Jeremaia 29 - AI VOLA TABU

Sa vola ko Jeremaia vei ira era tiko vakabobula mai Papiloni, me ra tikotiko malua, 1-7; ia me ra kakua ni vakarorogo ki na nodra tadra na parofita vakailasu, 8, 9; me sa oti dina na yabaki e vitusagavulu era na qai lesu vinaka tale mai, 10-14. Sa parofisaitaka na nodra rusa era talaidredre, 15-19. Sa tukuna ni rau na cudruvi ko Eapi kei Sitikiya, e rua na parofita vakailasu, 20-23. O Simeaya, ni sa vola vakacacataki Jeremaia, 24-29, sa lewai me cudruvi, 30-32.

¹ IA o qo na vosa ni vola sa vakauta mai Jerusalemi ko Jeremaia na parofita vei ira na kena vo ni qase era sa kauti tani, vei ira talega na bete, kei na parofita, kei na tamata kece e sa kauta vakabobula tani ko Nipukatinesari mai Jerusalemi ki Papiloni;

² (ni ra sa lako tani oti mai Jerusalemi ko Jekonaia na tui, kei koya na marama, kei ira na matanivanua, kei na turaga ni Juta kei Jerusalemi, kei na matai, kei na matai ni kaukamea;)

³ a sa kauta ko Elasa na luve i Safani, kei Kimariya na luve i Ilikiya, oi rau ka tala ko Sitikiya na tui Juta ki Papiloni vei Nipukatinesari na tui Papiloni, a sa vakane,

⁴ Sa vosa vakaoqo ko Jiova ni lewe vuqa, na Kalou nei Isireli, vei ira kecega era vakabobulataki, o ira kaʼu a lewa me ra kauti tani mai Jerusalemi ki Papiloni;

⁵ Dou tara vale, ka tikora; dou tea na were, ka kania na vuana;

⁶ dou vakawati, mo dou vakaluveni ka tagane ka yalewa; ka kauta e so me watidra na luvemudou tagane, ia na luvemudou alewa dou musuka vei ira na tagane me watidra, me ra vakasucuma na luvedra tagane kei na luvedra alewa; mo dou lewe vuqa maikea, ka tawa lewe lailai mai.

⁷ Ia dou qara me sautu na koro kaʼu a lewa mo dou kauti tani kina, ka masulaka vei Jiova: ni sa sautu ko ya, dou na sautu kaya.

⁸ Ni sa vosa vakaoqo ko Jiova ni lewe vuqa, na Kalou nei Isireli; Me ra kakua ni vakacalai kemudou ko ira na nomudou parofita kei na nomudou rairai, era tiko e na kemudou maliwa, dou kakua talega ni rogoca na nomudou tadra dou sa cakava me tadrataki.

⁹ Ni sa ka lasu era sa parofisaitaka vei kemudou e na yacaqu: au sa sega ni talai ira, sa kaya ko Jiova.

¹⁰ Ni sa vosa vakaoqo ko Jiova, Ni sa taucoko dina mai Papiloni e vitusagavulu na yabaki kaʼu na qai talevi kemudou, ka vakayacora vei kemudou na noqu vosa vinaka, niʼu sa vakalesui kemudou tale mai ki na yasana o qo.

¹¹ Niʼu sa kila koi au na nanuma kaʼu sa vakananuma e na vukumudou, sa kaya ko Jiova, na nanuma me vinaka, ka sega ni ca, me solia vei kemudou nai vakataotioti me namaka.

¹² Dou na qai kaci mai vei au, ka laʼki masu vei au, ia kaʼu na rogoci kemudou:

¹³ ia dou na vakasaqarai au, ka kunei au, ni dou sa vakasaqarai au sara e na vu ni lomamudou:

¹⁴ dou na qai kunei au, sa kaya ko Jiova: ia kaʼu na saumaka tani na nomudou veivakabobulataki, ka vakasoqoni kemudou mai na veivanua kecega, kei na veiyasana kecega kaʼu sa vakasevi kemudou kina, sa kaya ko Jiova; ia kaʼu na kauti kemudou tale mai ki na yasana kaʼu a lewa mo dou kauti tani maikina.

