Jeremaia 27 - AI VOLA TABU

Sa vakatakila vei ira ni na vakamalumalumutaki na veivanua e so me qaravi tui Papiloni, 1-8. Sa vakaroti ira, kei Sitikiya talega, me vakamalumalumu, vua, me ra kakua ni vakadinati ira na parofita vakailasu, 9-18. Sa parofisaitaka nai yaya ni vale tabu sa vo tu, ni na kauti ga ki Papiloni, me toka vakadede maikina, 19-22.

¹ NI sa qai vakatekivu mai na lewa i Jioiakimi na luve i Josaia na tui Juta sa qai yaco na vosa o qo vei Jeremaia maivei Jiova, ka vaka,

² Sa vosa vakaoqo vei au ko Jiova; Mo cakava e so na nomui vesu kei nai vua, ka vakataqara e dua ki domomu,

³ ka vakauta vei iratou ko tui Itomi, kei tui Moapi, kei na nodra tui na luve i Amoni, kei tui Teiri, kei tui Saitoni, e na ligadra na talaki era sa lako mai ki Jerusalemi vei Sitikiya na tui Juta;

⁴ ka vakaroti ira me kaya vei iratou na nodra turaga, Sa vosa vakaoqo ko Jiova ni lewe vuqa, na Kalou nei Isireli; Dou vosa vakaoqo vei iratou na nomudou turaga;

⁵ Oi au kaʼu a cakavi vuravura, kei na tamata, kei na manumanu e dela ni vanua, e na noqu kaukauwa levu kei na ligaqu e dodo yani, ka sa solia vei ira kaʼu vaka e dodonu kina.

⁶ Ia koi au, kaʼu sa qai solia edaidai na veivanua kecega o qo ki na liga i Nipukatinesari na tui Papiloni, na noqu tamata; ia na manumanu ni vanua talega kaʼu sa solia vua me qaravi koya:

⁷ ia na veivanua kecega, ena qaravi koya kei na luvena, kei na luve ni luvena, ka me yaco dina mada na kena gauna ni nona vanua: io ko koya tale, ena qai qarava ga na veivanua e vuqa kei na tui levu e so.

⁸ Ia ena yaco, na vanua kei na matanitu ena bese ni qaravi Nipukatinesari na tui Papiloni, ka bese ni vakataqara ki domodra nai vua i tui Papiloni, io na vanua ko ya kaʼu na cudruva, sa kaya ko Jiova, e nai seleiwau, kei na viakana, kei na mate dauveitauvi, ka meʼu vakaoti ira mada e na ligana.

⁹ Ia koi kemudou, dou kakua kina ni rogoci ira na nomudou parofita, sei ira na nomudou rairai, sei ira na nomudou dautadra, sei ira na nomudou daucaka mana lasu, sei ira na nomudou daucakai sausau, era sa vosa vei kemudou, ka kaya, Dou na sega ga ni qaravi tui Papiloni:

¹⁰ ni sa ka lasu era sa parofisaitaka vei kemudou, mo dou veiyawaki kina kei na nomudou vanua; ia meʼu vakasevi kemudou tani, mo dou rusa.

¹¹ Ia na veimatanitu sa vakataqara ki domodra nai vua i tui Papiloni, me qaravi koya, kaʼu na vakalaiva ga ki na nodra vanua, sa kaya ko Jiova; a ra na wereca, ka tiko kina.

¹² Ia vei Sitikiya talega na tui Juta kaʼu a vosa me vaka na vosa kecega o qo, ka kaya, Dou vakataqara ki domomudou nai vua i tui Papiloni, ka qaravi koya kei ira na nona tamata, mo dou bula.

¹³ A cava dou sa via mate kina, ko iko, kei ira na nomu tamata, e nai seleiwau, kei na viakana, kei na mate dauveitauvi, me vaka na ka sa tukuna ko Jiova ki na matanitu sa bese ni qaravi tui Papiloni?

¹⁴ O koya o qo dou kakua kina ni rogoca na nodra vosa na parofita era vosa vei kemudou, ka kaya, Dou na sega ga ni qaravi tui Papiloni: ni sa ka lasu era sa parofisaitaka vei kemudou:

¹⁵ niʼu a sega ni talai ira, sa kaya ko Jiova, a ra sa parofisaitaka na ka lasu e na yacaqu; meʼu vakasevi kemudou tani kina, mo dou rusa, koi kemudou, kei ira na parofita era sa ia na parofisai vei kemudou.

¹⁶ Ia vei ira na bete talega kei ira kece na tamata o qo kaʼu a vosa ga, ka kaya, Sa vosa vakaoqo ko Jiova; Dou kakua ni vakarorogo ki na nodra vosa na nomudou parofita era ia na parofisai vei kemudou, ka kaya, Raica, nai yaya ni vale i Jiova ena kauti vakusarawa tale mai Papiloni: ni sa ka lasu ga era sa parofisaitaka vei kemudou:

¹⁷ dou kakua ni rogoci ira; dou qaravi tui Papiloni ga, mo dou bula: me lala mei cavai na koro o qo?

¹⁸ Ia kevaka era sa parofita dina, kevaka sa tiko vei ira na vosa i Jiova, me ra ia mada na veimasulaki vei Jiova ni lewe vuqa, me kakua ga ni kau ki Papiloni nai yaya sa vo tu e na vale i Jiova, kei na vale i tui Juta, kei Jerusalemi.

¹⁹ Ni sa vosa vakaoqo ko Jiova ni lewe vuqa e na vuku ni duru, kei na vuku ni wasawasa, kei na vuku ni tutu parasa, kei na vuku ni vo ni yaya sa vakavoci tu e na koro o qo,

²⁰ a ya sa sega ni kauta tani ko Nipukatinesari na tui Papiloni, ni sa kauti Jekonaia na luve i Jioiakimi na tui Juta mai Jerusalemi ki Papiloni, kei ira kece na turaga ni Juta kei Jerusalemi;

²¹ io, sa vosa vakaoqo ko Jiova ni lewe vuqa, na Kalou nei Isireli, e na vuku ni yaya sa vo tu e na vale i Jiova, kei na vale i tui Juta, kei Jerusalemi;

²² Sa na kau ga ki Papiloni, ka maikea ena tu ga kina ka yacova na siga kaʼu na cudruvi ira, sa kaya ko Jiova; kaʼu na qai kauta cake tale mai, ka vakasuka ki na yasana o qo.