Jeremaia 49 - AI VOLA TABU

Era na cudruvi na luve i Amoni, 1-5, ka vinaka tale, 6. Ena cudruvi ko Itomi, 7-22, kei Tamasiko. 23-27, kei Kitari kei Asori, 28-33, kei Elama, 34-38. Ena vinaka tale ko Elama, 39.

¹ A KEDRA na luve i Amoni, sa vosa vakaoqo ko Jiova; Sa sega beka o so na luvena tagane ko Isireli? sa sega beka e dua vua me taravi koya? a cava sa taukeni Kata kina ko Milikomi, ia na nona tamata, a cava era tikora kina na nona veikoro?

² O koya o qo, raica, ena yaco na siga, sa kaya ko Jiova, kaʼu na vakarogotaka kina mai Rapa na nodra koro na luve i Amoni e dua na kaila ni valu; ia ena yaco o qori me koro rusa ka lala, ia na luvena alewa era na kama e na buka: ia ko Isireli, ena qai veitaravi kei ira era a veitaravi kaya, sa kaya ko Jiova.

³ Mo qoqolou, Esiponi, ni sa vakacacani ko Ai: dou tagi, na gonealewa ni Rapa, vauci kemudou e nai sulu taqarotu; dou tagi ka yaso ka veiciciyaki mai na bai ni koro; ni sai Milikomi ena kauti vakabobula tani, o ira vata talega na nona bete kei ira na kena turaga.

⁴ A cava ko sa dokai iko kina e na vuku ni veibuca, sa dave tani yani na nomu buca, o iko na gonealewa dauvuki? sa vakararavi ko koya e na nonai yau, ka kaya, O cei me na lako beka mai vei au?

⁵ Kaica, au na vakayacora vei iko na domobula, sa kaya na Turaga ko Jiova ni lewe vuqa, ena vukudra kece era tiko vakavolivoliti iko; ia dou na dui vakasevi sara tani yani yadua; ena sega e dua me kauti koya ki vale sa dro.

⁶ Ia ka oti na ka o qo kaʼu na kauti ira tale mai na luve i Amoni era vakabobulataki, sa kaya ko Jiova.

⁷ A KENA ko Itomi, sa vosa vakaoqo ko Jiova ni lewe vuqa; Sa sega tale beka na vuku mai Temani? sa yali beka nai vakavuvuli vua na yalomatua? sa takali beka na nodra vuku?

⁸ Dou dro, dou lesu tani, laʼki tiko ki na tikina titobu, oi kemudou na kai Titana; ia na ka rarawa kei Iso kaʼu na vakayacora vua, na gauna kaʼu na cudruvi koya kina.

⁹ Ke ra lako mai vei iko na dauveti vua-ni-vaini, ke ra na laiva beka ga e vica na vuana, se segai? se ko ira na daubutako e na bogi, era na butakoca beka ga na ka e ganiti ira?

¹⁰ Ia koi au kaʼu sa vakaluvawaletaki Iso, kaʼu sa vakaraitaka na nonai vunivuni, ia ena sega ni vunitaki koya rawa: sa vakacacani ko ira na nona kawa, kei na wekana, kei na kai nona, a sa yali ko koya.

¹¹ Laivi irana nomu era luveniyali, oi au kaʼu na vakabulai ira; ia ko ira na nomu alewa dawai, me ra vakararavi ga vei au.

¹² Ni sa vosa vakaoqo ko Jiova; Kaica, o ira era sa sega ni lewai me gunuva na bilo era sa gunuva vakaidina ga; ia ko iko dina li me na tawa cudruvi vakalailai? o na sega ga ni lewai me tawa cala, o na gunuva vakaidina ga.

¹³ Niʼu sa cavuti au niʼu sa vosavavakini, sa kaya ko Jiova, me na vanua lala ga, ka vakalialiai, ka lekutu, ka vosavosacati ko Posira; ia na kena veikoro kece ena lala sara ga ka tawa mudu.

¹⁴ E dua nai rogo kaʼu sa rogoca maivei Jiova, ia na kedra mata na veivanua sa talai yani, me kaya, Dou soqoni vata, dou mai lako yani vua, ia dou tu cake mai me mani laʼki kaba.

¹⁵ Ia raica, kaʼu na cakavi iko mo ka lailai ki na veivanua, mo ka beci vei ira na tamata.

¹⁶ A nomu rerevaki sa vakacalai iko, na viavialevu ni lomamu, o iko sa tiko e na qara ni uluvatu, ka sa taura na tikina cecere ni ulu-ni-koro: kevaka ko sa cakava me cecere, me vaka na ikeli, na nomui roro, kaʼu na kauti iko sobu ga maikina, sa kaya ko Jiova.

¹⁷ Ia ko Itomi ena vakalalataki ga, o ira kece era lako voli kina era na kurabui, ka vakasiusiu e na vuku ni nona ka rarawa kecega.

¹⁸ Me vaka e na veivakarusai kei Sotoma kei Komora, kei na Veikoro ka tu voleka kina, sa kaya ko Jiova, ena vakakina, ena sega ni tiko tale maikea e dua na tamata, ena sega talega ni vakatawa tale e dua na luve ni tamata.

