Jeremaia 44 - AI VOLA TABU

A Sa tukuna ko Jeremaia ni ra sa ca na Juta e na vuku ni nodra qaravi ira na kalou tani, 1-10. Sa parofisaitaka na nodra ca na kai Jutia era tiko vulagi mai Ijipita, era qaravi ira na kalou tani, 11-14. Era sa lomakaukauwa sara na kai Jutia, 15-19, a sa vunauci ira kina ko Jeremaia, 20-28, a sa parofisaitaka na ca kei Ijipita mei vakadinadina ni nona vosa, 29, 30.

¹ A VOSA sa yaco vei Jeremaia e na vukudra kece na kai Jutia era tiko e na vanua ko Ijipita, o ira sa tiko mai Mikitoli, kei Tapanesi, kei Memifi, kei na tikina ko Pacirosi, a sa vaka,

² Sa vosa vakaoqo ko Jiova ni lewe vuqa, na Kalou nei Isireli; Oi kemudou, dou sa raica na ca kece kaʼu sa vakayacora ki Jerusalemi, kei na Veikoro vaka-Juta kecega; ka, raica, sa lala e na siga edaidai, ka sa sega e tiko kina,

³ e na vuku ni nodra ca era sa cakava me vakacudrui au, ni ra sa laʼki vakacaudreva nai madrali boi vinaka, me qaravi ira na kalou tani, era sa tawa kila, se ko ira, se koi kemudou, se ko ira na nomudou qase.

⁴ Ia kaʼu a talai ira kecega na noqui talatala vei kemudou, ka sou e na sabogibogi me tala, ka kaya, Dou kakua sara mada ni cakava na ka vakasisila o qo kaʼu sa cata.

⁵ A ra sa sega ni vakarorogo, se vakatu daligadra me saumaki mai na nodra ca, me kakua ni vakacaudreva nai madrali boi vinaka vei ira na kalou tani.

⁶ A sa sovaraki kina na noqu cudru kei na noqu lesa, a sa waqa e na Veikoro vaka-Juta kei na sala ni koro ko Jerusalemi; a sa rusa mai kina ka lala, me vaka e na siga o qo.

⁷ O koya o qo sa qai vosa vakaoqo kina ko Jiova, na Kalou ni lewe vuqa, na Kalou nei Isireli; A cava dou sa cakava kina na ca levu o qo ki na yalomudou, me muduka tani kina vei kemudou na tagane kei na alewa, na gone lalai kei ira sa sucu tiko, mai Juta, me kakua e vakavoci vei kemudou;

⁸ ni dou sa vakacudrui au e na cakacaka ni ligamudou, ni dou sa vakacaudreva nai madrali boi vinaka vei ira na kalou tani e na vanua ko Ijipita, a ya dou sa mai tiko kina, me kemudou muduki kemudou tani, mo dou vosavosacati, ka vakalialiai e na veivanua kece e vuravura?

⁹ Dou sa guilecava li na nodrai valavala ca na nomudou qase, kei na nodrai valavala ca na tui Juta, kei nai valavala ca ni watidra, kei na nomudoui valavala ca, kei nai valavala ca ni watimudou, a ya era sa cakava e na vanua ko Juta, kei na sala ni koro ko Jerusalemi?

¹⁰ Era sa tawa yalomalumalumu mai ka yacova na siga o qo, era sa tawa rere, se muria na noqu vunau, se na noqui lesilesi, kaʼu sa tauca e na matamudou kei na matadra na nomudou qase.

¹¹ O koya sa vosa vakaoqo kina ko Jiova ni lewe vuqa, na Kalou nei Isireli; Raica, au na vaqara na mataqu vei kemudou mo dou ca, meʼu muduki ira kece tani na Juta.

¹² Ia kaʼu na kauta na vo ni Juta, era sa vaqara na matadra me lako ki na vanua ko Ijipita me tiko vulagi kikea, a ra na oti kece e na vanua ko Ijipita, ka bale; e nai selewau kei na viakana era na oti ga kina: o ira na kaisi kei ira talega na turaga era na mate e nai seleiwau kei na viakana: a ra na rukaki, ka kidacalataki, ka vosavosacati, ka vakalialiai.

¹³ Niʼu na cudruvi ira sa tiko e na vanua ko Ijipita, me vaka niʼu sa cudruvi Jerusalemi, e nai seleiwau, kei na viakana, kei na mate dauveitauvi:

¹⁴ me kakua e dua me dro tani rawa se vo tiko vei ira na vo ni Juta, era sa lako ki na vanua ko Ijipita me tiko vulagi mada kikea, ka qai lesu mai ki na vanua ko Juta, a ya era sa nanuma me ra lesu me ra tiko tale maikina: ni na sega so ena lesu tale mai, o ira ga era vakabulai.

