Jeremaia 48 - AI VOLA TABU

Ena cudruvi ko ira na luve i Moapi, 1-5, e na vuku ni nodra viavialevu, 6-10, kei na nodra tiko vakacegu wale, 11-13, kei na nodra vakararavi e na nodra kaukauwa, 14-25, kei na nodra beci koya na Kalou kei ira na nona tamata, 26-46. Era na vinaka tale na luve i Moapi, 47.

¹ A KENA ko Moapi, sa vosa vakaoqo ko Jiova ni lewe vuqa, na Kalou nei Isireli; Ena ca ko Nipo! ni sa vakacacani: sa madua ko Kiriyaceimi ka kabai: sa madua ko Misikapi ka waicala.

² Ena sega tale ni vakacaucautaki Esiponi ko Moapi: era sa bukia vua na ka ca, ka kaya, Me da mai laʼki muduka tani me kakua ni matanitu. O iko talega, Matimeni, ko na vagalui; ena cicimuri iko nai seleiwau.

³ A domo ni tagi sa rogo mai Oroneimi, na veivakacacani kei na rusa levu.

⁴ Sa rusa ko Moapi; era sa vakarogotaka yani na tagi na nona gone lalai.

⁵ Ia ni sa lako cake ki Luici sa lako cake tiko na tagi levu; ni sa lako sobu ki Oroneimi ko ira na meca, sa dua na tagi ni veivakarusai era sa rogoca.

⁶ Dou dro, drotaka na nomudou bula, mo dou vaka na kau vuca mai veikau.

⁷ E na vuku ni nomu vakararavi e na nomu cakacaka kei na nomui yau, sai iko talega ko na bobulataki: ena lako tani yani ko Kimosi ni sa bobulataki, ko ira vata na nona bete kei ira na nona turaga.

⁸ Ia ena yaco na dauvakacaca ki na veikoro kecega, ena sega na koro e bula: ena ca talega na buca ka rusa na cecelevu, me vakai koya sa kaya ko Jiova.

⁹ Soli taba vei Moapi me vuka sara tani yani: ia na kena veikoro, sa lala, me sega e tiko kina.

¹⁰ Me vosacati ko koya sa cakava na cakacaka i Jiova me vakailasu, ia me vosacati ko koya sa tarova na nonai seleiwau mai na dra.

¹¹ Sa dautiko vakacegu ko Moapi mai na gauna sa gone kina, a sa dautiko wale e na kena soko, a sa sega ni veisovayaki mai na saqa ki na saqa, ia e na veivakabobulataki e sa sega ni lako tani yani kina: o koya o qo sa tiko ga vua na kena velavela, ia na kenai boiboi sa sega ni dua tani mai.

¹² O koya o qo raica, ena yaco na gauna, sa kaya ko Jiova, kaʼu na talai ira kina vua na daulako sese voli era na vakasesei koya, ia na nona saqa era na sovadiva, kei na nodra tavaya era na vorolaka.

¹³ Ia ena maduataki Kimosi ko Moapi, me vaka na mataqali nei Isireli ni sa maduataki Peceli era a vakararavi kina.

¹⁴ Dou sa kaya vakacava, Sa kaukauwa koi keimami ka tamata qaqa e nai valu?

¹⁵ Sa vakacacani ko Moapi, ia na nona Veikoro sa lako cake tani maikina, ia ko ira na nona cauravou digitaki era sa lako sobu me vakamatei, sa kaya na Tui, ko Jiova ni lewe vuqa na yacana.

¹⁶ Na ka rarawa kei Moapi sa toro voleka mai, ia na kena ca sa kusarawa sara mai.

¹⁷ Dou yasovaki koya, oi kemudou kece sa tiko vakavolivoliti koya; kei kemudou kece sa kila na yacana, dou kaya, Na kena ramusu nai titoko kaukauwa, nai titoko vakaiukuuku!

¹⁸ Mo lako sobu mai na nomu lagilagi, ka tiko sobu ni ko sa viagunu, o iko na gonealewa sa tiko mai Tiponi; ni sai koya sa vakacacani Moapi ena lako cake mai vei iko, ena vakarusa ko koya na nomu bai kaukauwa.

¹⁹ Mo tutu ga e na sala, ka vakararai tu, o iko na kai Aroeri; tarogi koya na tagane sa dro mai, kei koya na alewa sa se mai, mo kaya, A cava na ka sa yaco?

²⁰ Sa madua ko Moapi; ni sa basuki sobu: qoqolou ka tagi; tukuna yani ki Erinoni, ni sa vakacacani ko Moapi,

²¹ ia na ka ka lewai sa yacova na vanua bucabuca; kei Oloni, kei Yasa, kei Mefeaci,

²² kei Tiponi, kei Nipo, kei Peci-tipilacaimi,

²³ kei Kiriaceimi, kei Peci-kamuli, kei Peci-mioni,

²⁴ kei Kirioci, kei Posira, kei na Veikoro kece ni vanua vaka-Moapi, se vakayawa se voleka.

²⁵ Sa tamusuki na kaukamea ni Moapi, ia na ligana sa ramusu, sa kaya ko Jiova.

