Jeremaia 47 - AI VOLA TABU

A nodra vakacacani na kai Filisitia, 1-7.

¹ SAI koya o qo na vosa i Jiova vei Jeremaia na parofita na kedra na kai Filisitia, a sa yaco mai eliu a sa yaviti Kesa emuri ko Fero.

² Sa vosa vakaoqo ko Jiova; Raica, na wai sa tubu cake mai na mata ni tokalau, ia ena dobui luvu, ena luvuca na vanua, kei na ka kecega sa tu kina; na koro, kei ira sa tiko kina: era na qai tagi na tamata, ka qoqolou kecega na lewe ni vanua.

³ E na vuku ni domo ni butubutu ni yavadra na nona ose kaukauwa, kei na rorogo ni nona vale-vodoki, kei na kurukuru ni yava ni nona vale-vodoki, era na sega ni rai kimuri na qase ki na luvedra ni sa wadamele na ligadra;

⁴ e na vuku ni siga sa yaco mai me vakacacani ira kece kina na kai Filisitia, ka muduka tani mai Teiri kei Saitoni nai vukevuke kecega sa vo: ni na vakacacana ko Jiova na kai Filisitia, na kedra vo ni vanua ko Kafitori.

⁵ Sa yaco ko Kesa me drika; sa muduki laivi ko Esikiloni kei ira sa vo e na nodra buca: me bogi vica mada mo tavai iko tiko?

⁶ O iko nai seleiwau i Jiova, me bogi vica mada mo qai vakacegu? darama na nomu taga, mo rere, ka tiko lo.

⁷ Me vakacegu vakaevei, ni sai Jiova sa vakarota vua me ia kei Esikiloni, kei na baravi? sa kikea sa lesia ko koya.