¹⁵ E na vuku ni dou sa kaya, Sa vakatubura vei keimami ko Jiova e so na parofita mai Papiloni;

¹⁶ o koya o qo sa vosa vakaoqo kina ko Jiova e na vuku i koya na tui sa tiko e nai tikotiko i Tevita, e na vukudra kece talega na tamata era tiko e na koro o qo, kei na wekamudou era sa sega ni lako vata tani kei kemudou;

¹⁷ Sa vosa vakaoqo ko Jiova ni lewe vuqa; Raica, au na tala vei ira nai seleiwau, kei na viakana, kei na mate dauveitauvi, ka cakavi ira me vaka na lolo ca sa sega ni kani rawa, ni sa ca.

¹⁸ Ia kaʼu na muri ira e nai seleiwau, kei na viakana, kei na mate dauveitauvi, ka soli ira me kauti yani ki na veimatanitu e vuravura; me ra vosavosacati, ka kidacalataki, ka vakasiusiutaka ka vakalialiai, e na veivanua kecega kaʼu sa dui vakasevi ira kina:

¹⁹ e na vuku ni ra sa sega ni rogoca na noqu vosa, sa kaya ko Jiova, a ya kaʼu sa talai ira na noqui talatala na parofita me tukuna, kaʼu sa sou e na sabogibogi ka tala, ia dou a sega ni vakarogoca, sa kaya ko Jiova.

²⁰ Ia dou rogoca mada kina na vosa i Jiova, oi kemudou kece sa vakabobulataki, kaʼu sa vakatala tani mai Jerusalemi ki Papiloni:

²¹ Sa vosa vakaoqo ko Jiova ni lewe vuqa, na Kalou nei Isireli, e na vuku i Eapi na luve i Kolaya, kei Sitikiya na luve i Meeseya, erau sa parofisaitaka na ka lasu vei kemudou e na yacaqu: Raica, au na soli rau ki na liga i Nipukatiresari na tui Papiloni; ena vakamatei rau ko koya e na matamudou,

²² ia ko ira kece na Juta era vakabobulataki mai Papiloni, era na cavuti rau e na ruru, ka vaka, Me cakavi iko ko Jiova me tautauvata kei Sitikiya ka tautauvata kei Eapi, sa tavuni rau ko tui Papiloni e na buka;

²³ e na vuku ni rau sa cakava na ka ca sara e Isireli, ka sa ia na dauyalewa kei ira na wati ni kai nodrau, ka sa cavuta na vosa e na yacaqu sa lasu ga, a ya kaʼu a sega ni vakarota vei rau, io kaʼu sa kila, ka tukuna, sa kaya ko Jiova.

²⁴ IA vei Simeaya na luve i Neilami talega mo vosa, ka kaya,

²⁵ Sa vosa vakaoqo ko Jiova ni lewe vuqa, na Kalou nei Isireli, ka kaya, O iko, ni ko sa vakauta e na yacamu ga nai vola vei ira kece na tamata mai Jerusalemi, vei Sifaniya talega na luve i Meeseya na bete, kei ira kecega na bete, ka kaya,

²⁶ O Jiova, sa lesi iko mo bete nai sosomi i Jeoiata na bete, mo dou mataveilewai e na vale i Jiova, e na vuku ni tamata yadua sa curumi, ka viaviaparofita, mo vakacurumi koya ki na vale ni veivesu, kei nai vesu kau.

²⁷ Ia cava ko sa sega kina ni vunauci Jeremaia na kai Anacoci, sa viaviaparofita vei kemudou?

²⁸ ni sa ka ga ko ya sa talaki kina ko koya vei keimami ki Papiloni, ka kaya, Sa na dede ga na ka o qo: dou tara vale, ka tikora, ka tea na were, ka kania na vuana.

²⁹ A sa wilika ko Sifaniya na bete nai vola o qo e daliga i Jeremaia na parofita.

³⁰ Sa qai yaco na vosa i Jiova vei Jeremaia, ka vaka,

³¹ Mo talaki vei ira kece sa vakabobulataki, ka kaya, Sa vosa vakaoqo ko Jiova e na vuku i Simeaya na luve i Neilami: E na vuku ni sa ia na parofisai vei kemudou ko Simeaya na luve i Neilami, ia koi au kaʼu sa sega ni talai koya, a sa vakaraviti kemudou ki na ka lasu ga:

³² o koya o qo sa vosa vakaoqo kina ko Jiova; Raica, au na cudruvi Simeaya na luve i Neilami, kei na nona kawa: ena sega mai vua e dua na tagane me tiko kei ira na tamata o qo; ena sega talega ni raica na ka vinaka kaʼu na cakava vei ira na noqu tamata, sa kaya ko Jiova; e na vuku ni sa vakavulica na vuki tani maivei Jiova.