Jeremaia 40 - AI VOLA TABU

O Jeremaia, ni sa sereki, sa laʼki tiko kei Kitaliya, 1-6. O ira talega na kai Jutia era dui veiseyaki era sa mai tiko kei Kitaliya, 7-12. Sa vakavotona ko Yoanani na vere i Isimeeli, a sa tawa vakadinati na nona vosa, 13-16.

¹ A VOSA sa yaco vei Jeremaia maivei Jiova, ni sa vakatalai koya yani mai Rama ko Nipusaretani na turaga ni valu ei vakatawa, ni sa tauri koya oti ni sa vesuki vata e na sinucodo kei ira kece na kai Jerusalemi kei na kai Juta era bobulataki, era sa kauti vakabobula ki Papiloni.

² Ia na turaga ni valu ei vakatawa sa kauti Jeremaia, ka kaya vua, O Jiova na nomu Kalou sa cavuta na ca o qo ki na yasana o qo:

³ a sa vakayacora, a sa cakava ko Jiova me vaka na nona vosa: e na vuku ni dou sai valavala ca vei Jiova, ka sega ni vakarorogo ki na domona, o koya ga sa yacovi kemudou kina na ka o qo.

⁴ Ia o qo, raica, kaʼu sa sereki iko edaidai mai na sinucodo sa vauci kina na ligamu. Kevaka e vinaka vei iko me daru lako ki Papiloni, daru mai lako; kaʼu na vakaraici iko: ia kevaka e ca vei iko me daru mai lako ki Papiloni, sa kakua ga: raica, na vanua kecega sa tiko e matamu: ia na tikina sa vinaka ka dodonu vei iko me lako kina, mo lako ga kina.

⁵ Ia ni sa sega ni lako ko koya, sa kaya vua, Ia mo lesu tale yani vei Kitaliya na luve i Eiiakami na luve i Safani, o koya sa lesia ko tui Papiloni me lewa na veikoro vaka-Juta, mo dou tiko kaya kei ira na tamata: se ki na tikina e dodonu vei iko mo lako kina, mo lako ga kina. A sa solia vua na turaga ni valu ei vakatawa nai oca kei nai solisoli, ka vakatalai koya yani.

⁶ A sa lako mai ko Jeremaia vei Kitaliya na luve i Eiikami ki Misipa; a sa tiko kaya kei ira na tamata era vo tiko e na vanua.

⁷ Ia ni sa rogoca ko ira kece na turaga ni valu era tiko e vanua, kei na nodra tamata, ni sa lesi Kitaliya na luve i Eiikami ko tui Papiloni me lewa na vanua, ka sa soli ira na tagane, kei na alewa, kei na gone, kei ira e so na kaisi ni vanua, era sa sega ni kauti tani ki Papiloni, me vakaraica ko koya;

⁸ era sa qai lako mai vei Kitaliya ki Misipa, io ko Isimeeli na luve i Nicaniya, kei Yoanani kei Jonacani koi rau na luve i Karea, kei Siraya na luve i Tanumeci, kei iratou na luve i Efei na kai Nitofa, kei Yisaniya na luvena e dua na luve i Meeka, o ira kei na nodra tamata.

⁹ A sa vosavavakini vei ira ko Kitaliya na luve i Eiikami na luve i Safani, vei ira talega na nodra tamata, ka kaya, Dou kakua ni rere ni qaravi ira na kai Kalitea: dou tiko ga e na vanua, ka qaravi tui Papiloni, dou na qai vinaka kina:

¹⁰ ia koi au, raica, kaʼu na tiko ga e Misipa, me qaravi ira na kai Kalitea, era na lakovi keda mai: ia koi kemudou, dou kumuna na waini, kei na vuata matua, kei na waiwai, ka tugana ki na nomudou saqa, ka tiko ga e na nomudou veikoro dou sa taura.

¹¹ Ia ko ira kece na kai Jutia mai Moapi, vei ira talega na luve i Amoni, mai Itomi talega,, kei ira mai na veivanua kece, ni ra sa rogoca ni sa vakalaiva tu yani ko tui Papiloni na kedra vo ni Juta, ka sa lesi Kitaliya na luve i Eiikami na luve i Safani, me lewai ira;

¹² io, era sa qai lesu kece mai na kai Jutia mai na veiyasana kecega era sa dui vakasevi kina, a ra sa lako mai ki na vanua ko Juta, vei Kitaliya, ki Misipa, a ra sa kumuna na waini, kei na vuata matua, na ka levu sara.

¹³ Ia ko Yoanani na luve i Karea, kei ira kece na turaga ni valu mai colo, era sa lako mai vei Kitaliya ki Misipa,

¹⁴ a ra sa kaya vua, O sa kila dina, se segai, ni sai Pealisi na nodra tui na luve i Amoni sa talai Isimeeli mai na luve i Nicaniya me vakamatei iko? A sa sega ni vakadinati ira ko Kitaliya na luve i Eiikami.

¹⁵ Ia ko Yoanani na luve i Karea sa qai vosa vakavuni mai vei Kitaliya e Misipa, ka kaya, Meʼu lako mada, meʼu vakamatei Isimeeli na luve i Nicaniya, ia ena sega na tamata e kila: me vakamatei iko mei cavai ko koya, me ra veiseyaki kina na kai Jutia era sa soqoni mai vei iko, ka rusa na vo ni Juta?

¹⁶ A sa kaya ko Kitaliya na luve i Eiikami vei Yoanani na luve i Karea, Mo kakua ni cakava na ka o qo: ni sa ka lasu ko sa tukuna e na vuku i Isimeeli.