Jeremaia 37 - AI VOLA TABU

Sa lako yani nai valu ni kai Kalitea, ni ra rogoca, ni sa lako mai nai valu mai Ijipita, a sa qai talaki ko Sitikiya ki Jeremaia me masulaka na lewe ni vanua, 1-5, parofisaitaka ko Jeremaia na nodra lako tale mai nai valu ni kai Kalitea, me kabai Jerusalemi, ka raica, 6-10. Ni dro ko Jeremaia, sa tauri, ka yaviti, ka vakacurumi ki na vale ni veivesu, 11-15. Sa vakadinadina rei Sitikiya ni na vakabobulataki koya ko tui Papiloni, 16, 17. Ni sa vakamamasu ko Jeremaia vua na tui, sa vakarorogo vua e na ka e so e masuta, 18-21.

¹ A SA buli me tui ko Sitikiya na luve i Josaia nai sosomi kei Koniya na luve i Jioiakimi, o koya ka lesia ko Nipukatinesari me tui e na vanua ko Juta.

² Ia era sa sega ni vakarorogo, se ko koya, se ko ira na nona tamata, se ko ira na lewe ni vanua, ki na vosa i Jiova, a ya sa vosataka e na gusu i Jeremaia na parofita.

³ Ia ko Sitikiya na tui sa talai Yiukali na luve i Selemiya kei Sifaniya na luve i Meeseya na bote vei Jeremaia na parofita, me kaya, Mo masulaki keda mada vei Jiova na noda Kalou.

⁴ Ia ko Jeremaia sa veicuruyaki tiko kei ira na tamata: ni ra sa sega ni vakacurumi koya ki na vale ni veivesu.

⁵ Ia nai valu i Fero sa qai lako tu mai Ijipita: a sa rogoca ko ira na kai Kalitea era buku na druadrua ni koro mai Jerusalemi na kedrai rogorogo, a ra sa lako cake tani e Jerusalemi.

⁶ Sa qai yaco mai na vosa i Jiova vei Jeremaia na parofita, ka vaka,

⁷ Sa vosa vakaoqo ko Jiova, na Kalou nei Isireli; Dou vosa vakaoqo vei tui Juta, o koya ka talai kemudou vei au me mai tarogi au; Raica, nai valu i Fero e sa lako mai me vukei kemudou, ena lesu tale ki Ijipita ki na nodra vanua.

⁸ A ra na lesu mai na kai Kalitea, ka veivala kei na koro o qo, ka rawa, ka vakama e na buka.

⁹ Sa vosa vakaoqo ko Jiova; Dou kakua ni vakacalai kemudou, ka kaya, Era na lako vakaidina tani vei keda ko ira na kai Kalitea: ni ra na sega ni lako tani.

¹⁰ Ia ke dou sa yavita nai valu kecega ni kai Kalitea era veivala kei kemudou, me kedra vo ga na tamata e vuetaki, ke ra na dui tu cake ga na tamata yadua mai na nona vale malo, ka vakama na koro o qo e na buka.

¹¹ A SA yaco, ni sa cavu tani nai valu ni kai Kalitea mai Jerusalemi e na vuku ni valu i Fero,

¹² sa qai lako tani mai Jerusalemi ko Jeremaia me lako ki na vanua ko Penijamini, me takali tani ko koya maivei ira na tamata.

¹³ Ia ni sa yaco ko koya ki na matamata-ni-koro i Penijamini, sa tiko maikea e dua na turaga ni valu ei vakatawa, na yacana ko Iriyai, na luve i Selemiya, na luve i Eneniya; a sa tauri Jeremaia na parofita, ka kaya, O sa vuki vei ira na kai Kalitea.

¹⁴ A sa kaya ko Jeremaia, Sa lasu; au sa sega ni vuki vei ira na kai Kalitea. A sa sega ni vakadinati koya: a sa tauri Jeremaia ko Iriyai, ka kauti koya vei ira na turaga.

¹⁵ A ra sa cudru na turaga vei Jeremaia, ka yaviti koya, ka vakacurumi koya ki ni vale ni veivesu e na vale i Jonacani na vu-ni-vola: ni sa ka ko ya era sa cakava me vale ni veivesu.

¹⁶ Ia ni sa curu ko Jeremaia ki na vale ni keli, kei na veiqara, ka sa tiko maikina ko Jeremaia ka bogi vuqa:

¹⁷ sa qai talaki ko Sitikiya na tui, ka kauti koya tani mai: a sa tarogi koya vakavuni na tui e nona vale, ka kaya, Sa dua li na vosa maivei Jiova? A sa kaya ko Jeremaia, Sa dua kina: a sa vaka, O na soli ki na liga i tui Papiloni.

¹⁸ A sa baki kaya tale ko Jeremaia vei Sitikiya na tui, A cava na ka kaʼu sa cala kina vei iko, se vei ira na nomui talatala, se vei ira na tamata o qo, ni dou sa vakacurumi au ki na vale ni veivesu?

¹⁹ Ia sa qai evei na nomudou parofita era sa ia na parofisai vei kemudou, ka kaya, Ena sega ni lako mai na tui Papiloni me veivala kei kemudou, kei na vanua o qo?

²⁰ Ia o qo mo rogoca mada, noqu turaga na tui; me donu mada na noqu vakamamasu e matamu; mo kakua ni vakasukataki au ki na vale i Jonacani na vu-ni-vola, deʼu mate maikina.

²¹ Sa qai vosa ko Sitikiya na tui me ra kauti Jeremaia ki na lomanibai ni vale ni veivesu, ka solia vua e dua nai buli madrai e na veisiga mai nodra tiki ni koro na dauvavi-madrai, ka me oti sara mada na madrai e na koro. A sa tiko ga ko Jeremaia e na lomanibai ni vale ni veivesu.