Jeremaia 25 - AI VOLA TABU

O Jeremaia, ni sa vunauci ira na kai Jutia e na vuku ni nodra dautalaidredre, sa parofisaitaka na nodra veivakabobulataki ka yabaki vitusagavulu, ena qai cudruvi emuri ko Papiloni, 1-14. Ni sa vakatakarakarataki e na dua na bilo waini, sa vakatakilai na nodra cudruvi na veimatanitu kei na nodra turaga, 15-38.

¹ A VOSA sa yaco vei Jeremaia e na vukudra kecega na kai Juta e nai kava ni yabaki i Jioiakimi na luve i Josaia na tui Juta, na yabaki o qori na kenai matai i Nipukatiresari na tui Papiloni;

² na vosa ko ya sa vosataka ko Jeremaia na parofita vei ira kecega na kai Juta, vei ira kece talega na kai Jerusalemi, ka vaka,

³ Mai nai katinikatolu ni yabaki i Josaia na luve i Amoni na tui Juta, ka yacova na siga o qo, sa kenai karuasagavulu ka tolu ni yabaki, sa yaco vei au na vosa i Jiova, ia kaʼu a vosa tikoga vei kemudou, ka sou e na sabogibogi me vosa; ia dou a sega ni vakarorogo.

⁴ Ia ka tala ko Jiova vei kemudou na nonai talatala kecega na parofita, ka sou e na sabogibogi me tala; ia dou sa sega ni vakarorogo, se vakatu daligamudou me rogoca.

⁵ Era daukaya, Dou dui lesu yadua edaidai mai na dui nona sala ca, kei na ca ni nonai valavala, ka tiko ga e na vanua sa solia ko Jiova vei kemudou kei ira na nomudou qase me tawa mudu rawa:

⁶ ia dou kakua ni muria na kalou tani me qaravi ira, ka sorovi ira, dou kakua talega ni vakacudrui au e na cakacaka ni ligamudou; kaʼu na qai sega ni vakacacani kemudou.

⁷ Ia dou a sega ni vakarorogo vei au, sa kaya ko Jiova; mo dou sa vakacudrui au kina e na cakacaka ni ligamudou mo dou ca.

⁸ O koya o qo sa vosa vakaoqo kina ko Jiova ni lewe vuqa; E na vuku ni dou sa sega ni rogoca na noqu vosa,

⁹ raica, au na talaki ka kauta kecega na veimataqali mai na mata ni tokalau, kei Nipukatiresari na tui Papiloni na noqu tamata, sa kaya ko Jiova, ia kaʼu na kauti ira vakaivalu mai ki na vanua o qo, kei na lewena, kei na veimatanitu kecega o qo sa tu vakavolivolita, ia kaʼu na vakarusai ira sara, ka cakavi ira me ka e kidacalataki, ka vakasiusiutaka ka vanua rusa ka tawa mudu.

¹⁰ Ia kaʼu na vakatakalia vei ira na domo ni marau, kei na domo ni reki, na domo ni tagane kei na domo ni alewa, sa qai vakawati, na rorogo ni vatu i qaqi, kei na rarama ni cina.

¹¹ Ia na vanua kece o qo ena lala tu ga, ka kidacalataki; a ra na qaravi tui Papiloni na veimatanitu o qo ka vitusagavulu na yabaki.

¹² Ia ena yaco, ni sa taucoko na yabaki e vitusagavulu, kaʼu na qai cudruvi tui Papiloni, kei na matanitu ko ya, sa kaya ko Jiova, e na vuku ni nodra caka cala, kei na nodra vanua talega na kai Kalitea, ka vakalalataka ka tawa mudu, sa kaya ko Jiova.

¹³ Ia kaʼu na vakayacora ki na vanua ko ya na noqu vosa kecega, kaʼu sa cavuta me kena, io, na ka kecega sa volai e nai vola o qo, ka sa parofisaitaka ko Jeremaia me kedra na veimatanitu kecega.

¹⁴ Ni sai ira talega era na qali ki na veimatanitu e vuqa kei na turaga levu e so: ia kaʼu na sauma vei ira me vaka na nodrai valavala, kei na cakacaka ni ligadra.

¹⁵ Ni sa kaya vakaoqo vei au ko Jiova na Kalou nei Isireli; Mo taura na bilo waini ni cudru waqawaqa o qo mai na ligaqu, ka vagunuvi ira kina na veimatanitu, kaʼu sa talai iko kina:

¹⁶ me ra gunuva, ka yatayata, ka lialia, e na vuku ni seleiwau kaʼu na tala vei ira.