²⁶ Dou vakamatenitaki koya: ni sai Jiova ka vakalevulevui koya kina, ia ena qiqi tu ko Moapi e na nona lua, ia ena dredrevaki talega ko koya.

²⁷ Ia ko a daudredrevaki Isireli, se segai? se kei ira na daubutako ka kune beka kina ko koya? ni sa kawa ni nomu vosataki koya, ko sa ladelade kina.

²⁸ Dou laiva na Veikoro, ka laʼki tiko ga ki na uluvatu, oi kemudou sa tiko mai Moapi, ia mo dou vaka ga na ruve sa cakava na nona sova e na bati ni gusu ni qara.

²⁹ Eda sa rogoca na viavialevu i Moapi, (sa viavialevu sara) na nona lagilagi, kei na nona viaviaturaga, kei na nona viavia-qaqa, kei na nona yaloqaciqacia.

³⁰ Oi au kaʼu sa kila, sa kaya ko Jiova, na nona cudru levu; ia ena tawa yaco ga; a nona dauvosa, ena sega so na ka e rawa kina.

³¹ O koya o qo e na vuku i Moapi kaʼu na qoqolou kina, ia e na vuku i Moapi kece kaʼu na tagi ga kina; e na vukudra na kai Kiri-erese ena vutugu kina na yaloqu.

³² E na tagi vaka-Yaseri kaʼu na tagicaki iko kina, o iko na vaini ni Sipima: a kemu kasa sa salava na wasawasa, ka yacova sara na wasa vaka-Yaseri: a nomu vuata matua kei na vua ni nomu vaini sa tokia ko koya na dauvakacaca.

³³ A sa kauti tani na marau kei na rereki mai na were vakalewe, kei na vanua vaka-Moapi; ia na waini e nai keli-ni-waini kaʼu sa vakaotia: ena sega e kaikaila ni sa sikaraka; ni sa kaila, sa sega ni kaila tawa.

³⁴ Sa ia na tagi mai Esiponi, a sa yacovi Elale kei Yeasi na nodra tabalaka na domodra, a sa ia mai Soeri, a sa yacovi Oroneimi, me vaka na luve ni karavau sa tolu na kena yabaki: ni sa wai talega mai Nimirimi ena biu laivi yani.

³⁵ Ia kaʼu na muduki koya tani talega mai Moapi, sa kaya ko Jiova, e sa dausoro e na veiyasana cecere, ka vakacaudreva nai madrali boi vinaka vei ira na nona kalou.

³⁶ Ia na lomaqu vei Moapi ena rorogo me vaka na bitu, kei na lomaqu vei ira na kai Kiri-erese ena rorogo me vaka na bitu: e na vuku ni ka levu sa rawata ni sa yali ga.

³⁷ Ia na uludra kece, ena drika ga; kei na kumidra kece, ena koti ga; e ligadra kece, ena tu na tava; kei nai sulu taqarotu e tolodra.

³⁸ E dela ni veivale kece ni Moapi, e na kenai saqata ni koro talega, ena dua vata kina na tagi yaso: niʼu sa vorolaki Moapi me vaka na bilo sa tawa vinakati, sa kaya ko Jiova.

³⁹ Na kena ramusu! era na qolouvaka; na nona vuki vakanadaku ko Moapi, ni sa madua! ia ena yaco ko Moapi me ka e dredrevaki ka taqayataki vei ira kece era tiko vakavolivoliti koya.

⁴⁰ Ni sa vosa vakaoqo ko Jiova; Raica, me vaka na ikeli, ena vuka mai ko koya ka vakate tabana mai ki Moapi.

⁴¹ Sa kabai na Veikoro, ia na bai ni valu kaukauwa sa rawa sara, ia na yalodra na qaqa ni Moapi e na siga ko ya ena vaka na yalo ni alewa sa taratara.

⁴² Ia ena rusa ko Moapi me kakua ni matanitu, ni sai Jiova sa vakalevui koya kina.

⁴³ A ka rerevaki, kei nai keli, kei na tudai, ena yadravi iko na kai Moapi, sa kaya ko Jiova.

⁴⁴ O koya sa drotaka na ka rerevaki, ena lutu ki nai keli; o koya sa cabe mai nai keli, ena coriti e nai cori: niʼu na vakayacora vei koya, io vei Moapi, na yabaki ni nodra cudruvi, sa kaya ko Jiova.

⁴⁵ O ira era dro era sa mai tu ga e ruku ni yaloyalo i Esiponi ni sa kaukauwa: ia na buka ena lako tani mai Esiponi, kei na yameyame ni buka mai na loma ni koro ko Sioni, ka kania nai yalayala kei Moapi, kei na buradeladra na gone dauue.

⁴⁶ Ule ko iko, Moapi! sa ra rusa na tamata i Kimosi: ni ra sa tauri na luvemu tagane me bobula, kei ira na luvemu alewa talega, me bobula.

⁴⁷ Ia e na gauna maimuri kaʼu na kauti ira tale mai na luve i Moapi era vakabobulataki, sa kaya ko Jiova. Sa tini na veilewai kei Moapi.