Jeremaia 33 - AI VOLA TABU

Sa yalataka na Kalou vei ira era vakabobulataki na lesu tale mai, kei na tiko dei e na nodra vanua, 1-14. Sa tukuni koya na Mesaia, na Coke ni yalododonu; kei na nona matanitu, kei na nona lesi me bete tawa mudu; kei na lewe ni nona matanitu, ni ra na kalougata sara, 15-26.

¹ A SA yaco tale na vosa i Jiova vei Jeremaia ka vakarua, ia sa sogoti tiko ko koya e na lomanibai ni vale ni veivesu, a sa vaka,

² Sa vosa vakaoqo ko Jiova o koya sa cakava na koro o qo, io ko Jiova o koya sa bulia, me vakataudeitaka; o Jiova na yacana;

³ Mo kaci mai vei au, kaʼu na rogo yani vei iko, ka vakatakila vei iko na ka levu ka dredre ni kilai, a ya ko sa sega ni kila.

⁴ Ni sa vosa vakaoqo ko Jiova, na Kalou nei Isireli, e na vuku ni veivale ni koro o qo, kei na veivale i tui Juta, a ya sa basuki sobu e na suva kei na matau;

⁵ Era sa curu yani me veivaluti kei ira na kai Kalitea, ka me ra vakasinaita na veivale o qo e na yago ni tamata, o ira kaʼu sa vakamatea e na noqu cudru kei na noqu lesa, e na vuku ni ka kaʼu sa vunia kina na mataqu mai na koro o qo, io na nodrai valavala ca kecega.

⁶ Raica, au na vakayacora vua na mavomavo kei na bula, ia kaʼu na vakabulai ira, ka vakaraitaka vei ira na vutu ni sautu kei na dina.

⁷ Ia kaʼu na kauti ira tale mai na Juta era vakabobulataki kei ira na Isireli era vakabobulataki, ia kaʼu na tarai ira, me vaka eliu:

⁸ kaʼu na vakasavasavataki ira talega mai na nodra caka cala kecega, era sai valavala ca kina vei au; ia kaʼu na bokoca na nodra caka cala kecega, erai valavala ca ka talaidredre kina vei au.

⁹ Ia ena yaco me noqu kina na yaca rogo e marautaki, ka vakavinavinakataki, ka vakarokorokotaki, e na veimatanitu kece e vuravura, era na rogoca na ka vinaka kece kaʼu sa cakava vei ira: a ra na rere ka sautaninini e na vuku ni ka vinaka kecega kei na vuku ni sautu kecega kaʼu sa vakayacora kina.

¹⁰ Sa vosa vakaoqo ko Jiova; Ena rogoci tale e na yasana o qo, a ya dou sa kaya e na vukuna, Sa lala ga ka sega na tamata se na manumanu, io e na veikoro vaka-Juta, kei na sala ni koro ko Jerusalemi, e sa lala ga, ka sega na tamata, se na manumanu,

¹¹ na domo ni reki, kei na domo ni marau, na domo ni tagane kei na domo ni alewa, sa qai vakawati; na domodra era sa kaya, Dou vakavinavinaka vei Jiova ni lewe vuqa: ni sa yalovinaka ko Jiova; ni sa tawa mudu na nona loloma: kei na domodra talega era sa kauta mai nai madrali ni vakavinavinaka ki na vale i Jiova. Niʼu na kauta tale mai na lewe ni vanua sa vakabobulataki, me sa vaka eliu, sa kaya ko Jiova.

¹² Sa vosa vakaoqo ko Jiova ni lewe vuqa; Ena dua tale e na yasana o qo, e sa lala ga ka sega na tamata se na manumanu, e na kena veikoro kece talega, io e dua na nodrai tikotiko nai vakatawa era na vakotora kina na qele ni sipi.

¹³ E na Veikoro mai na veiulu-ni-vanua, kei na veikoro mai na buca, kei na veikoro mai na mata ni ceva, kei na vanua i Penijamini, kei na yasayasa vaka-Jerusalemi, kei na Veikoro vaka-Juta, ena lako voli tale yani kina na qele ni sipi e na ruku ni liga i koya sa wilika, sa kaya ko Jiova.

¹⁴ Raica, ena yaco na gauna, sa kaya ko Jiova, kaʼu na vakayacora kina na ka vinaka ko ya kaʼu sa yalata ki na mataqali i Isireli, kei na mataqali i Juta.

¹⁵ E na veisiga ko ya, kei na gauna ko ya, kaʼu na vakatubura kina vei Tevita na Coke yalododonu; ia ena cakava ko koya na lewa dodonu kei na cakacaka dodonu e na vanua.

¹⁶ E na veisiga ko ya, ena vakabulai ko Juta, ia ko Jerusalemi, ena tiko vinaka ga: ia o qo na yacana ena vakatokai kina, Ko Jiova na noda yalododonu.

¹⁷ Ni sa vosa vakaoqo ko Jiova; Ena sega ni yali vei Tevita e dua na tagane me tiko e nai tikotiko vakaturaga ni mataqali i Isireli;

¹⁸ o ira talega na bete na luve i Levi, ena sega ni yali vei ira e dua na tagane me tiko e mataqu me vakacabora nai soro kama, ka vakacaudreva nai madrali laukana, ka cakava tiko nai soro e na veisiga.

¹⁹ A sa yaco na vosa i Jiova vei Jeremaia, ka vaka,

²⁰ Sa vosa vakaoqo ko Jiova; Kevaka dou sa vakacacataka rawa na noqu veiyalayalati e na vuku ni siga, kei na noqu veiyalayalati e na vuku ni bogi, me kakua kina na siga kei na bogi e na kena gauna;

²¹ ena qai vakacacataki rawa na veiyalayalati kaʼu sa ia kei Tevita na noqu tamata, me na sega kina na luvena tagane me lewa tiko e nonai tikotiko vakaturaga; kei ira talega na bete na luve i Levi, na noqui talatala.

²² Me vaka sa tawa wiliki rawa na kalokalo kei lomalagi, se vakarauti rawa na nuku ni wasawasa: kaʼu na vakalevutaka vakakina na kawa i Tevita na noqu tamata, kei ira na luve i Levi era sa qaravi au.

²³ A sa yaco talega na vosa i Jiova vei Jeremaia, ka vaka,

²⁴ O sa vakananuma, se segai, na ka era vosataka na tamata o qo, ka kaya, Na mataqali e rua ka digitaka ko Jiova, sa biuta tani ga ko koya? a ra sa beci ira kina na noqu tamata, me ra kakua ni matanitu tiko e matadra.

²⁵ Sa vosa vakaoqo ko Jiova; Ke sa sega na noqu veiyalayalati e na vuku ni siga kei na bogi, ia nai valavala kei lomalagi kei vuravura, keʼu sa sega ni lesia:

²⁶ ke sa qai kawa i Jekope, kei Tevita na noqu tamata, kaʼu na qai biuta tani, meʼu kakua ni kauta na nona kawa me lewai ira na kawa i Eparaama, kei Aisake, kei Jekope: niʼu na kauti ira tale mai era vakabobulataki, ka lomani ira.