Jeremaia 24 - AI VOLA TABU

Sa vakatakarakarataki na kai Jutia e na lolo vinaka kei na lolo ca, 1-3. O ira sa yalododonu era na maroroi tiko me lesu tale ki na nodra vanua, 4-7; ia ko Sitikiya kei ira na tamata ca era na vakarusai ga, 8-10.

¹ SA vakatakila vei au ko Jiova, ka, raica, sa rua na sova lolo ka tauci e na mata ni vale tabu i Jiova, ni sa kauti ira oti tani ko Nipukatiresari na tui Papiloni, io, ko Jekonaia na luve i Jioiakimi na tui Juta, kei ira na turaga ni Juta, kei ira na matai ni kaukamea, mai Jerusalemi, ka sa kauti ira ki Papiloni.

² E dua na sova lolo sa vinaka sara, ka vaka na lolo sa dreu taumada: ia na kenai karua sa lolo ca sara, sa sega ni kani rawa e na vuku ni sa ca.

³ A sa vosa vei au ko Jiova, A cava ko sa raica, Jeremaia? Au sa kaya, Na lolo, na kena lolo vinaka, sa vinaka sara; ia na kena ca, sa ca sara, ka sa sega ni kani rawa e na vuku ni sa ca.

⁴ A sa baki yaco tale na vosa i Jiova vei au, ka vaka,

⁵ Sa vosa vakaoqo ko Jiova na Kalou nei Isireli; Me vaka na lolo vinaka o qo, kaʼu na kilai ira vakakina na Juta era sa vakabobulataki, o ira kaʼu sa vakatala tani e na yasana o qo ki na nodra vanua na kai Kalitea me ra vinaka kina:

⁶ niʼu na vaqara na mataqu vei ira me ra vinaka kina, ka kauti ira tale mai ki na vanua o qo: ia kaʼu na tarai ira cake, ka sega ni basuka sobu; kaʼu na tei ira, ka sega ni cavuta:

⁷ ia kaʼu na solia vei ira na yalo me kilai au, ni sai au ko Jiova: ia era na yaco me noqu tamata, kaʼu na yaco me nodra Kalou: ni ra na lesu mai vei au e na lomadra dina.

⁸ Ia me vaka na lolo ca, sa sega ni kani rawa e na vuku ni sa ca; sa vosa vaka dina o qo ko Jiova: Ena vakakina kaʼu na soli Sitikiya na tui Juta, kei ira na kena turaga, kei na kedra vo ni Jerusalemi, era tiko e na vanua o qo, kei ira sa tiko mai na vanua ko Ijipita:

⁹ ia kaʼu na soli ira me ra kauti tani me ra ca kina, ki na veimatanitu kecega kei vuravura, me ra vakalialiai, ka vakaiboletaki, ka veiwalitaki ka vosavosacati e na veiyasana kecega kaʼu na dui vakasevi ira kina:

¹⁰ ia kaʼu na tala nai seleiwau, kei na viakana, kei na mate dauveitauvi, vei ira, me ra oti tani mada mai na dela ni vanua kaʼu a solia vei ira kei na nodra qase.