Jeremaia 4 - AI VOLA TABU

A Kalou, sa kacivi ira na Isireli me veivutuni, me ra vinaka kina, 1, 2. Sa vakaroti ira na Juta me veivutuni, ni sa kolai yacovi ira na ca levu, 3-18. Sa tagicaki na nodra ka rarawa na Juta, 19-31.

¹ KEVAKA ko na lesu mai, Isireli, sa kaya ko Jiova, mo lesu mai vei au: ia kevaka ko na biuta tani na nomu ka vakasisila e mataqu, o na qai sega ni lako tani:

² ia ko na ia na vosavavakini, Sa bula ko Jiova, ka ia e na lomadina, kei na yalododonu, kei na cakacaka dodonu; ia era na vosavakalougatataki ira e na vukuna ko ira na lewe ni veimatanitu, o koya talega era na vakacaucautaka.

³ Ni sa vosa vakaoqo ko Jiova vei ira na kai Juta kei Jerusalemi, Dou taura na nomudou qalau, ia dou kakua ni kaburaka na sila ki na veiwa-votovotoa.

⁴ Dou cilivi kemudou me nei Jiova, ka kauta tani na vuso ni yalomudou, oi kemudou na kai Juta kei na lewe ni Jerusalemi: de lako yani me vaka na buka na noqu cudru, ka waqa me sega e dua e bokoca, e na vuku ni kena ca ni nomudoui valavala.

⁵ Dou tukuna mai Juta, ka vakarogotaka mai Jerusalemi; ka kaya, Dou uvuca na davui e na vanua: dou kaci yani, dou soqoni vata, ka kaya, Dou soqoni vata mai, me da laʼki curuma na veikoro kaukauwa.

⁶ Dou vakaduria na rogele kivakaki Saioni: dou dro, kakua ni berabera: ni sa ka ca kaʼu na vakayacora mai na tokalau, ia na veivakarusai levu.

⁷ Sa lako cake mai na laioni mai na nona veikau, ia ko koya sa dauvakacacana na veimatanitu sa lako tu mai; sa lako cake mai na nona yasana me vakalalataka na nomu vanua; na nomu veikoro ena vakalalataki, me sega e tiko kina.

⁸ E na vuku ni ka o qo dou vauca vei kemudou nai sulu taqarotu, dou tagi i ka qoqolou: ni sa sega ni saumaki tani na cudru waqawaqa i Jiova vei keda.

⁹ Ia ena yaco e na siga ko ya, sa kaya ko Jiova, ena waicala na yalona na tui, kei na yalodra na turaga; a ra na kidacala ko ira na bete, ia na parofita era na kidroa.

¹⁰ Au a qai kaya, Ule, Turaga Jiova! e dina ko sa vakacalai ira vakalevu na tamata o qo, kei Jerusalemi, ni ko a kaya, Dou na tiko vakacegu; ia ka sa lau ki na vu ni yalo nai seleiwau.

¹¹ E na gauna ko ya ena tukuni vei ira na tamata o qo, kei Jerusalemi, E dua na cagi todra sa liwa mai na veitikina cecere ni veikau, kivakaki na gonealewa ni noqu tamata, ka sega me iriva na sila, se vakasavasavataka,

¹² io sa dua na cagi kaukauwa mai na veiyasana ko ya, ena lako mai vei au: ia koi au talega kaʼu na qai ia na vosa veilewai vei ira.

¹³ Raica, ena lako mai ko koya me vaka na o, ka vaka na covulaca na nona vale-vodoki: sa totolo na nona ose ka bera na ikeli. Ule koi keda! ni da sa vakarusai.

¹⁴ Mo vuya tani na ca mai na lomamu, Jerusalemi, mo bula kina. A cava na kena dede me na tiko e lomamu na nanuma tawa yaga?

¹⁵ Ni sa dua mai na domo sa tukutuku mai Tani, a sa vakarogotaka na ka rarawa mai na ulu-ni-vanua ko Ifireimi.

¹⁶ Dou vakananumi ira na veimatanitu; raica, vakarogotaka ki Jerusalemi, ni ra sa lako mai nai valui vakatawa mai na vanua vakayawa, a ra na ia na veibolebolei ki na veikoro vaka-Juta.

¹⁷ Me vakataki ira nai vakatawa ni were, era na viribaiti koya vakakina; e na vuku ni sa vuki tani vei au, sa kaya ko Jiova.

¹⁸ A nomui valavala kei na nomu cakacaka sa vakayacora na ka o qo vei iko; na ka o qo na nomu caka ca ga, ni sa gaga, ni sa lau sara ki na vu ni yalomu.

¹⁹ Na ketequ, na ketequ! sa sautaribariba na vu ni lomaqu; sa kudrukudru na yaloqu e lomaqu; au sa sega ni galu rawa, ni ko sa rogoca, yaloqu, na domo ni davui, na kaila ni valu.

²⁰ Na veivakarusai e tarava na veivakarusai sa kacivaki; ni sa vakacacani na vanua taucoko: sa vakasauri na kedra vakacacani na noqu vale malo, ka vakidacala na noqu gatu.

²¹ A cava na kena dede meʼu raica tiko na drotini, ka rogoca tiko na domo ni davui?

²² Ni ra sa lialia na noqu tamata, era sa sega ni kilai au, era sa gone sesewa, a sa sega na vuku vei ira: era sa vuku ni valavala ca, ia me caka vinaka sa sega na nodra vuku kina.

²³ Au a raici vuravura, ka, raica, sa sega ni vakarautaki, a sa lala tu, kei na lomalagi, a sa sega na kena rarama.

²⁴ Au a raica na veiulu-ni-vanua, ka, raica, sa sautaninini, a sa yavavala vakamamada na veiulu-ni-koro kecega.

²⁵ Au a vakararai, ka, raica, sa sega na tamata, a sa dro na manumanu ni lomalagi kecega.

²⁶ Au a vakararai, ka, raica, sa lekutu na veiwere bulabula, ia na kena veikoro kecega sa basuki sobu mai na mata i Jiova, mai na mata ni nona cudru waqawaqa.

²⁷ Ni sa vakaoqo na vosa i Jiova, Ena lala na vanua taucoko; ia kaʼu na sega ni vakaotia sara.

²⁸ E na vuku ni ka o qo ena tagi kina ko vuravura, ka loaloa mai na lomalagi ecake: niʼu sa vosataka, niʼu a nakita, niʼu na sega ni veivutunitaka, niʼu na sega talega ni suka tani maikina.

²⁹ E na vuku ni domodra era vodo e na ose kei ira era vakadakai ena dro kina na koro taucoko; era na lako ki loma ni veikau, ka kaba cake ki na vatu: ena biu na veikoro kecega, ena sega ni tiko kina e dua na tamata.

³⁰ Ia ni ko sa vakacacani, a cava mo qai cakava? Kevaka ko sa vakaisulutaki iko e na ka damudamu, kevaka ko sa vakaiukuukutaki iko e nai uku koula, kevaka ko sa qumuta na matamu me kaca sara, ena sega ga ni yaga na nomu vakama-tavinakataki iko; era na beci iko ga na nomui tau, era na qarai iko me ra vakamatea.

³¹ Ni sa vaka na domo ni alewa sa taratara kaʼu sa rogoca, ka vaka na yaluma i koya sa vakasucuma na nona ulumatua, na domona na gonealewa ni Saioni, ni sa tagicaki koya vakai koya, ni sa dodoka na ligana, ka kaya, Ule koi au o qo! ni sa oca na yaloqu e na vukudra na daulaba!