Jeremaia 46 - AI VOLA TABU

O Jeremaia, sa parofisaitaka na nodra vakarusai nai valu i Fero mai Papiloni, 1-12, kei na nona kabai Ijipita ko Nipukatiresari, 13-26. Sa vakacegui ira na kai Jutia ni ra vakararawataki, 27, 28.

¹ SAI koya o qo na vosa i Jiova vei Jeremaia na parofita na kedra na veimatanitu;

² io na kena ko Ijipita, na kedra nai valu i Fero-niko na tui Ijipita mai na uciwai ko Uferetisi mai Karikimisi, o qori ka yavita ko Nipukatiresari na tui Papiloni e nai kava ni yabaki i Jioiakimi na luve i Josaia na tui Juta.

³ Dou vakarautaka nai sasabai kei nai vakaruru, ka toro yani me ia nai valu.

⁴ Vauca na kedrai yaya na ose; ka vodo, oi kemudou sa dauvodo e na ose, ka dou tu yani ka vakaisala tu; dou solota na moto, suluma nai sulu ni valu.

⁵ A cava kaʼu sa raici ira kina ka ra taqaya ka vuki vakanadaku? ia na nodra qaqa era sa samuti, a ra sa dro sara, ka tawa rai kimuri: sa vakavolivoliti ira na rere, sa kaya ko Jiova.

⁶ Kakua ni dro ko koya sa yava-mamada, se dro bula ko koya sa qaqa; sa vaka ki na mata ni tokalau mai na uciwai ko Uferetisi era na tarabe kina ka bale.

⁷ O cei o qo sa vaka na waluvu sa tubu cake mai, ka vaka na uciwai sa yavavala na kena wai?

⁸ Sai Ijipita o qo sa tubu cake mai me vaka na waluvu ka vaka na uciwai sa yavavala na kena wai; a sa kaya ko koya, Au na tubu cake ka luvuca na vanua; au na vakarusa na koro kei ira sa tiko kina.

⁹ Dou lako cake mai, na ose; ka dou laba mai, na vale-vodoki; ka dou cabe mai, na qaqa; oi kemudou na kai Kusi kei na kai Lipia, sa dautarai sasabai; kei kemudou na kai Litia, sa dautara ka dauyavia na dakai.

¹⁰ Ni sa nona siga o qo na Turaga ko Jiova ni lewe vuqa, na siga ni veisaumi, me saumi koya kina vei ira na nona meca: ia ena kanakana ga nai seleiwau, ena mamau ka mateni e na kedra dra: ni sa dua na nonai madrali na Turaga ko Jiova ni lewe vuqa mai na vanua mai na tokalau, e na bati ni uciwai ko Uferetisi.

¹¹ Mo lako cake ki Kiliati, ka kauta mai na memu wai-ni-mate, o iko na gonealewa, na gone ni Ijipita: ena tawa yaga ni sa levu mai na kemui botani; ni ko na sega ga ni bula.

¹² Era sa rogoca na veivanua na nomu madua, ia na nomu qoqolou sa robota na vanua: ni sa veitarabe koi rau sa qaqa, a rau sa bale vata ruarua.

¹³ A VOSA sa tukuna ko Jiova vei Jeremaia na parofita, e na vuku ni nona lako mai ko Nipukatiresari na tui Papiloni, me yavita na vanua ko Ijipita.

¹⁴ Dou tukuna ki Ijipita, ka vakarogotaka ki Mikitoli, ka vakarogotaka ki Memifi kei Tapanesi: dou kaya, Mo tu dei ga, ka vakarau tu; ni sa kana tu nai seleiwau ka sa vakavolivoliti iko.

¹⁵ A cava era sa uani tani yani kina na nomu qaqa? era tawa tu rawa, ni sai Jiova sa vakasavi ira:

¹⁶ sa vakabalei ira na lewe vuqa ko koya, io era sa dui veibaleti: a ra kaya, Tu cake, me da lesu tani ki na kai noda, ki na vanua eda a sucu kina, mai nai seleiwau kaukauwa.

¹⁷ Era a kaci maikea, Sai Fero na tui Ijipita na ue walega; sa sivia ko koya na gauna ka lokuci.

¹⁸ Me vaka na dina ni noqu bula, sa kaya na Tui, ko Jiova ni lewe vuqa na yacana, Ni sa vakai Tapori ni sa tu dina e na maliwa ni veiulu-ni-vanua, ka vakai Karimeli ni sa tu dina e na bati ni waitui, ena lako dina ga mai ko koya.

¹⁹ Nai yaya ni nomu lako vakabobula tani mo vakarautaka, o iko na gonealewa sa tiko mai Ijipita: ni sai Memifi ena lala ka vakarusai me sega e tiko kina.

²⁰ Sa luve ni karavau matavinaka sara ko Ijipita, ia na dauveikata mai na mata ni tokalau sa lako mai, sa lako mai.

²¹ O ira na nona tamata voli talega era tiko e lomana era sa vaka na karavau uro; ia ko ira tale era sa lesu ga kimuri, era sa dro vata ga: era sa tawa tu dei, ni sa siga ni nodra ca sa yacovi ira mai, na gauna me ra cudruvi kina.

²² A domona, ena rogo yani me vaka na domo ni gata: ni sa vakaivalu na nodra lako mai, era na lako mai vua ka ra vakamatau tu, me vakataki ira na dauta kau.

²³ Era na taya sobu ga na nona veikau, sa kaya ko Jiova, ia ke dredre sara ni vakadikevi; ni ra lewe vuqa ka lewe lailai ga na vodre, ka ra tawa wiliki rawa.

²⁴ Ena madua mai na gonealewa ni Ijipita; ena soli ga ki na ligadra na tamata mai na mata ni tokalau.

²⁵ Sa kaya ko Jiova ni lewe vuqa, na Kalou nei Isireli; Raica, au na cudruvi Amoni nei No, kei Fero, kei Ijipita, kei ira na nodra kalou, kei na nodra tui: io ko Fero kei ira kecega era vakararavi vua:

²⁶ ia kaʼu na soli ira ki na ligadra era qarai ira me vakamatea, ia ki na liga i Nipukatiresari na tui Papiloni, kei na ligadra na nona tamata: ka oti, ena tawa tale me vaka e na gauna eliu, sa kaya ko Jiova.

²⁷ Ia ko iko, mo kakua ni rere, Jekope na noqu tamata, io kakua ni ko taqaya, Isireli: ni sai au, raica, ena vakabulai iko mai na vanua vakayawa, kei na nomu kawa mai na vanua era sa bobula kina; ia ena lesu mai ko Jekope, me tiko vakacegu ka vinaka, me sega ena vakarerea.

²⁸ O iko, mo kakua ni rere, Jekope na noqu tamata, sa kaya ko Jiova; niʼu sa tiko kei iko koi au: niʼu na vakaotia sara na veimatanitu kecega kaʼu sa vakasevi iko kina, ia ko iko, kaʼu na tawa vakaotia sara: kaʼu na vakanakuitataki iko vakavinaka ga, ia niʼu na sa cudru, kaʼu na tawa cudruvi iko vakalevu sara.