Jeremaia 30 - AI VOLA TABU

A Kalou, sa vakatakila vei Jeremaia na nodra lesu mai Papiloni na kai Jutia, 1-4. Ena liu na tagi, 5-7, ena muri na bula, 7-11. Era sa vakanakuitataki e na vuku ni nodrai valavala ca, ena vakabulai ira na Kalou e na nona loloma, 12-22. Ia na cudru ni Kalou ena tauci ira sara na tamata ca, 23, 24.

¹ A VOSA sa yaco vei Jeremaia maivei Jiova, ka vaka,

² Sa vosa vakaoqo ko Jiova na Kalou nei Isireli, ka kaya, Mo vola me nomu na vosa kecega kaʼu sa tukuna oti vei iko, e nai vola.

³ Ni sa kaya ko Jiova, Raica, ena yaco mai na gauna kaʼu na kauti ira tale mai kina na noqu tamata na Isireli kei na Juta era vakabobulataki, sa kaya ko Jiova: ia kaʼu na vakalesui ira tale mai ki na vanua kaʼu a solia ki na nodra qase, a ra na taukena.

⁴ Ia o qo na vosa sa tukuna ko Jiova e na vukudra na Isireli kei na Juta.

⁵ Ni sa vosa vakaoqo ko Jiova; A domo ni sautaninini keitou sa rogoca, na domo ni rere, ka sega ni vakacegu.

⁶ Dou veitarogi mada, ka vakaraica se dua na tagane sa taratara? a cava kaʼu sa raica kina na tamata yadua ni sa dui toka na ligana e tolona, me vaka na alewa sa taratara, a sa matacea mai na matadra kecega?

⁷ Ule! ni sa ka levu na siga ko ya, me sega e dua me vakakina: io, sa kena gauna ni rarawa nei Jekope. Ia mai na ka o qo ena vakabulai maikina ko koya:

⁸ ni sa kaya ko Jiova ni lewe vuqa, Ena yaco e na siga ko ya, kaʼu na musuka tani na nonai vua mai na domomu, ia na kemui vesu kaʼu na drutilaka; a ra na sega ni vakasaurarataki koya tiko ko ira na kai tani:

⁹ ia era na qaravi Jiova na nodra Kalou, kei Tevita na nodra tui, o koya kaʼu na vakatubura vei ira.

¹⁰ Ia ko iko, mo kakua ni rere, Jekope na noqu tamata, sa kaya ko Jiova; io kakua ni ko taqaya, Isireli: ni sai au, raica, ena vakabulai iko mai na vanua vakayawa, kei na nomu kawa mai na vanua era sa bobula kina; ia ena lesu mai ko Jekope, me tiko vakacegu ka vinaka, me sega ena vakarerea.

¹¹ Niʼu sa tiko kei iko koi au, sa kaya ko Jiova, me vakabulai iko: niʼu na vakaotia sara na veimatanitu kecega kaʼu sa vakasevi iko kina, ia ko iko, kaʼu na sega ni vakaotia sara: kaʼu na vakanakuitataki iko vakavinaka ga, ia niʼu na sa cudru, kaʼu na sega ni cudruvi iko vakalevu sara.

¹² Ni sa vosa vakaoqo ko Jiova, Sa tawa bula rawa na nomu ramusu, sa ka rarawa sara na nomu vue.

¹³ Sa sega e dua me lewai iko vinaka, mo viviraki: sa sega na kemui botani mo bula kina.

¹⁴ O ira kece ka lomani iko era sa guilecavi iko; era sa sega ni veilakovi kei iko; ni sa vue vakaveimecaki kaʼu sa vuetaki iko kina, e na kuita vakalomaqa, e na vuku ni kena levu ni nomu caka cala: ni sa vuqa mai na nomui valavala ca.

¹⁵ A cava ko sa tagicaka kina na nomu vue? sa tawa malumu rawa na nomu rarawa e na vuku ni kena levu ni nomu caka cala: ni sa vuqa mai na nomui valavala ca, kaʼu sa cakava kina na ka o qo vei iko.

¹⁶ Ia ko ira era tilomi iko era na tilomi; o ira kece talega na nomu meca era na dui laʼki vakabobulataki kecega; o ira sa vakacacani iko era na vakacacani, o ira kece talega sa tokitaki iko, kaʼu na soli ira me tokitaki.

¹⁷ Niʼu na vakamavotaki iko mo bula, ia mai na nomu vue kaʼu na vakabulai iko, sa kaya ko Jiova; ia ko Biu ga na yacamu era a vakatoka vei iko, Sai Saioni o qo, sa sega e dua e lakova.

¹⁸ Sa vosa vakaoqo ko Jiova; Raica, au na vakalesuya tale na nodra vale malo na Jekope ka vakabobulataki; ia na nodrai tikotiko kaʼu na yalololoma kina; ena tara na koro e na kena yavu dina; ia na vale vakaturaga ena toka tale me vaka na kenai valavala:

¹⁹ ena lako yani talega maikina na vakavinavinaka kei na domodra era mamarau: ia kaʼu na vakavuqataki ira, a ra na sega ni lewe lailai; kaʼu na vakalevulevui ira, a ra na sega ni kaisi.

²⁰ A luvedra talega ena vaka eliu; kei na nodrai soqosoqo ena vakataudeitaki e mataqu; ia kaʼu na cudruvi ira kecega era vakasaurarataki ira.

²¹ A nodra turaga talega ena tubu maivei ira: kei koya na nodra tui ena lako mai na kedra maliwa: kaʼu na cakavi koya me toro voleka mai, ia ena toro voleka mai vei au: ni sai cei ko koya o qo sa vinakata na lomana ni torovi au mai? sa kaya ko Jiova.

²² Ia; dou na yaco me noqu tamata, ia koi au kaʼu na yaco me nomudou Kalou.

²³ Raica, na cava i Jiova sa lako yani ka sa cudrucudru, na cava veivakarusai: ki na uludra na tamata ca ena tau tikoga kina.

²⁴ Ena sega ni lesu tale mai na cudru katakata i Jiova, ena cakava mada ga, ka vakayacora dina na ka sa nakita na lomana: ni sa oti na kena gauna, dou na qai vakananuma kina.