Jeremaia 42 - AI VOLA TABU

Sa masuti Jeremaia ko Yoanani me tarogi koya na Kalou e na ka me ra cakava, a ra kaya era na talairawarawa vua, 1-6. Sa tukuna ko Jeremaia na lewa ni Kalou vei ira, 7-18, a sa vunauci ira e na vuku ni nodra veivakaisini kei na nodra vosa lasu vei Jiova, 19-22.

¹ ERA sa qai toro mai na turaga ni valu kecega, kei Yoanani na luve i Karea, kei Yisaniya na luve i Osaya, kei ira na tamata kecega, na kaisi kei ira talega na turaga,

² a ra sa kaya vei Jeremaia na parofita, Me donu mada na neimami vakamamasu e matamu, ia mo ia na veimasulaki e na vuku i keimami vei Jiova na nomu Kalou, io e na vuku i keimami kece o qo sa vo tiko; (ni keimami sa kena vo lailai ni lewe vuqa, me vaka ni sa raici keimami na matamu:)

³ ka me vakatakila vei keimami ko Jiova na nomu Kalou na sala me keimami lako kina, kei na ka me keimami cakava.

⁴ A sa kaya vei ira ko Jeremaia na parofita, Au sa rogoci kemudou; raica, au na masuti Jiova na nomudou Kalou me vaka na nomudou vosa; ia ena yaco, na ka kece ena kaya mai ko Jiova vei kemudou, kaʼu na tukuna ga vei kemudou; au na sega ni maninitaka e dua na ka maivei kemudou.

⁵ Ia ko ira, era sa kaya vei Jeremaia, Me ia na veilewai dina ka dodonu ko Jiova kei keimami, kevaka ena sega ni tautauvata na ka kece ena talai iko kina ko Jiova na nomu Kalou vei keimami kei na ka keimami na; cakava:

⁶ se vinaka, se ca, ki na domo i Jiova na noda Kalou, o koya keimami sa talai iko vua, keimami na vakarorogo ga kina; me vinaka kina koi keimami ni keimami sa vakarorogo ki na domo i Jiova na noda Kalou.

⁷ A sa yaco ni sa oti na bogi e tini, sa qai yaco mai na vosa i Jiova vei Jeremaia:

⁸ a sa kacivi Yoanani na luve i Karea, kei ira kece na turaga ni valu era tiko kaya, kei ira na tamata kecega, na kaisi kei ira talega na turaga,

⁹ a sa kaya vei ira ko koya, Sa vosa vakaoqo ko Jiova, na Kalou nei Isireli, o koya dou sa talai au vua me tauca na nomudou vakamamasu e matana;

¹⁰ Kevaka dou na tiko dina ga e na vanua o qo, au na qai tarai kemudou cake, ka sega ni talaraka sobu, au na tei kemudou, ka sega ni cavuta cake: niʼu sa veivutuni e na vuku ni ca kaʼu sa cakava vei kemudou.

¹¹ Dou kakua ni rerevaki tui Papiloni, o koya dou sa rerevaka; dou kakua ga ni rerevaki koya, sa kaya ko Jiova: niʼu sa tiko kei kemudou koi au me vakabulai kemudou, io me kaliraki kemudou mai na ligana.

¹² Ia kaʼu na yalololoma vei kemudou, me yalololoma vei kemudou ko koya, ka vakalesui kemudou ki na nomudou vanua.

¹³ Ia kevaka dou sa kaya, Keimami na tawa tiko e na vanua o qo, ka bese ni vakarorogo ki na domo i Jiova na nomudou Kalou,

¹⁴ ka kaya, E segai; ki na vanua ga ko Ijipita keimami na lako kina, keimami na sega ni raica kina nai valu, kei na domo ni davui keimami na tawa rogoca, kei na madrai keimami na tawa dausiga kina, io keimami na laʼki tiko ga kikea:

¹⁵ ia dou rogoca mada kina na vosa i Jiova, oi kemudou na vo ni Juta: Sa vosa vakaoqo ko Jiova ni lewe vuqa, na Kalou nei Isireli; Kevaka dou sa vaqara sara na matamudou me lako ki Ijipita, me sa laʼki tiko vulagi kikea;

¹⁶ ena qai yaco, nai seleiwau, dou sa rerevaka, ena qai vauci kemudou maikea e na vanua ko Ijipita, kei na viakana, dou sa rerevaka, ena cicimuri kemudou ki Ijipita; ia dou na mate maikea.

¹⁷ Ia ko ira kece na tamata era vaqara na matadra me lako ki Ijipita me tiko kikea, era na mate ga e nai seleiwau, kei na viakana, kei na mate dauveitauvi: ena sega talega e dua vei ira me vo se me dro tani mai na ca kaʼu na vakayacora vei ira.

¹⁸ Ni sa vosa vakaoqo ko Jiova ni lewe vuqa, na Kalou nei Isireli; Me vaka ni sa sovaraki na noqu cudru kei na noqu lesa vei ira na kai Jerusalemi; ena sovaraki vakakina na noqu cudru vei kemudou, ni dou sa yaco ki Ijipita: ia dou na rukaki, ka kidacalataki, ka vosavosacati, ka vakalialiai; ia dou na sega ni raica tale na yasana o qo.

¹⁹ Sa vosa oti ko Jiova e na vukumudou, na vo ni Juta; Dou kakua ni lako ki Ijipita; dou kila deivaka niʼu sa tukuna sara vei kemudou edaidai.

²⁰ Ni dou sa lawakitaka na lomamudou, ni dou sa talai au vei Jiova na nomudou Kalou, ka kaya, Mo masulaki keimami vei Jiova na noda Kalou; ia me vaka na ka kece ena kaya ko Jiova na noda Kalou, mo tukuna vakakina vei keimami, ia keimami na cakava ga.

²¹ Ia kaʼu sa qai tukuna vei kemudou e na siga edaidai; ia dou sa sega ga ni vakarorogo ki na domo i Jiova na nomudou Kalou, se ki na dua na ka sa talai au kina vei kemudou.

²² Ia dou kila deivaka mada ga ni dou na mate e nai seleiwau, kei na viakana, kei na mate dauveitauvi, e na yasana dou sa via laʼki tiko vulagi maikina.