Jeremaia 23 - AI VOLA TABU

A qele ni sipi i Jiova sa vakasevi tani ena vakasoqoni tale mai, 1-4. Ena lewai ira ka vakabulai ira na Mesaia, 5-8. A lewa ni Kalou e na vukudra na parofita vakailasu, 9-32; kei ira era vakasewasewani ira na parofita dina, 33-40.

¹ ENA ca ko ira nai vakatawa era vakacacana ka vakasevi ira na sipi ni noqu veico! sa kaya ko Jiova.

² O koya o qo sa vosa vakaoqo kina ko Jiova na Kalou nei Isireli vei ira nai vakatawa era sa vakani ira na noqu sipi; Oi kemudou, dou sa vakatolosevi ira na noqu sipi, ka vakasavi ira tani, ka sega ni laʼki raici ira: raica, au na cudruvi kemudou e na vuku ni ca ni nomudoui valavala, sa kaya ko Jiova.

³ Ia koi au, kaʼu na vakasoqoni ira vata mai na kedra vo ni noqu sipi mai na veivanua kecega kaʼu sa dui vakasevi ira kina, ia kaʼu na kauti ira tale mai ki na nodra lomanibai; a ra na luvea ka tubu.

⁴ Ia kaʼu na vakatikora e so me nodrai vakatawa era na vakani ira: a ra na sega ni rere tale, se taqaya, se yali, sa kaya ko Jiova.

⁵ Raica, ena yaco na gauna, sa kaya ko Jiova, kaʼu na vakatubura kina vei Tevita e dua na Coke yalododonu, ia ena lewa e dua na Tui ka cakacaka yaco, ena ia ko koya na lewa kei na cakacaka dodonu e vuravura:

⁶ e na nona gauna era na vakabulai kina na Juta, ia ko ira na Isireli era na tiko vinaka ga: ia o qo na yacana ena vakatokai kina, Ko Jiova na noda yalododonu.

⁷ O koya o qo ena yaco dina kina na gauna, sa kaya ko Jiova, era na sega ni kaya tale, Sa bula ko Jiova, o koya ka kauti ira cake na luve i Isireli mai na vanua ko Ijipita:

⁸ ia ko ya ga, Sa bula ko Jiova, o koya ka kauta cake mai ka tubera na nodra kawa na mataqali i Isireli mai na vanua mai na mata ni tokalau, kei na veivanua kecega kaʼu a dui vakasevi ira kina; a ra na tiko ga e na nodra vanua.

⁹ E NA vukudra na parofita sa ramusu kina na yaloqu e lomaqu; sa yavala na suiqu kecega; au sa vaka na tamata sa mateni, ka vaka na tamata sa rawai koya na waini, e na vuku i Jiova, kei na vuku ni nona vosa tabu.

¹⁰ Ni sai ira na dauyalewa sa oso kina na vanua; ni sa kawa ni ruru sa tagi kina na vanua; sa dravuisiga mai na veiyasana vinaka ni veikau, a sa ca na nodrai valavala, a sa sega ni dodonu na nodra lewa.

¹¹ Ni sai ira na parofita kei na bete talega era sa tamata ca, io, e na noqu vale kaʼu sa kunea na nodra ca, sa kaya ko Jiova.

¹² O koya o qo ena yaco mai kina na nodra sala me vaka sa titidara e na butobuto: era na biligi yani, ka bale kina: niʼu na vakayacora na ca vei ira, io na yabaki me ra cudruvi kina, sa kaya ko Jiova.

¹³ Ia vei ira na parofita ni Samaria kaʼu sa kunea na ka vakalialia, era sa ia na parofisai vaka-Peali, a ra sa vakasesei ira kina na noqu tamata na Isireli.

¹⁴ Ia vei ira talega na parofita ni Jerusalemi kaʼu sa kunea na ka vakasisila: era sa ia na dauyalewa ka muria na ka lasu: era sa vakaukauwataka talega na ligadra na daucaka ca, me sega kina e dua sa lesu mai na nona ca; era sa yaco kecega vei au me tautauvata kei Sotoma, kei ira na lewena me tautauvata kei Komora.

¹⁵ O koya o qo sa vosa vakaoqo kina ko Jiova ni lewe vuqa e na vukudra na parofita; Raica, au na vakani ira e na kau gaga, ka vagunuvi ira e na wai gaga: ni sa maivei ira na parofita ni Jerusalemi sa lako yani kina na ca ki na vanua taucoko.

¹⁶ Sa vosa vakaoqo ko Jiova ni lewe vuqa, Dou kakua ni vakarorogo ki na nodra vosa na parofita era sa ia na parofisai vei kemudou; era sa vakalialiai kemudou ga: na raivotu wale ni lomadra ga era sa cavuta, sa sega mai na gusu i Jiova.

¹⁷ Era sa kaya tikoga vei ira era beci au, Sa kaya ko Jiova, Ena yaco ga na vakacegu vei kemudou, ia vei ira kece era muria na kaukauwa ni lomadra era sa kaya, Ena sega na ca me yacovi kemudou:

¹⁸ ni sai cei ka tiko e na bose i Jiova, ka kunea ka rogoca na nona vosa? sai cei ka vakarorogo ki na nona vosa, ka rogoca?

