Jeremaia 36 - AI VOLA TABU

O Jeremaia, sa vakaroti Paruki me vola na kedra parofisai na kai Jutia, ka wilika vei ira na lewe ni vanua, 1-10. Ni ra rogoca na kenai rogo na turaga, era talai Yiuti me lakova, ka mai wilika, 11-18. Era sa qai vosa vei Paruki me rau laʼki vunitaki rau kei Jeremaia, 19. O Jioiakimi na tui, ni sa rogoca e so na tiki ni parofisai, ni sa wiliki vua, sa vakama nai vola, 20-26. Sa tukuna ko Jeremaia na lewa ni Kalou e na ruku i Jioiakimi, 27-31. A m vola tale ko Paruki na parofisai i Jeremaia, 32.

¹ IA e na kenai kava ni yabaki i Jioiakimi na luve i Josaia na tui Juta, sa yaco na vosa o qo vei Jeremaia maivei Jiova, ka vaka,

² Mo kauta vei iko e dua nai vola vivigi, ka vola kina na vosa kecega kaʼu sa tukuna vei iko e na vukudra na Isireli, kei na Juta, kei na veimatanitu kecega, mai na siga kaʼu a vosa kina vei iko, io mai na gauna i Josaia, ka yaco mai ki na siga o qo.

³ Era na rogoca beka ko ira na mataqali i Juta na ca kecega kaʼu sa nakita me cakava vei ira; me ra dui lesu yadua mai na nona sala ca; ia meʼu kakua kina ni cudruva na nodra caka cala kei na nodrai valavala ca.

⁴ Ia ko Jeremaia, sa kacivi Paruki na luve i Neriya: a sa vola ko Paruki mai na gusu i Jeremaia na vosa i Jiova kecega, sa vosataka vua, ki nai vola vivigi.

⁵ A sa vakaroti Paruki ko Jeremaia, ka kaya, Au sa sogolati tu; au sa sega ni lako rawa ki na vale i Jiova:

⁶ ia mo lako ko iko, ka wilika mai nai vola vivigi, ko sa vola mai na gusuqu, na vosa i Jiova e daligadra na tamata e na vale i Jiova e na siga ni lolo: ia mo wilika talega e daligadra na kai Juta kecega era sa lako mai na nodra veikoro.

⁷ Eia na via tauca beka na nodra vakamamasu e na mata i Jiova, ka dui lesu yadua mai na nona sala ca: ni sa levu na cudru kei na lesa sa cavuta ko Jiova me kedra na tamata o qo.

⁸ A sa cakava ko Paruki na luve i Neriya me vaka na ka kecega sa vakarota vua ko Jeremaia na parofita, a sa wilika mai nai vola na vosa ni Kalou e na vale i Jiova.

⁹ A sa yaco e nai kalima ni yabaki i Jioiakimi na luve i Josaia na tui Juta, e nai kaciwa ni vula, era sa kacivaka na lolo e na mata i Jiova vei ira kece na tamata mai Jerusalemi, kei ira kece na tamata era lako mai na veikoro vaka-Juta ki Jerusalemi.

¹⁰ A sa wilika ko Paruki mai nai vola na vosa i Jeremaia e na vale i Jiova, e na tiki ni vale ecake sa nei Kimariya na luve i Safani na vu-ni-vola, e na lomanibai ecake, e na mata ni katuba vou ni vale i Jiova, e daligadra na tamata kecega.

¹¹ Ia ni sa rogoca ko Mikaya na luve i Kimariya, na luve i Safani, na vosa i Jiova kecega mai nai vola,

¹² sa lako sobu ko koya ki na vale ni tui, ki na nona tikina na vu-ni-vola: ka, raica, sa tiko maikea ko ira kece na turaga, ko Ilisama na vu-ni-vola, kei Tilaya na luve i Simeaya, kei Elinacani na luve i Akipori, kei Kimariya na luve i Safani, kei Sitikiya na luve i Eneniya, kei ira kece na turaga.

¹³ A sa tukuna vei ira ko Mikaya na vosa kecega sa rogoca ko koya, ni sa wilika mai nai vola ko Paruki e daligadra na tamata.

¹⁴ Ia ko ira kece na turaga era sa talai Yiuti na luve i Nicaniya, na luve i Selemiya, na luve i Kusi, vei Paruki, me kaya, Nai vola vivigi ko sa wilika maikina e daligadra na tamata, mo taura ga e ligamu, ka mai lako yani. A sa taura ko Paruki na luve i Neriya nai vola vivigi e na ligana, a sa lako mai vei ira.

