Jeremaia 5 - AI VOLA TABU

A Kalou, sa lewai ira na kai Julia e na vuku ni nodra yaloveve, 1-5, kei na nodra dauyalewa, 6-9, kei na nodra beci koya na Kalou, 10-19, kei na nodrai valavala ca vakavanua, 20-29, ka vakalotu, 30, 31.

¹ DOU veiciciyaki e na sala ni koro ko Jerusalemi, ka raica mada, ka kila, ka vakasaqara e na kenai saqata, se dou sa kunea rawa e dua na tamata, se dua sa ia na lewa dodonu, se vakasaqara na ka dina; kaʼu na qai tawa cudruva.

² Ia ke ra sa kaya, Sa bula ko Jiova; ke ra sa vosavavakini vakailasu ga.

³ I Jiova, na matamu sa qara ki na ka dina, se segai? o sa yaviti ira, a ra sa sega ni rarawa; o sa vakarusai ira, a ra sa bese ni vakavulici: era sa cakava na matadra me qaqa ka malumalumu na vatu; era sa bese ni lesu mai.

⁴ Ia koi au kaʼu a kaya, O ira o qo era sa kaisi beka ga; era sa sesewa: ni ra sa tawa kila na sala i Jiova, na lewa ni nodra Kalou:

⁵ kaʼu na lako kivei ira na turaga, ka vosa vei ira; ni ra sa kila na sala i Jiova, na lewa ni nodra Kalou: ia ko ira talega o qo era sa musuka vata ga nai vua, ka drutia nai vau.

⁶ O koya o qo ena labati ira kina na laioni mai na veikau, na wolifa ni lekutu ena vakacacani ira, na leparite ena yadrava na nodra Veikoro: o ira kecega sa lako ki nai bili era na dresulaki: ni sa levu mai na nodra talaidredre, a sa tubu mai na nodra dauvuki.

⁷ Au na tawa cudruvi iko vakacava e na vuku ni ka o qo? a luvemu era sa biuti au, a ra sa vosavavakini vei ira sa sega ni kalou: niʼu a vakani ira me ra mamau, era sa qai ia na dauyalewa, ia e na vale ni alewa dauyatagane era sa soqoni levu kina.

⁸ E na mataka era sa ose e dauvakani: era dui tagica na watina na kai nona.

⁹ Meʼu tawa cudruva beka e na vuku ni veika o qo? sa kaya ko Jiova: ia ki na matanitu vakaoqo meʼu sa tawa sauma beka na yaloqu?

¹⁰ Dou cabe cake ki na kena bai, ka ia na veivakarusai; ia me kakua ga ni vakaotia sara: biuta tani na kena bai ni valu; ni sa sega ni nei Jiova na ka ko ya.

¹¹ Ni sa cakacaka vakailasu sara vei au na mataqali i Isireli kei na mataqali i Juta, sa kaya ko Jiova.

¹² Era sa lasutaki Jiova, ka kaya, Sa sega ni koya; ena sega ga ni yacovi keda e dua na ca; nai seleiwau kei na viakana eda na sega ni kunea:

¹³ ia na parofita, eratou na yaco me cagi, a sa sega na vosa vei iratou: mo vaka na ka o qo me caka ga vei iratou.

¹⁴ O koya sa vosa vakaoqo kina ko Jiova na Kalou ni lewe vuqa, E na vuku ni dou sa cavuta na vosa o qo, raica, kaʼu na cakava na noqu vosa e na gusumu me buka waqa, kei na tamata o qo me buka, ia ena kati ira.

¹⁵ Raica, kaʼu na kauta mai na lewe ni dua na matanitu vakayawa vei kemudou, na mataqali i Isireli, sa kaya ko Jiova: sa matanitu kaukauwa o qori, sa matanitu makawa o qori, sa matanitu ko sa sega ni kila na nodra vosa, o sa sega talega ni kila na ka era kaya:

¹⁶ a nodra taga ni gasau sa vaka nai bulubulu sa dola tu, era tamata qaqa kecega:

¹⁷ era na kania na lewo ni nomu veiwere, kei na nomu madrai, na kedra na luvemu tagane kei na luvemu alewa: era na kania na nomu sipi kei na nomu karavau: era na kania na nomu vaini kei na nomu lolo: era na vaka-dravudravuataka na nomu veikoro kaukauwa, a ya ko a vakararavi kina, e nai seleiwau.

¹⁸ Ia e na veisiga ko ya, kaʼu na sega ni vakaoti kemudou sara ga, sa kaya ko Jiova.

¹⁹ Ia ena yaco, ni dou na kaya, E na vuku ni cava sa cakava kina ko Jiova na noda Kalou na ka kece o qo vei keda? mo qai kaya vei ira, Me vaka ni dou sa biuti au, ka qarava na kalou tani e na nomudou vanua, ena vakakina, dou na qarava na kai tani e na vanua sa sega ni nomudou.

²⁰ Dou tukuna na ka o qo e na mataqali i Jekope, ka vakarogotaka mai Juta, ka kaya,

²¹ Dou rogoca mada na ka o qo, oi kemudou na tamata lialia, ka tawa vuku; e sa vakamatana, ka sega ni rai; e sa vakadaligana, ka sega ni rogo:

²² mo dou sega beka ni rerevaki au? sa kaya ko Jiova: dou na sega beka ni sautaninini e mataqu, kaʼu sa tauca na nuku mei yalayala ni waitui e nai vakaro tawa mudu, me sa sega ni sivia: ia ko sa vakanana, ke sa sega ni gumatua mai; ke sa vadugu, ko sa sega ni sivia mai?

²³ Ia na tamata o qo era sa yalo-dauvuki ka dautalaidredre; era sa vuki ka lako tani.

²⁴ A ra sa sega ni kaya e na lomadra, Me da rerevaki Jiova mada na noda Kalou, sa solia mai na uca, na uca taumada kei na uca taumuri, e na kena gauna: na vula i kelikeli e lesi sa maroroya vei keda ko koya:

²⁵ a nomudou caka cala sa vakasuka tani na veika o qo, ia na nomudoui valavala ca sa tarova na ka vinaka maivei kemudou.

²⁶ Ni sa kune e so vei ira na noqu tamata era tamata ca: era sa lawa koto, me vakataki koya sa dauia na tudai; era sa ia nai cori, era sa corita na tamata.

²⁷ Me vaka nai su sa sinai e na manumanu, sa vakakina na nodra vale, sa sinai e nai lawaki: a ra sa yaco kina me levu, ka vutuniyau mai.

²⁸ Era sa uro mai, era sa uasivi cake; io, era sa sivia nai valavala ni tamata ca: era sa sega ni lewa na ka e tagitagi kina, na ka e tagitagi kina na luveniyali, ia ka ra yaco ga; na ka talega sa dodonu vei ira na dravudravua era sa sega ni lewa kina.

²⁹ Meʼu tawa cudruva beka e na vuku ni veika o qo? sa kaya ko Jiova: ia ki na matanitu vakaoqo meʼu sa tawa sauma beka na yaloqu?

³⁰ E dua na ka vakurabui ka velavela sa caka e na vanua o qo;

³¹ o iratou na parofita eratou sa tukutuku vakailasu, o ira na bete era sa lewa o na vukudratou, o ira na noqu tamata era sa vinakata me vakakina: ia ka cava mo dou qai cakava e na kenai tinitini?