Jeremaia 22 - AI VOLA TABU

A Kalou, sa vunauci tui Juta kei ira na nona tamata, me veivutuni, 1-9. Na ka ca sa lewai me yacovi Salumi, 10-12; kei Jioiakimi, 13-19; kei Konaia, 20-30.

¹ SA vosa vakaoqo ko Jiova; Mo lako sobu ki na vale i tui Juta, ka vosataka maikina na vosa o qo,

² ka kaya, Dou rogoca na vosa i Jiova, o iko tui Juta, ka sa tiko e nai tikotiko i Tevita, o iko, kei ira na nomui talatala, kei ira na nomu tamata era sa daucuru mai ki na matamata-ni-koro o qo:

³ Sa vosa vakaoqo ko Jiova; Dou ia na lewa kei nai valavala dodonu, ka vakabulai koya sa vakacacani mai na liga i koya sa vakacacana: ia na vulagi, kei na luveniyali, kei na alewa dawai, dou kakua ni vakararawataki iratou, kei na dra tawa cala kakua ni dou vakadavea e na yasana o qo.

⁴ Ia kevaka dou sa vakabauta sara na vosa o qo, ena qai curu mai ki na matamata-ni-koro o qo ko ira na tui era sa tiko e nai tikotiko i Tevita, ka sa vodo lako e na vale-vodoki kei na ose, o koya, kei ira na nonai talatala, kei na nona tamata.

⁵ Ia kevaka dou na tawa rogoca na vosa o qo, kaʼu sa cavuti au niʼu sa vosavavakini, sa kaya ko Jiova, ni na rusa ga na vale o qo.

⁶ Ni sa vosa vakaoqo ko Jiova ki na vale i tui Juta; Sai Kiliati ko iko vei au, na ulu i Lipanoni: ia kaʼu na cakavi iko me veikau ga, me Veikoro sa sega ni tawa.

⁷ Ia kaʼu na lesia e so na kemu dauvakacaca, era sa dui vakaiyaragi: a ra na taya sobu na nomu sitari vinaka, ka biuta ki na buka.

⁸ A ra na lako voli mai na lewe ni veivanua e vuqa ki na koro o qo, a ra na dui kaya yadua ki na kai nona, E na vuku ni cava sa caka vakaoqo kina ko Jiova ki na koro levu o qo?

⁹ Era na qai kaya, E na vuku ni ra sa biuta na veiyalayalati i Jiova na nodra Kalou, ka sorovi ira na kalou tani, ka qaravi ira.

¹⁰ Dou kakua ni tagicaki koya sa mate, se yasovaka: ia dou tagicaki koya sa lako tani yani: ni na sega ni lesu tale mai, se raica na vanua ka sucu kina ko koya.

¹¹ Ni sa vosa vakaoqo ko Jiova e navuku i Salumi na luve i Josaia na tui Juta, o koya sa lewa nai sosomi kei Josaia na tamana, ka sa lako tani e na yasana o qo; Ena sega ni lako tale mai kike ko koya:

¹² ni sa yasana era sa kauti koya vakabobula kina, sai koya ena mate ga kina ko koya, ia na vanua o qo ena sega ni kunea tale.

¹³ Ena ca ko koya sa tara na nona vale e na tawa dodonu, kei nai taba ni nona vale ecake e na caka cala; ka sa sureta na kai nona me cakacaka walega, ka sa sega ni solia vua nai voli ni nona cakacaka;

¹⁴ ka sa kaya, Au na tara e dua na noqu vale levu, kei nai taba loma ni vale lelevu, ka sa seleva na kena katuba; a sa botani ecake e na sitari, ka boroi e nai qumu.

¹⁵ O na lewa tiko beka e na vuku ni ko sa viribaiti iko e na sitari? a tamamu, sa sega beka ni kana ka gunu, ka cakava na lewa kei na cakacaka dodonu, a sa qai vinaka kina ko koya?

¹⁶ Sa ia na veilewai e na vukudrau na malumalumu kei na dravudravua; a sa qai vinaka kina ko koya: sa vakaoqo na kilai au, se segai? sa kaya ko Jiova.

¹⁷ Ia na matamu kei na lomamu sa sega ga, se ki na nomu kocokoco, kei na dra tawa cala me vakadavea, kei na veivakasaurarataki, kei nai valavala kaukauwa, me cakava.

¹⁸ O koya o qo sa vosa vakaoqo kina ko Jiova e na vuku i Jioiakimi na luve i Josaia na tui Juta; Eratou na sega ni tagicaki koya, ka kaya, Ule tuakaqu! se, Ule ganequ! era na sega ni yasovaki koya, ka kaya, Ule turaga! se, Ule na kenai ukuuku!

¹⁹ E na veibulu vaka-asa ena buluti ga kina, ni sa yarataki ka biu kitaudaku ni matamata-ni-koro ko Jerusalemi.

²⁰ Mo cabe cake ki Lipanoni, ka tagi; ka tabalaka na domomu mai Pasani, ka tagi mai Aparimi: ni ra sa vakarusai kecega ka lomani iko.

²¹ Au a vosa vei iko ni ko sa tiko vinaka; ko sa kaya, Au na sega ni rogoca. Sa vakaoqo na nomui valavala ni ko sa gone ka yacova na siga o qo, me kakua ni rogoca na domoqu.

²² A nomui vakatawa kecega, ena kani ira na cagi; ia ko ira sa lomani iko era na laʼki bobulataki: o na qai madua dina ka taqaya e na vuku ni nomu ca kecega.

²³ O iko na kai Lipanoni, sa cakava na nomui roro e na sitari, me cava na yalovinaka ena qai raici tu vei iko ni sa yacovi iko na rarawa, na yaluma me vaka na alewa sa taratara!

²⁴ Me vaka na dina ni noqu bula, sa kaya ko Jiova, ke sai iko, Konaia na luve i Jioiakimi na tui Juta, na mama e na ligaqu i matau, keʼu sa na cavuti iko tani ga;

²⁵ ia kaʼu na soli iko ki na ligadra era sa qarai iko me ra vakamatea, ki na ligadra talega na matadra ko sa rerevaka, io ki na liga i Nipukatiresari ko tui Papiloni, kei na ligadra na kai Kalitea.

²⁶ Ia kaʼu na biuti iko tani, kei na tinamu ka vakasucumi iko, ki na dua na vanua tani drau a sega ni sucu kina; ia maikea drau na mate ga kina.

²⁷ Ia ki na vanua erau sa domona me rau lesu kina, erau na sega ni lesu yani kina.

²⁸ Sa dua beka na matakau beci ka cataki na tamata o qo ko Konaia? se dua na bilo sa sega ni vinakati? se na vuku ni cava sa biuti tani kina ko iratou kei na nona kawa, ka vakasevi ki na vanua eratou sa sega ni kila?

²⁹ Na vanua, na vanua, na vanua, mo rogoca na vosa i Jiova.

³⁰ Sa vosa vakaoqo ko Jiova, Dou vola na tamata o qo me luveniyali, me tamata ena tawa yaco e na nona gauna: ni na sega ni yaco e dua na tamata e na nona kawa, me tiko e nai tikotiko i Tevita, ka lewa tale mai Juta.