¹⁹ Raica, na cava cudrucudru i Jiova sa lako yani, io na cava rarawa: ki na uludra na tamata ca ena lutu vakararawa sara kina:

²⁰ ena sega ni lesu mai na cudru i Jiova, ena cakava mada ga, ka vakayacora mada na nanuma ni lomana: e na gauna maimuri dou na kila deivaka sara ga kina.

²¹ Au a sega ni talai ira na parofita o qori, a ra sa cici ga: au a sega ni vosa vei ira, a ra sa ia ga na parofisai.

²² Ia kevaka era sa tiko ga e na noqu bose, ka vakarogotaka na noqu vosa vei ira na noqu tamata, ke ra sa vakalesui ira mai na nodra sala ca, kei na ca ni nodrai valavala.

²³ Sa Kalou ni tikina voleka beka ga koi au, sa kaya ko Jiova, kaʼu sa sega ni Kalou ni tikina vakayawa beka talega?

²⁴ Me vunitaki koya rawa beka e dua e na yasana vuni, meʼu kakua ni raici koya? sa kaya ko Jiova. Sa sega beka ni lomalagi kei vuravura kaʼu sa robota? sa kaya ko Jiova.

²⁵ Au sa rogoca na ka era kaya na parofita, era sa parofisaitaka na ka lasu e na yacaqu, ka kaya, Au a tadra, au a tadra.

²⁶ Me cava na kena dede me sa tiko na ka o qo e na lomadra na parofita era sa parofisaitaka na ka lasu? io na parofita ni lawaki ni lomadra ga ko ira;

²⁷ era sa vakananuma me cakavi ira na noqu tamata me guilecava na yacaqu e na nodra tadra era sa dui tukuna vua na kai nona, me vaka na nodra qase ni ra guilecava na yacaqu e navuku i Peali.

²⁸ A parofita sa dua vua na tadra, me tukuna ga na nona tadra; ia ko koya sa tu vua na noqu vosa, me tukuna dina ga na noqu vosa. E ka vata li na qana kei na witi? sa kaya ko Jiova.

²⁹ A noqu vosa, sa vaka na buka, se segai? sa kaya ko Jiova; ka vaka nai tukituki sa vorolaka na vatu?

³⁰ Sa vaka ko Jiova, Raica na ka o qori kaʼu sa cati ira kina na parofita, era sa dui butakoca na noqu vosa mai vua na kai nona.

³¹ Raica, au sa cati ira na parofita, sa kaya ko Jiova, era sa vosa e na yamedra ka kaya, Sa kaya ko Koya.

³² Raica, au sa cati ira ga era sa parofisaitaka na tadra lasu, sa kaya ko Jiova, a ra sa tukuna, ka vakasesei ira kina na noqu tamata e na nodra lasu, kei na nodra vosa walega; ia koi au kaʼu a sega ni talai ira, se vakaroti ira: era na sega kina ni yaga vakalailai vei ira na tamata o qo, sa kaya ko Jiova.

³³ Ia ni ra sa tarogi iko e so na tamata o qo, se na parofita, se na bete, ka vaka, A cava nai colacola sa tukuna mai ko Jiova? mo qai kaya vei ira, Ai colacola cava? Ia kaʼu na biuti kemudou ga, sa Kaya ko Jiova.

³⁴ Ia ko ira na parofita, kei na bete, kei na tamata, era na kaya, Ai colacola i Jiova, kaʼu na cudruva na tamata ko ya kei na nona mataqali.

³⁵ Sa vaka ga o qo mo dou dui kaya vua na kai nona, vua talega na tacina, A cava sa kaya ko Jiova? ia, A cava sa vosataka ko Jiova?

³⁶ Ia nai colacola i Jiova, mo dou kakua ni cavuta tale: ni na dui nonai colacola na tamata na dui nona vosa walega; ni dou sa vakaucacataka na vosa ni Kalou bula, na vosa i Jiova ni lewe vuqa na noda Kalou.

³⁷ Me vaka ga o qo na nomu vosa vua na parofita, A cava sa kaya vei iko ko Jiova? ia, A cava sa vosataka ko Jiova?

³⁸ Ia e navuku ni dou sa kaya, Ai colacola i Jiova; o koya o qo sa vosa vakaoqo kina ko Jiova; E na vuku ni dou sa cavuta na vosa o qo, Ai colacola i Jiova, ia kaʼu a tala vei kemudou, ka kaya, Dou kakua ni kaya, Ai colacola i Jiova:

³⁹ o koya o qo, raica, oi au, io koi au, kaʼu na guilecavi kemudou sara kina, ka biuti kemudou tani, kei na koro kaʼu a solia vei kemudou kei ira na nomudou qase, mai na mataqu:

⁴⁰ ia kaʼu na vakayacora vei kemudou na veivakalialiai tawa mudu, kei na madua tawa mudu, ena sega ni guilecavi.