Jeremaia 3 - AI VOLA TABU

A yalololoma levu ni Kalou vei ira na Juta, ni ra sa vuki tani oti vua, 1-5. Era sa uasivi cake e na ca vei ira na Isireli, 6-11. Kevaka era veivutuni, era na lomani tale, 12-20. Sa vunauci ko ira na Isireli me veivutuni, a ra sa vakatusa na nodrai valavala ca, 21-25.

¹ SA kainaki, Kevaka e dua na tagane sa biuta na watina, a sa lako tani vua, ka sa yaco me nona na tagane tani, me na lesu tale beka vua ko koya na tagane? ena sega beka ni vakadukadukalitaki sara kina na vanua ko ya? ia ko iko ko sa ia na veitau kei ira e lewe vuqa; ia mo lesu ga vei au, sa kaya ko Jiova.

² Mo ta cake e na matamu ki na veiyasana cecere, ka raica se dua na tikina dou a tawa koto kina. E na gau-ni-sala ko a lawavaki ira, me vaka na kai Arapea mai na veikau; ia ko sa vakadukadukalitaka na vanua e na nomu dauyatagane kei na nomu ca:

³ a sa bureitaki kina na uca, a sa sega kina na uca taumuri; ia na yadre ni alewa dauyatagane sa nomu, ko sa bese ni madua.

⁴ O na sega beka ni ia mai na si ga o qo, me tagici au, Na tamaqu, sai iko sa tuberi au niʼu a gone?

⁵ ena maroroya tiko beka na nona cudru ka tawa mudu? ena vakabauta tiko beka ga ka yacova nai otioti? Kaica, ko sa vosataka ka cakava na ka ca ko sa rawata.

⁶ A SA vosa ko Jiova vei au e na gauna i Josaia na tui, O sa raica li na ka sa cakava ko Isireli na dauvuki? sa lako ko koya ki na ulu-ni-vanua kecega kei na ruku ni kau bulabula kecega, a sa ia kina na dauyatagane.

⁷ Ia kaʼu a kaya ni sa cakava oti na ka kecega o qori, Mo lesu mai vei au. A sa sega ni lesu mai. A sa kunea ko tacina daulawaki ko Juta.

⁸ Ia kaʼu a raica, ni sa kawa ni ka kecega sa dauyatagane kina ko Isireli dauvuki kaʼu a biuti koya tani, ka solia vua nai vola ni tawase; ka sa sega ga ni rere kina na daulawaki ko Juta na tacina, ka sa lako ko koya talega ka ia na dauyatagane.

⁹ A sa yaco e na vuku ni sa rogo na nona dauyatagane, sa vakadukadukalitaka kina na vanua, a sa ia na dauyatagane kei na vatu kei na kau.

¹⁰ Ia e na ka kece talega o qo sa sega ga ni lesu kina vei au na tacina daulawaki ko Juta e na vu ni yalona, ia ka vakailasu ga, sa kaya ko Jiova.

¹¹ A sa kaya vei au ko Jiova, Sa donu vei Isireli dauvuki, ka sega vei Juta daulawaki.

¹² Mo laʼki tukuna na vosa o qo kivakaki na tokalau, ka kaya, Dou lesu mai, na Isireli dauvuki, sa kaya ko Jiova; kaʼu na qai sega ni vakatauca na noqu cudru vei kemudou: niʼu sa yalololoma, sa kaya ko Jiova, kaʼu na sega ni vakabauta tikoga na noqu cudru me tawa mudu.

¹³ Mo vakatusa ga na nomu caka cala, ko sa talaidredre kina vei Jiova na nomu Kalou, ka sa veibiuyaka na nomui valavala vei ira na ka tani e na ruku ni kau bulabula kecega, ia ki domoqu dou a sega ni vakarorogo kina, sa kaya ko Jiova.

¹⁴ Dou lesu mai, na gone dauvuki, sa kaya ko Jiova; niʼu sa veiwatini kei kemudou: kaʼu na qai kauti kemudou, e dua mai na dua na koro, ka rua mai na dua na mataqali, ia kaʼu na kauti kemudou mai ki Saioni:

¹⁵ kaʼu na solia vei kemudou nai vakatawa me vaka na yaloqu, era na vakani kemudou vakavuku ka vakayalomatua.

¹⁶ Ia ena yaco, ni dou sa vakalevutaki ka vakaluveni e na vanua, e na gauna o qori, sa kaya ko Jiova, era na sega ni kaya tale, A kato ni veiyalayalati i Jiova: ena sega talega ni cabe ki lomadra: era na sega talega ni vakananuma; era na sega talega ni lakova; ena sega talega ni caka tale.

¹⁷ E na gauna ko ya era na vakatokai Jerusalemi mei tikotiko i Jiova; a ra na soqoni vata kina na lewe ni veimatanitu kecega ki na yaca i Jiova ki Jerusalemi: a ra na sega ni muria tale na kaukauwa ni lomadra ca.

¹⁸ E na gauna o qori ena lako vata na mataqali i Juta kei na mataqali i Isireli, a ra na lako vata mai na vanua mai na tokalau ki na vanua kaʼu a solia vei ira na nomudou qase me ra taukena.

¹⁹ Ia kaʼu a kaya, Au na vakatikori iko vata vakaevei kei ira na luvequ, ka solia vei iko na vanua domoni, na nodrai votavota rogo na lewe vuqa ni veimatanitu? kaʼu a kaya, Mo kaya mai vei au, Tamaqu; mo kakua talega ni vuki tani vei au.

²⁰ E dina, sa vaka na alewa sa lako vakaca tani vua na watina, dou sa lako vakaca tani vakakina vei au, oi kemudou na mataqali i Isireli, sa kaya ko Jiova.

²¹ E dua na domo sa rogoci e na veiyasana cecere, na tagi kei na vakamamasu na nodra na luve i Isireli: e na vuku ni ra sa vakavevetaka na nodra sala, era sa guilecavi Jiova na nodra Kalou.

²² Dou lesu mai, na gone dauvuki, kaʼu na vakamavotaka na nomudou dauvuki. Kaica, keitou sa lako mai vei iko; ni sai iko ko Jiova na neitou Kalou.

²³ E dina ni sa ka lasu na veiyasana cecere, na ulu-ni-vanua e vuqa; e dina ni sa maivei Jiova na neitou Kalou na neitou bula na Isireli.

²⁴ Ia na ka veivakamaduataki sa kania na nodra oca na neitou qase mai na gauna keitou a cauravou kina; na nodra sipi kei na nodra karavau, na luvedra tagane kei na luvedra alewa.

²⁵ Keitou sa koto sobu e na neitou madua, a sa ubi keitou na kidroa: ni keitou sai valavala ca vei Jiova na neitou Kalou, oi keitou kei ira na neitou qase, mai na gauna keitou a cauravou kina ka yacova na siga o qo, ka sega ni vakarorogo ki na domo i Jiova na neitou Kalou.