Jeremaia 26 - AI VOLA TABU

O Jeremaia, ni sa vunautaka na rosa ni Kalou, sa tauri, ka lewai, 1-11. Sa tukuni koya vei ira, a sa vakadonui ka vakabulai, 12-24.

¹ NI sa qai vakatekivu na lewa i Jioiakimi na luve i Josaia na tui Juta, sa yaco na vosa o qo maivei Jiova, ka vaka,

² Sa vosa vakaoqo ko Jiova; Mo tu e na lomanibai ni vale i Jiova, ka vosataka ki na Veikoro kecega e Juta, era sa lako mai me soro e na vale i Jiova, na vosa kecega kaʼu sa vakarota vei iko me vosataka vei ira; kakua ni ko maninitaka e dua na vosa:

³ era na vakarorogo beka, ka lesu na tamata yadua mai na nona sala ca, meʼu veivutunitaka na ca, kaʼu sa nakita me cakava vei ira e na vuku ni sa ca na nodrai valavala.

⁴ Ia mo kaya vei ira, Sa vosa vakaoqo ko Jiova; Kevaka dou na bese ni vakarorogo vei au, me muria na noqu vunau, kaʼu sa tauca e na matamudou,

⁵ me vakarorogo ki na vosa ni noqui talatala na parofita, o ira kaʼu sa tala vei kemudou, ka sou e na sabogibogi me tala, ia dou a sega ga ni vakarorogo;

⁶ kaʼu na qai cakava na vale o qo me vakai Silo, ia na koro o qo kaʼu na cakava me ka e vosavosacati vei ira na veimatanitu e vuravura.

⁷ Ia ko ira na bete kei na parofita kei ira na tamata kece, era sa rogoci Jeremaia ni sa vosataka na vosa o qo e na vale i Jiova.

⁸ A sa yaco, ni sa tinia ko Jeremaia na vosa kece ka vakarota ko Jiova me tukuna ki na tamata kecega, era sa qai tauri koya ko ira na bete, kei na parofita, kei ira na tamata kece, ka kaya, O na mate vakaidina.

⁹ A cava ko sa ia kina na parofisai e na yaca i Jiova, ka! vaka, Ena vakai Silo na vale o qo, ia na koro o qo ena lala me sega e tiko kina? A ra sa soqoni vata vakaca vei Jeremaia ko ira na tamata kecega e na vale i Jiova.

¹⁰ Ni ra sa rogoca na turaga ni Juta na ka o qo, era sa qai lako cake mai na vale ni tui ki na vale i Jiova, ka ra tiko sobu e nai curucuru ki na matamata-ni-koro vou ni vale i Jiova.

¹¹ Era sa qai vosa na bete kei na parofita kivei ira na turaga kei na tamata kecega, ka kaya, Sa dodonu me mate na tamata o qo; ni sa parofisaitaka na ca ki na koro o qo, me vaka ni dou sa rogoca e daligamudou.

¹² Sa qai vosa ko Jeremaia vei ira kece na turaga kei ira na tamata kecega, ka kaya, O Jiova, sa talai au mai me parofisaitaka ki na vale o qo kei na koro o qo na vosa kecega dou sa rogoca:

¹³ o koya o qo dou cakava kina me vinaka na nomudou sala kei na nomudoui valavala, ka vakarorogo ki na domo i Jiova na nomudou Kalou; ena qai veivutunitaka ko Jiova na ca sa cavuta me kemudou.

¹⁴ Ia koi au, raica, dou sa rawai au: dou kitaka vei au me vaka sa vinaka ka dodonu vei kemudou:

¹⁵ ia mo dou kila sara ga, kevaka dou sa vakamatei au, sa dra tawa cala dou na vakayacora vei kemudou, kei na koro o qo, kei na lewena: ni sa dina ni sa talai au mai ko Jiova vei kemudou meʼu tukuna e daligamudou na vosa kecega o qo.

¹⁶ Era sa qai kaya na turaga kei na tamata kecega vei ira na bete kei na parofita; Sa sega ni dodonu me mate na tamata o qo: ni sa vosa vei keda ko koya e na yaca i Jiova na noda Kalou.

¹⁷ Sa qai tu cake e so vei ira na qase ni vanua, ka kaya vei ira kece na tamata era soqoni vata mai, ka vaka,

¹⁸ O Maika na kai Moreseci, sa ia na parofisai e na gauna i Isikiya na tui Juta, ka sa vosa vei ira kece na kai Juta, ka kaya, Sa vosa vakaoqo ko Jiova ni lewe vuqa; O Saioni, ena cukiti me vaka na were; kei Jerusalemi, ena yaco me bukebuke walega; kei na ulu-ni-vanua ni vale tabu, ena vaka na veitikina cecere ni veikau.

¹⁹ Sa ra vakamatei koya sara li ko ira ko Isikiya na tui Juta, kei na Juta kecega? sa sega ni rerevaki Jiova beka ga ko koya, ka masuti Jiova, ka sa veivutuni mai ko Jiova e na vuku ni ca sa cavuta me kedra? Ia eda na vakayacora mai kina na ca levu vei keda.

²⁰ A sa dua talega na tamata sa ia na parofisai e na yaca i Jiova, o Uriya na luve i Simeaya na kai Kiriaci-yiarimi, a sa parofisaitaka na ca me tauca na koro o qo kei na vanua o qo me vaka na vosa kecega i Jeremaia:

²¹ ia ko Jioiakimi na tui, kei ira kece na nona tamata qaqa, kei ira kece na turaga ni ra sa rogoca na nona vosa, sa qai qara ko koya na tui me vakamatea: ia ni sa rogoca ko Uriya, sa rere, ka dro, ka yaco ki Ijipita;

²² a sa tala ko Jioiakimi na tui e so na tamata ki Ijipita; io ko Elinacani na luve i Akipori, ka so tale na tamata me lako kaya ki Ijipita:

²³ a ra sa lakovi Uriya ki Ijipita, ka kauti koya mai vei Jioiakimi na tui; a sa vakamatei kova e nai seleiwau, ka biuta na yagona ki na nodrai bulubulu na tamata wale.

²⁴ Ia ko Eiikami na luve i Safani sa totaki Jeremaia ga, me ra kakua ni soli koya ki na ligadra na tamata mo vakamatei koya.