¹⁵ A ra sa kaya vua, Mo tiko sobu mada, ka wilika e daliga i keitou. A sa wilika ko Paruki e daligadra.

¹⁶ A sa yaco, ni ra sa rogoca na vosa kecega, era sa dui rere na tamata yadua, ka kaya vei Paruki, Keitou na tukuna vakaidina ga vua na tui na vosa kece o qo.

¹⁷ A ra sa tarogi Paruki, ka kaya, Tukuna mada vei keitou, Se ko sa vola vakaevei na vosa kece o qo mai na gusuna?

¹⁸ A sa kaya vei ira ko Paruki, Sa cavuta vei au ko koya e gusuna na vosa kece o qo, ia kaʼu sa vola ki nai vola e na wai ni volavola.

¹⁹ A ra sa kaya na turaga vei Paruki, Lako, mo drau laʼki vunitaki kemudrau mada kei Jeremaia; ia me kakua e dua na tamata e kila se kemudrau sa tiko maivei.

²⁰ A ra sa laʼki curu yani vua na tui ki na lomanibai, ia nai vola vivigi era sa maroroya ga e na tiki ni vale ecake nei Ilisama na vu-ni-vola, a ra sa tukuna e daligana na tui na vosa kecega o qori.

²¹ A sa talai Yiuti na tui me laʼki kauta mai nai vola vivigi: a sa laʼki kauta mai ko koya mai na tiki ni vale nei Ilisama na vu-ni-vola. A sa wilika ko Yiuti e daligana na tui, e daligadra kece talega na turaga era tu e na mata ni tui.

²² Ia na tui, sa tiko ga e na vale ni vula i liliwa e nai kaciwa ni vula: a sa dua na miqa e matana ka waqa tu.

²³ A sa yaco, ni sa wilika oti ko Yiuti e tolu se va na gauna, sa seleva ko koya na tui e nai sele ni dauvolavola, ka biuta ki na buka e na miqa sa waqa tu, ka me yavu saraʼni nai vola vivigi e na buka sa tu e na miqa.

²⁴ A ra sa tawa rere, se dresuka na nodrai sulu, se ko koya na tui, se dua vei ira na nonai talatala era rogoca na vosa o qo.

²⁵ Ia ko iratou ga ko Elinacani kei Tilaya kei Kimariya, eratou sa vakamasuta na tui me kakua ni vakama nai vola vivigi: a sa bese ni rogoci iratou.

²⁶ A sa vosa sara na tui vei iratou ko Yiramieli na luve i Ameleki, kei Siraya na luve i Asirieli, kei Selemiya na luve i Apitieli, me tauri Paruki na vu-ni-vola kei Jeremaia na parofita: a sa vunitaki rau ko Jiova.

²⁷ Sa qai yaco na vosa i Jiova vei Jeremaia, ni sa vakama oti na tui nai vola vivigi kei na vosa sa vola ko Paruki mai na gusu i Jeremaia, ka vaka,

²⁸ Mo baki kauta tale vei iko e dua tale nai vola vivigi, ka vola kina na vosa eliu kecega ka tu e nai vola vivigi eliu, o qori ka vakama ko Jioiakimi na tui Juta.

²⁹ Ia vei Jioiakimi na tui Juta mo kaya, Sa vosa vakaoqo ko Jiova; O iko, ko sa vakama nai vola o qori, ka sa kaya, A cava ko sa vola maikina, ka kaya, Ena lako vakaidina mai ko tui Papiloni ka vakarusa na vanua o qo, ka vakaotia tani maikina na tamata kei na manumanu?

³⁰ O koya o qo sa vosa vakaoqo kina ko Jiova e na vuku i Jioiakimi na tui Juta; Ena sega e dua mai vua me tiko e nai tikotiko vakaturaga i Tevita: ia na yagona mate ena biu tu ga ki na katakata e na siga, kei na liliwa e na bogi.

³¹ Ia kaʼu na sauma vua vei ira talega na nona kawa kei ira na nona tamata na nodrai valavala ca; ia kaʼu na vakayacora vei ira, kei ira na lewe i Jerusalemi, kei ira na kai Juta, na ca kecega kaʼu sa vosataka vei ira; a ra sa tawa vakarorogo.

³² Ia ko Jeremaia sa taura e dua tani tale nai vola vivigi, a sa solia vei Paruki na vu-ni-vola, na luve i Neriya: a sa vola kina mai na gusu i Jeremaia na vosa ni vola kecega sa vakama ko Jioiakimi na tui Juta e na buka: a sa vakaikuritaki tale e na vosa e vuqa talega e vakakina.