¹⁹ Raica, ena lako cake mai ko koya, me vaka na laioni mai na Joritani ni sa vuabale, ki nai tikotiko i koya sa kaukauwa: ia kaʼu na sauriva walega ka cakavi koya me dro tani maikina: ia ko cei na tamata digitaki meʼu lesia me kena turaga? ni sai cei me tautauvata kei au? se ko cei me na lokuca mai vei au na bose? se ko cei nai vakatawa ko ya me na tu mai e mataqu?

²⁰ O koya o qo dou rogoca kina na lewa i Jiova, sa bosea ko koya me yacovi Itomi; kei na ka e sa nakita, sa nakita ko koya me tauci ira na kai Temani: O iratou dina eratou lalai sara e na qele ni sipi eratou na yarataki ira ga: ena cakavi iratou dina ko koya me vakalalataka na nodrai tikotiko.

²¹ Ni sa rorogo na nodra bale, sa yavavala ko vuravura; a nodra tagi, sa rogo yani na kena rorogo ki na wasa damudamu.

²² Raica, me vaka na ikeli, ena lako cake mai ko koya ka vuka ka vakate tabana mai ki Posira: ia na lomadra na qaqa ni Itomi e na siga ko ya ena vaka na loma ni alewa ni sa taratara.

²³ A KENA ko Tamasiko. Sa taqaya mai ko Emaci, kei Eripati: ni sa dua nai rogorogo ca era sa rogoca: sa waicala na lomadra; sa vaka na domobula mai na wasawasa; sa sega ni cegu rawa.

²⁴ Sa malumalumu mai ko Tamasiko, sa vuki vaka me dro, ia na rere sa tauvi koya: ia na yaluma kei na rere sa tarai koya, me vaka na alewa sa taratara.

²⁵ A cava sa tawa laivi tu kina na koro daudokai, na koro kaʼu sa marautaka!

²⁶ Io ko ira dina na nona cauravou era na bale e na sala ni nona koro, kei ira kece na tamatai valu era na muduki tani e na siga ko ya, sa kaya ko Jiova ni lewe vuqa.

²⁷ Ia kaʼu na tutuvaka na buka e na bai ni Tamasiko, ena katia na veivale vakaturaga mai Peni-etati.

²⁸ A KENA ko Kitari, kei na kedra na veimatanitu ni Asori, o qori ena yavita ko Nipukatiresari na tui Papiloni, sa vosa vakaoqo ko Jiova; Dou tu cake, dou lako cake ki Kitari, ka vakacacani ira na kai na tu i cake.

²⁹ A nodra vale malo kei na nodra qele ni sipi, era na kauta tani: a nodra gatu, kei na nodrai yaya kece, kei na nodra kameli, era na kauta ga me nodra; a ra na kaciva mai na kedrai vakarere mai na veiyasana.

³⁰ Dou dro, dou se vakayawa tani, laʼki tiko ki na tikina titobu, oi kemudou na kai Asori, sa kaya ko Jiova; ni sa bosei kemudou ko Nipukatiresari na tui Papiloni, a sa bukia na ca kei kemudou.

³¹ Dou tu cake, dou lako cake ki na matanitu sautu, sa tiko vakacegu wale, sa kaya ko Jiova, sa sega ni ra vakaisogo se vakaivakadei, era sa tiko duaduaga.

³² Ia na nodra kameli, ena yaco mei toki ni valu; kei na nodra manumanu e vuqa, me ka e tokitaki: ia kaʼu na dui vakasevi ira ki na mata ni cagi kece era tiko e nai yalayala yawa sara; ia mai na kena veiyasana kece kaʼu na vakayacora maikina na nodra ka rarawa, sa kaya ko Jiova.

³³ Ia ko Asori, ena kedrai tikotiko na gata lelevu, ena lala ka tawa mudu: ena sega ni tiko kina e dua na tamata, se vakatawa e dua na luve ni tamata.

³⁴ SAI koya o qo na vosa i Jiova vei Jeremaia na parofita na kedra na Elama, a sa yaco e nai vakatekivu ni lewa i Sitikiya na tui Juta, ka vaka,

³⁵ Sa vosa vakaoqo ko Jiova ni lewe vuqa; Raica, au na musuka na nodra dakai na Elama, na vu ni nodra kaukauwa.

³⁶ Ia kaʼu na vakayacora vei ira na Elama na cagi e va mai nai yalayala e va kei lomalagi, ka dui cagini ira tani yani ki na mata ni cagi kecega ko ya; ena sega na vanua me na tawa yaco yani kina na Elama era vakasevi.

³⁷ Niʼu na vakataqayataki ira na Elama e na matadra na nodra meca, kei na matadra era qarai ira me vakamatea: ia kaʼu na vakayacora vei ira na ca, io na noqu cudru katakata, sa kaya ko Jiova; ia kaʼu na talamuri ira nai seleiwau, ka meʼu vakaoti ira sara:

³⁸ ia kaʼu na viritura na noqui tikotiko vakaturaga mai Elama, ka vakaoti koya tani mai kina na tui koi ira na turaga, sa kaya ko Jiova.

³⁹ Ia ena yaco e na gauna maimuri, kaʼu na kauti ira tale mai na Elama era vakabobulataki, sa kaya ko Jiova.