqona na lewe ni vanua; kei na tamata e lewe onosagavulu vei ira na lewe ni vanua, era kune e na loma ni koro.

²⁶ Ia ko ira o qo, sa kauta ko Nipusaretani na turaga ni valu ei vakatawa, a sa kauti ira kivei tui Papiloni ki Ripila.

²⁷ A sa yaviti ira ko tui Papiloni, ka vakamatei ira mai Ripila e na vanua ko Emaci. Sa kauti tani vakaoqo ko irana Juta mai na nodra vanua.

²⁸ Sa vakaoqo na tamata sa kauta vakabobula tani ko Nipukatiresari: e nai kavitu ni yabaki, na kai Jutia e lewe tolu na udolu ka ruasagavulu ka tolu:

²⁹ e nai katinikawalu ni yabaki i Nipukatiresari, sa kauta tani mai Jerusalemi ko koya e lewe walu na drau ka tolusagavulu ka rua:

³⁰ e nai karuasagavulu ka tolu ni yabaki i Nipukatiresari, sa kauta tani ko Nipusaretani na turaga ni valu ei vakatawa e lewe vitu na drau ka vasagavulu ka lima vei ira na kai Jutia: o ira na tamata kecega era lewe va na udolu ka ono na drau.

³¹ A sa yaco e nai katolusagavulu ka vitu ni yabaki ni sa vakabobulataki ko Jioiakini na tui Juta, e nai katinikarua ni vula, e nai karuasagavulu ka lima ni siga ni vula, sa qai vueti Jioiakini na tui Juta ko Ivili-mirotaki na tui Papiloni, ka kauti koya mai na vale ni veivesu:

³² a sa vosa vinaka vua, ka vakatikora na nonai tikotiko me liu e na nodrai tikotiko na tui era tiko kaya mai Papiloni,

³³ a sa vakaisosomitaka na nonai sulu ni vale ni veivesu: a sa kana, madrai e matana e na veisiga kece ni nona bula.

³⁴ Ia na kena kakana, sa dua na kenai votavota e na veisiga sa solia ko tui Papiloni, e dua na kenai votavota e na veisiga kece ka yacova na siga sa mate kina, io e na veisiga kecega ni nona bula.