Jeremaia 28 - AI VOLA TABU

Sa ia na parofisai vakailasu ko Eneniya, 1-4. Ia ko Jeremaia, sa tukuna ni sa parofita dina ga ko koya sa dauyaco nona ka e parofisaitaka, 5-9. Sa musuka ko Eneniya nai vua i Jeremaia, 10, 11. A sa kaya ko Jeremaia ni na kenai sosomi nai vua kaukamea, 12-14; ka sa parofisaitaka na mate i Eneniya, 15-17.

¹ A SA yaco e na yabaki ko ya, e nai-vakatekivu ni lewa i Sitikiya na tui Juta, e nai kava ni yabaki, e nai kalima ni vula, sa qai vosa vei au ko Eneniya na luve i Asuri na parofita, na kai Kipioni, e na vale i Jiova, e na matadra na bete kei ira kece na tamata, ka kaya,

² Sa vosa vakaoqo ko Jiova ni lewe vuqa, na Kalou nei Isireli, ka kaya, Au sa musuka nai vua i tui Papiloni:

³ ni na sega ni oti dina e rua na yabaki, kaʼu na kauta tale mai ki na yasana o qo nai yaya kece ni vale i Jiova, a ya sa kauta ko Nipukatinesari na tui Papiloni mai na yasana o qo, ka sa kauta ki Papiloni:

⁴ ia ko Jekonaia na luve i Jioiakimi na tui Juta, kei ira kece na Juta era bobula, era lako ki Papiloni, kaʼu na kauti ira tale mai ki na yasana o qo, sa kaya ko Jiova, niʼu na musuka nai vua i tui Papiloni.

⁵ Sa qai vosa ko Jeremaia na parofita vei Eneniya na parofita e na matadra na bete, kei na matadra na tamata kece era tu e na vale i Jiova,

⁶ a sa vakaemeni kina ko Jeremaia na parofita, ka kaya, Me cakacaka vakakina ko Jiova: me vakayacora ko Jiova na vosa ko sa parofisaitaka, me kauta tale mai nai yaya ni vale i Jiova, kei na ka kece sa kauti yani, mai Papiloni ki na yasana o qo.

⁷ Ia mo rogoca mada na vosa o qo kaʼu sa tukuna e daligamu, e daligadra kece talega na tamata;

⁸ O ira na parofita eliu era liu vei kedaru, era sa ia na parofisai ki na veivanua e vuqa, kei na veimatanitu lelevu, e nai valu, kei na ca, kei na mate dauveitauvi:

⁹ a parofita e sa parofisaitaka na sautu, ni na sa yaco na vosa ni parofita ko ya, sa qai kilai kina na parofita o qori, ni sa talai koya dina ga ko Jiova.

¹⁰ Sa qai taura ko Eneniya na parofita nai vua mai na domo i Jeremaia na parofita, ka musuka.

¹¹ A sa vosa ko Eneniya e na matadra na tamata kecega, ka kaya, Sa vosa vakaoqo ko Jiova; Au na musuka tani vakaoqo nai vua i Nipukatinesari na tui Papiloni mai na domodra kece na veimatanitu, ka me sega ni oti dina mada e rua na yabaki. A sa lako tani yani ko Jeremaia na parofita.

¹² A sa qai yaco na vosa i Jiova vei Jeremaia, ni sa musuka tani ko Eneniya na parofita nai vua mai na domo i Jeremaia na parofita, ka vaka,

¹³ Mo laʼki tukuna vei Eneniya, me vakane, Sa vosa vakaoqo ko Jiova; Nai vua kau, ko sa musuka; ia ko na cakava nai vua kaukamea me kenai sosomi.

¹⁴ Ni sa vosa vakaoqo ko Jiova ni lewe vuqa, na Kalou nei Isireli; Nai vua kaukamea, kaʼu sa qai viribalea ki na domodra kecega na veimatanitu o qo, me ra qaravi Nipukatinesari na tui Papiloni; ia era na qaravi koya ga: ia na manumanu ni vanua talega kaʼu sa solia vua.

¹⁵ Sa qai kaya ko Jeremaia na parofita vei Eneniya na parofita, Mo rogoca mada, Eneniya; Sa sega ni talai iko ko Jiova; ia ko iko ko sa vakaraviti ira na tamata o qo ki na lasu:

¹⁶ o koya o qo sa vosa vakaoqo kina ko Jiova; Raica, au na biuti iko tani e na dela ni vanua: e na yabaki o qo ko na mate ga, e na vuku ni ko sa vakavulica na vuki tani maivei Jiova.

¹⁷ A sa mate ko Eneniya na parofita e na yabaki ko ya e nai kavitu ni vula.