Jeremaia 31 - AI VOLA TABU

A nodra lesu tale mai na Isireli, 1-9. Ena rogo sara ki na veivanua, 10-14. Sa tagi ko Rejeli, a sa vakacegui, 15-17. Ni sa veivutuni ko Ifireimi, sa lomani tale, 18-20. Era na lesu mai na Isireli ki na nodra vanua, ka vakalougatataki kina, 21-26. Ena ia na veiyalayalati vou kei ira, 27-34. Ena qai dei nai vavakoso lewe ni soro, 35-37; ka vakalevutaki, 38-40.

¹ E NA gauna ko ya, sa kaya ko Jiova, kaʼu na qai nodra Kalou na veimataqali kecega nei Isireli, ia era na yaco ko ira me noqu tamata.

² Sa vosa vakaoqo ko Jiova, Era sa kune loloma mai na veikau ko ira na tamata era vakavoci mai nai seleiwau, niʼu a laʼki vakacegui ira na Isireli.

³ Sa eliu ka rairai kina vei au ko Jiova; Io, sa loloma tawa mudu ga kaʼu sa lomani iko kina: o koya o qo kaʼu sa vakabalavutaka kina na loloma vei iko:

⁴ au na baki tarai iko tale, ia ko na tara, o iko na gonealewa ni Isireli; o na baki vakaiukuukutaki tale e na nomu lali, ia, ko na bau yani e na nodra meke era ia na marau:

⁵ o na baki tea tale na veivaini e na ulu-ni-vanua mai Samaria: era na tea ko ira na dauteitei, tea kana loa kina.

⁶ Ni na yaco e dua na siga, era na kacivaka kina nai vakatawa mai na ulu-ni-vanua ko Ifireimi, Dou tu cake, me da lako cake ki Saioni vei Jiova na noda Kalou.

⁷ Ni sa vosa vakaoqo ko Jiova; Dou meke e na vuku i Jekope e na marau, ka kaila e na vuku i koya sa liu e na veimatanitu: dou vakarogotaka, dou vakavinavinaka, ka kaya, Mo vakabulai ira, Jiova, na nomu tamata, na Isireli sa vo.

⁸ Raica, au na kauti ira mai na vanua mai na tokalau, ka vakasoqoni ira mai nai yalayala kei vuravura, o ira vata kei na mataboko kei na lokiloki, kei na alewa sa bukete kei koya sa taratara: e dua nai vavakoso levu ena lesu mai kike.

⁹ Era na lako mai ka tagi tu, ia kaʼu na tuberi ira mai ka ra vakamamasu tu: au na vakalakovi ira mai e na bati ni wai drodro e na sala dodonu, era na tawa toqi kina: ni keirau sa veitamani kei Isireli, ia ko Ifireimi, sa noqu ulumatua ko koya.

¹⁰ Dou rogoca na vosa i Jiova, na veimatanitu, ka tukuna yani ki na veiyanuyanu vakayawa, ka kaya, O koya sa vakasevi Isireli ena vakasoqoni koya tale, ka maroroi koya, me vaka nai vakatawa na nona qele ni sipi.

¹¹ Ni sa vakabulai Jekope ko Jiova, ka sa kaliraki koya mai na liga i koya sa kaukauwa vei rau.

¹² 0 koya o qo era na lako mai kina ka meke e na dela-ni-koro ko Saioni, ka drodro vata mai ki na loloma i Jiova, e na vuku ni witi, kei na waini, kei na waiwai, kei na luve ni sipi kei na karavau: ia na yalodra, ena vaka na were sa levu na kena wai; a ra na sega sara ni waicala tale.

¹³ Ena qai marau na gonealewa e na meke, o ira vata talega na cauravou kei na qase: ia kaʼu na vukica na nodra tagi me reki, ka vakacegui ira, ka vakamarautaki ira mai na nodra rarawa.

¹⁴ Ia kaʼu na vakamamautaka na yalodra na bete e na uro, ia na noqu tamata era na mamau e na noqu loloma, sa kaya ko Jiova.

¹⁵ Sa vosa vakaoqo ko Jiova; Sa dua na domo sa rogo mai Rama, na qoqolou, kei na tagi levu; o Rejeli, sa tagicaka na luvena, a sa bese ni vakacegui e na vuku ni luvena, ni ra sa yali.

¹⁶ Sa vosa vakaoqo ko Jiova; Mo kinoca na domomu, me kakua ni tagi; kei na matamu, me kakua ni vakawai: ni na voli ga na nomu cakacaka, sa kaya ko Jiova; ia era na lesu tale mai na vanua ni meca:

¹⁷ ia sa dua na ka mo vakanananu kina e na kenai vakataotioti, sa kaya ko Jiova, ni na lesu tale mai ko ira na luvemu ki na nodrai yalayala.

¹⁸ Au a rogoci Ifireimi vakaidina ni sa tagicaki koya, ka kaya, O sa vakanakuitataki au, ia kaʼu sa vakanakuitataki, me vaka na karavau sa tawa kila yarayara: saumaki au mai, kaʼu na qai saumaki; ni sai iko Jiova na noqu Kalou.

¹⁹ E dina niʼu sa saumaki mai, kaʼu sa qai veivutuni; ia niʼu sa qai kila, kaʼu sa yavita na sagaqu: au sa madua, io kaʼu sa taqaya, e na vuku niʼu sa colata na ka kaʼu sa rogorogo vakaca kina niʼu a cauravou.