¹⁷ Au a qai taura na bilo mai na liga i Jiova, ka vagunuvi ira kina na veimatanitu, ka talai au kina ko Jiova:

¹⁸ io, ko Jerusalemi, kei na Veikoro e Juta, kei na nodra tui, kei na nodra turaga, me cakavi ira me lala tu, me ka e kidacalataki, ka vakasiusiutaka, ka vosavosacati; me vaka e na siga o qo;

¹⁹ ko Fero na tui Ijipita, kei ira na nonai talatala, kei ira na kena turaga, kei ira kecega na nona tamata;

²⁰ kei ira kecega era dui kaikai, kei ira kecega na tui ni vanua ko Usi, kei na tui kecega ni nodra vanua na kai Filisitia, io ko Esikiloni, kei Kesa, kei Ekironi, kei na kedra vo ni Esitoti:

²¹ ko Itomi, kei Moapi; kei ira na luve i Amoni,

²² kei ira kecega na tui mai Teiri, kei ira kece na tui mai Saitoni, kei ira na tui ni veiyanuyanu mai na tai kadua ni Wasawasa,

²³ ko Titana, kei Tema, kei Pusa, kei ira kece mai na sausau kei vuravura;

²⁴ kei ira kece na tui mai Arapea, kei ira kece na nodratoui era dui kaikai era tiko mai veikau,

²⁵ kei ira kece na tui mai Simiri, kei ira kece na tui mai Elama, kei ira kece na nodra tui na Metai;

²⁶ kei ira kece na tui mai na mata ni tokalau, o ira sa tiko vakayawa kei ira sa tiko voleka, na tamata kei na kai nona, kei ira kecega na veimatanitu kei vuravura, era sa tiko e na dela ni soso: ia ko tui Sesaki ena gunu taravi ira.

²⁷ O koya o qo mo kaya kina vei ira, Sa vosa vakaoqo ko Jiova ni lewe vuqa na Kalou nei Isireli; Dou gunu, ka mateni, ka lua, ka bale, ka kakua ni duri tale, e na vuku ni seleiwau kaʼu na tala vei kemudou.

²⁸ Ia ena yaco, kevaka era bese ni taura na bilo mai na ligamu me gunu, mo qai kaya vei ira, Sa vosa vakaoqo ko Jiova ni lewe vuqa; Dou na gunu vakaidina ga.

²⁹ Ia ki na koro o qo, raica, e sa vakatokai e na yacaqu, kaʼu sa vakatekivu me vakayacora kina na ca, ia koi kemudou, mo dou sa sega sara beka ni cudruvi? Dou na cudruvi ga: niʼu na kaciva nai seleiwau me tauci ira kecega na kai vuravura, sa kaya ko Jiova ni lewe vuqa.

³⁰ Ia ko iko mo parofisaitaka na vosa kece o qo vei ira, ka kaya vei ira, O Jiova, ena kurukuru maicake, ia mai na nonai tikotiko tabu ena vakarogotaka mai na domona; ena kurukuru vakaukauwa mai ki na nonai tikotiko; na kaila, me vaka na nodra era sa sikaraka na vua-ni-vaini, ena rogo ga yani vei ira kece era tiko e vuravura.

³¹ Ena yaco yani na ue ki nai yalayala kei vuravura; ni sa dua na ka e veiletitaka ko Jiova kei ira na veimatanitu, ena ia na veilewalewai ko koya kei ira na tamata kecega; o ira na tamata ca, ena soli ira ki nai seleiwau, sa kaya ko Jiova.

³² Sa vosa vakaoqo ko Jiova ni lewe vuqa, Raica, na ca ena lako voli yani mai na matanitu ki na matanitu, ia na cava levu ena vakatuburi mai nai yalayala kei vuravura.

³³ Ia na vuetaki kei Jiova era na davo tu yani e na siga ko ya mai nai yalayala kei vuravura e dua ki nai yalayala kei vuravura e dua: era na sega ni tagicaki, se kumuni vata, se buluti; era na vaka na de-ni-manumanu e na dela ni soso.

³⁴ Dou qoqolou, nai vakatawa, ka tagi; ka qiqi e na dravusa, oi kemudou sa liutaka na qele ni sipi: ni sa yaco sara mai na gauna mo dou vakamatei ka veisei kina; ia dou na lutu ga me vaka na bilo domoni.

³⁵ Ia ena yali nai drodro maivei ira nai vakatawa, kei na veivakabulai maivei ira era liutaka na qele ni sipi.

³⁶ A domo ni nodra tagi nai vakatawa, kei na nodra qoqolou era liutaka na qele ni sipi! ni sa vakacacana ko Jiova na nodra veico:

³⁷ a sa vagalutaki nai tikotiko sautu e na vuku ni cudru waqawaqa i Jiova:

³⁸ sa vakalaiva yani ko koya, me vaka na laioni, na nonai kotokoto: ni sa rusa na nodra vanua e na vuku ni yalokatakata i koya na dauvakacaca, kei na vuku ni Nona cudru waqawaqa.