¹⁵ A ra sa qai vosa kece vei Jeremaia na tagane era kila ni sa vakacaudreva ko na watidra nai madrali boi vinaka vei ira na kalou tani, o ira kece talega na alewa era tu mai, nai vavakoso levu, io ko ira na tamata kecega era tiko e na vanua ko Ijipita, mai Pacirosi, a ra sa kaya,

¹⁶ Na vosa, ko sa tukuna vei keimami e na yaca i Jiova, keimami na sega ni vakarogoca maivei iko:

¹⁷ ia keimami na cakava sara ga na ka kece sa lako mai na gusu i keimami, me vakacaudreva nai madrali boi vinaka vua na radi ni lomalagi, ka sova vua nai sevu, me vaka ni keimami sa daucakava, koi keimami, kei ira na neimami qase, kei na neimami tui, kei na neimami turaga, e na Veikoro vaka-Juta, kei na sala ni koro ko Jerusalemi: ni keimami sa qai mamau kina e na kakana, ka bula vinaka, ia na ca keimami sa tawa raica:

¹⁸ ia ni keimami sa qai cegu ni vakacaudreva nai madrali boi vinaka vua na radi ni lomalagi, ka tawa sova vua nai sevu, keimami sa qai dravudravua e na ka kecega, ia e nai seleiwau kei na viakana keimami sa qai oti ga kina:

¹⁹ ia ni keimami sa vakacaudreva nai madrali boi vinaka vua na radi ni lomalagi, ka sova vua nai sevu, sa yali beka mai na neimami tagane ni keimami sa cakava nai buli madrai me sorovi koya kina, ka sova vua nai sevu?

²⁰ Sa qai vosa ko Jeremaia vei ira na tamata kecega, vei ira na tagane, kei na alewa, kei ira kece na tamata era vosa vakaoqo, a sa kaya,

²¹ Nai madrali boi vinaka dou sa vakacaudreva e na Veikoro vaka-Juta, kei na sala ni koro ko Jerusalemi, oi kemudou, kei ira na nomudou qase, kei ira na nomudou tui, kei na nomudou turaga, kei na lewe ni vanua, sa sega beka ni nanuma kina ko Jiova, sa sega beka ni kasa ki lomana?

²² Ia sa dredre ni vosota ko Jiova, e na vuku ni ca ni nomudoui valavala, kei na ka vakasisila dou sa cakava; ia na nomudou vanua sa lala kina, ka kidacalataki, ka vosavosacati, ka sega e tiko kina, me vaka e na siga o qo.

²³ E na vuku ni dou sa vakacaudreva nai madrali boi vinaka, ka sai valavala ca vei Jiova, ka sega ni vakarorogo ki na domo i Jiova, ia na nona vunau, kei na nonai lesilesi, kei na nonai tukutuku, dou sa tawa muria; o koya o qo sa yacovi kemudou kina na ca o qo, me vaka e na siga edaidai.

²⁴ A sa kaya tale ko Jeremaia vei ira kece na tamata, kei ira kece na alewa, Dou rogoca na vosa i Jiova, oi kemudou kece na Juta sa tiko e na vanua ko Ijipita:

²⁵ Sa vosa vakaoqo ko Jiova ni lewe vuqa, na Kalou nei Isireli, ka vaka; Oi kemudou kei na watimudou, dou sa vosa oti e na gusumudou, ka vakayacora e na ligamudou, ka vaka, Keimami na cakava sara ga na ka keimami sa yalataka, me vakacaudreva nai madrali boi vinaka vua na radi ni lomalagi, ka sova vua nai sevu: dou na vakayacora vakaidina ga na ka dou sa yalataka, ka cakava vakaidina ga na ka dou sa yalataka:

²⁶ o koya o qo dou rogoca kina na vosa i Jiova, oi kemudou kece na Juta sa tiko na vanua ko Ijipita; Raica, oi au kaʼu sa vosavavakini e na yacaqu levu, sa kaya ko Jiova, ena sega ni cavuti tale na yacaqu e na gusuna e dua na kai Juta, me kaya, Sa bula na Turaga ko Jiova, e na dua na tiki ni vanua ko Ijipita.

²⁷ Raica, au na yadravi ira me ra ca, me ra kakua ni vinaka: a ra na vakaoti kece na kai Juta era tiko e na vanua ko Ijipita e nai seleiwau, kei na viakana, ka me ra oti sara ga.

²⁸ Ia ko ira era bula mai nai seleiwau, era na lesu mai na vanua ko Ijipita ki na vanua ko Juta, ka lewe vica ga; ia ko ira kece na vo ni Juta, era sa yaco ki na vanua ko Ijipita me tiko vulagi maikea, era na kila se na vosa i cei ena tu ga, se na noqu, se na nodra.

²⁹ O qo nai vakatakilakila vei kemudou, sa kaya Jiova, niʼu na cudruvi kemudou e na yasana o qo, mo dou kila ni na vakadinadinataki sara na noqu vosa vei kemudou mo dou ca:

³⁰ Sa vosa vakaoqo ko Jiova; Raica, au na soli Fero-ofira na tui Ijipita ki na ligadra na nona meca, kei na ligadra era qarai koya me vakamatea; me vaka niʼu a soli Sitikiya na tui Juta ki na liga i Nipukatiresari na tui Papiloni, na nona meca, o koya talega ka qarai koya me vakamatea.