²⁰ Sa noqu gone ni toko ko Ifireimi, se segai? sa gone daulomani, se segai? niʼu a sa vosataki koya vakaca, kaʼu sa vakananumi koya matua tikoga: o koya o qo sa yavala kina na ketequ e na vukuna; kaʼu na yalolomani koya sara, sa kaya ko Jiova.

²¹ Mo vakaduria na nomui vakatakilakila ni sala, mo cakava na nomui tuvatuva cecere: mo vakasara na lomamu ki na salatu, na sala ko a lako yani kina: mo lesu mai, na gonealewa ni Isireli, mo lesu mai ki na nomu veikoro o qo.

²² Me cava na kena dede ni nomu dauveilakoyaki tu, o iko na gonealewa dauvuki? ni sa bulia ko Jiova e dua na ka vou e vuravura, Ena rawa na tagane e dua na alewa.

²³ Sa vosa vakaoqo ko Jiova ni lewe vuqa, na Kalou nei Isireli; Era na ia tiko tale na vosa o qo e na vanua ko Juta kei na kena veikoro, niʼu na sa kauti ira tale mai era veivakabobulataki; Me vakalougatataki iko ko Jiova, nai tikotiko ni lewa dodonu, na ulu-ni-vanua tabu.

²⁴ Ia ena tiko ga e Juta dina, kei na kena veikoro kece talega, ko ira sa daucaka were, kei ira era veitokiyaki kei na qele ni sipi.

²⁵ Niʼu sa vakaceguya na yalo i koya sa oca, ia na yalodra kecega sa rarawa kaʼu sa vakamamautaka.

²⁶ Ni sa oti na ka o qo kaʼu a qai yadra, ka vakaraica; ia na noqu moce sa kamikamica vei au.

²⁷ Raica, ena yaco na gauna, sa kaya ko Jiova, kaʼu na kaburaka kina na mataqali nei Isireli kei na mataqali nei Juta e na kawa ni tamata, kei na kawa ni manumanu.

²⁸ Ia ena yaco, me vaka niʼu a yadravi ira, meʼu cavuta, ka basuka sobu, ka talaraka, ka vakarusa, ka vakararawataka; kaʼu na yadravi ira vakakina meʼu tara, ka tea, sa kaya ko Jiova.

²⁹ E na gauna ko ya era na sega ni kaya tale, O ira na qase era sa kania na vua-ni-vaini wiwi, ia na batidra na luvedra sa rara kina.

³⁰ Ni sai ira yadua, era na dui mate ga e na vuku ni dui nona caka cala: na tamata yadua sa kania na vua-ni-vaini wiwi, ena rara ga kina na batina ko koya.

³¹ Raica, ena yaco na gauna, sa kaya ko Jiova, kaʼu na cakava kina kei na mataqali nei Isireli kei na mataqali nei Juta e dua na veiyalayalati vou:

³² ena sega ni vaka na veiyalayalati kaʼu a cakava kei ira na nodra qase e na siga kaʼu a taura kina na ligadra me tuberi ira mai na vanua ko Ijipita; ni ra sa vakacacataka na noqu veiyalayalati ko ya, ia koi au kaʼu sa watidra ga, sa kaya ko Jiova:

³³ ia ka sa vakaoqo na veiyalayalati kaʼu na cakava kei ira na mataqali nei Isireli; Ni sa oti na gauna ko ya, sa kaya ko Jiova, kaʼu na tugana na noqu vunau ki na lomadra, e na yalodra talega kaʼu na vola kina: ia kaʼu na yaco me nodra Kalou, a ra na yaco ko ira me noqu tamata:

³⁴ a ra na sega ni dui veivakavulici tale na tamata kei na kai nona, kei na wekana, ka kaya, Mo kilai Jiova: ni sai ira kece, era na kilai au ga, ko ira sa kaisi kei ira talega sa turaga, sa kaya ko Jiova: niʼu na bokoca na nodra caka cala, ia na nodrai valavala ca kaʼu na sega ni nanuma tale.

³⁵ Sa vosa vakaoqo ko Jiova, o koya sa solia na mata-ni-siga me rarama kei na siga, ka lesia na vula kei na kalokalo me rarama kei na bogi, o koya sa vakaceguya na wasawasa ni sa vadugu na kena biau: o Jiova ni lewe vuqa na yacana:

³⁶ Ke na yali e mataqu nai lesilesi o qo, sa kaya ko Jiova, ke sa qai kawa i Isireli talega me na cegu ni matanitu tiko e mataqu ka tawa mudu.

³⁷ Sa vosa vakaoqo ko Jiova, Ke na vakarauti rawa na lomalagi maicake, ka vakadikevi rawa nai yavu kei vuravura era, ke sai au talega kaʼu na qai biuta tani na kawa i Isireli kecega e na vuku ni ka kece era sa cakava, sa kaya ko Jiova.

³⁸ Raica, ena yaco na gauna, sa kaya ko Jiova, ena tara kina na koro me nei Jiova, mai na vale-cecere i Enaneli ka yacova na matamata-ni-koro mai na tutu-ni-koro.

³⁹ Ia ena yaco tale yani na dali i vakarau me vakadodonu ki na dela-ni-koro ko Karepi, ka yaco voli yani ki Koa.

⁴⁰ Ia na buca kecega ni mate, kei na dravusa, kei na veiwere kecega ka yaco ki na soniwai ko Kitironi, ka yaco sara ki na tutu ni matamata-ni-koro ni ose kivakaki cake, ena tabu me nei Jiova; ena sega ni cavuti cake, se talaraki sobu tale e na dua na gauna.