Jeremaia 34 - AI VOLA TABU

O Jeremaia, sa parofisaitaka na veivakabobulataki i Sitikiya kei na koro, 1-7. O ira na turaga kei na lewe ni vanua era sa sereki ira na nodra tamata era bobula, ia ni sa lako tani nai valu vei ira, era sa qai vakabobulataki ira tale, 8-11. E na vuku ni ka o qo sa vosa kina na Kalou me lako tale mai na meca me vakabobulataki ira, 12-22.

¹ A VOSA sa yaco vei Jeremaia maivei Jiova, ia ko Nipukatinesari na tui Papiloni, kei na nonai valu kecega, kei na veiqali kece e vuravura ni nona matanitu, kei ira kece na tamata, era sa veivaluti tiko kei Jerusalemi, kei na kena Veikoro kece, a sa vakane,

² Sa vosa vakaoqo ko Jiova, na Kalou nei Isireli; Mo laʼki vosa vei Sitikiya na tui Juta, ka tukuna vua, Sa vosa vakaoqo ko Jiova; Raica, au na solia na koro o qo ki na liga i tui Papiloni, ia ena vakama e na buka:

³ ia ko iko, ko na tawa dro rawa tani mai na ligana, o na tauri vakaidina ga, ka soli ki ligana; ia na matamu, ena raica na mata i tui Papiloni, kei na gusuna, ena vosa ki na gusumu, ia ko na yaco ga ki Papiloni.

⁴ Ia mo rogoca na vosa i Jiova, Sitikiya na tui Juta, Sa vosa vakaoqo ko Jiova vei iko, O na sega ni mate e nai seleiwau:

⁵ o na mate ga e na vinaka: ia na kama, sa kedrai loloku na nomu qase, era tui eliu ka tarava ko iko, era na vakama vakakina me kemui loloku; a ra na tagicaki iko, ka kaya, Ule turaga! ia na kena vosa kaʼu sa cavuta koi au, sa kaya ko Jiova.

⁶ A sa tukuna ko Jeremaia na parofita vei Sitikiya na tui Juta na vosa kecega o qo e Jerusalemi:

⁷ ia nai valu i tui Papiloni sa veivala tiko kei Jerusalemi, kei na Veikoro vaka-Juta kecega sa vo, kei Lakisi kei Aseka: ni sa kena vo o qo ni koro vaka-Juta sa koro kaukauwa tu.

⁸ O QO na vosa sa yaco vei Jeremaia maivei Jiova, ni sa cakava oti ko Sitikiya na tui na veiyalayalati kei ira na tamata kecega mai Jerusalemi, me vunautaka na veisere vei ira;

⁹ ia me ra dui vakatala yadua na nona tagane, ka yadua na nona vada erau sa Iperiu, me lako wale yani; me kakua e dua me sa qaravi tiko vua e dua vei ira sa kai Jutia ka wekana.

¹⁰ Ia ni ra sa rogoca ko ira kece na turaga, kei ira kece na tamata, era sa ia oti na veiyalayalati, me dui vakatala yadua na nona tagane, ka yadua na nona vada, me lako wale yani, me kakua e dua me sa qaravi tiko vei ira e so, era sa qai talairawarawa, ka vakatalai ira yani.

¹¹ Ia ka oti, era sa saumaki, ka kauti ira tale mai na tagane kei na vada, era sa vakatala me lako wale, a ra sa vakabobulataki ira tale me ra nodra tagane kei na nodra vada.

¹² O koya o qo sa yaco kina na vosa i Jiova vei Jeremaia, ka vaka,

¹³ Sa vosa vakaoqo ko Jiova, na Kalou nei Isireli; Oi au kaʼu a cakava na veiyalayalati kei ira na nomudou qase e na siga kaʼu a kauti ira tani mai na vanua ko Ijipita, mai na vale ni bobula, ka vaka,

¹⁴ Ni sa oti na yabaki e vitu dou dui vakatala yani na wekana sa Iperiu, ka sa volitaki vei iko; ia ni sa qaravi iko ka ono na yabaki, mo qai vakatalai koya me lako wale tani yani vei iko: a ra sa sega ni vakarorogo vei au ko ira na nomudou qase, se vakatu daliga mai.

¹⁵ Ia koi kemudou dou sa qai saumaki edaidai, ka sa cakava na ka dodonu e mataqu, ni dou sa dui tukuna yadua na veisere vua na kai nona; dou a ia talega na veiyalayalati e mataqu e na vale sa vakatokai e na yacaqu:

¹⁶ ia ka dou sa qai vuki tale ka vakacacataka na yacaqu, ka sa dui kauta yadua tale mai na nona tagane, ka yadua na nona vada, o ira dou a vakatala yani me veitalia tiko, ka sa vakabobulataki ira tale, me ra nomudou tagane kei na nomudou vada.

¹⁷ O koya o qo sa vosa vakaoqo kina ko Jiova; Oi kemudou, dou sa sega ni vakarorogo vei au, me dui tukuna yadua na veisere vua na wekana, ka yadua vua na kai nona: raica, au sa tukuna vei kemudou na veisereki, sa kaya ko Jiova, ki nai seleiwau, kei na mate dauveitauvi, kei na viakana, ia kaʼu na soli kemudou mo dou kauti tani ki na veimatanitu kece kei vuravura.

¹⁸ Ia kaʼu na soli ira na tamata era sa lako vakatani mai na noqu veiyalayalati, ka sega ni vakayacora na vosa ni veiyalayalati era sa cakava e mataqu, ni ra a tawasea rua na luve ni karavau, ka lako yani e na maliwa ni tikina,

¹⁹ io ko ira na turaga ni Juta, kei na turaga ni Jerusalemi, na matanivanua, kei na bete, kei ira kece na lewe ni vanua, era a lako yani e na maliwa ni tiki ni luve ni karavau;

²⁰ ia kaʼu na soli ira ki na liga ni nodra meca, kei na ligadra era sa qarai ira me vakamatea: ia na yagodra mate ena yaco me kedra na manumanu ni lomalagi, kei na manumanu ni vanua.

²¹ Ia ko Sitikiya na tui Juta kei ira na kena turaga, kaʼu na soli ira ki na liga ni nodra meca, kei na ligadra era qarai ira me vakamatea, io ki na liga ni valu i tui Papiloni, sa lako cake tani vei kemudou.

²² Raica, au na vakarota, sa kaya ko Jiova, ka vakalesui ira tale mai ki na koro o qo; a ra na mai kaba, ka rawa, ka vakama e na buka: ia na veikoro vaka-Juta kaʼu na vakalalataka, me sega e tiko kina.