Jeremaia 2 - AI VOLA TABU

A Kalou, ni ta vakatakila oti na nona loloma eliu tei ira na kai Jutia, sa qai vunauci ira e na vuku ni nodra tuki tani vua, ni sa ka levu sara, 1-13. Era vuna ga kina na ka rarawa sa yacovi ira, 14-19. A nodrai talatala ca na Juta, 20-30. Era sa vunauci e na vuku ni nodra viavia-yalododonu, 31-37.

¹ A SA yaco vei au na vosa i Jiova, ka vaka,

² Mo laʼki kaila e na daliga i Jerusalemi, ka kaya, Sa vosa vakaoqo ko Jiova; Au sa vakananumi iko, na nodaru veilomalomani ni ko sa gone, kei na loloma ni nodaru veimusuki, ni ko a muri au e na veikau, e na vanua sa sega ni tei.

³ Sa ka tabu ko Isireli mo nei Jiova, sai sevu ni nona vuata; o ira kece sa vakacacani koya, era na cala; a ca ga ena yacovi ira, sa kaya ko Jiova.

⁴ Dou rogoca na vosa i Jiova, na mataqali i Jekope, kei na veivale kecega ni mataqali nei Isireli:

⁵ Sa vosa vakaoqo ko Jiova, A caka cala cava era sa kunea vei au ko ira na tamamudou, me ra lako vakayawa tani kina vei au, ka muria na ka wale, ka ra sa yaco me tawa yaga?

⁶ ka ra sa sega ni kaya, Evei ko Jiova ka kauti keda cake mai na vanua ko Ijipita, ka tuberi keda e loma ni veikau, e na vanua ni talasiga kei nai keli, na vanua ni dausiga kei na yaloyalo ni mate, na vanua sa sega na tamata e lakova, ka sega na tamata e tikora?

⁷ Ia kaʼu a kauti kemudou mai ki na vanua sautu, me kania na vuana kei na kena ka vinaka; ia ni dou sa curu kina, dou sa vakadukadukalitaka na noqu vanua, ia na noqui votavota dou sa cakava me ka vakasisila.

⁸ Era sa sega ni kaya na bete, Evei ko Jiova? o ira talega na vu-ni-vunau era sa sega ni kilai au: o ira nai vakatawa era sa vuki tani vei au, o ira talega na parofita era sa daucavuti Peali, ka muria ka sa tawa yaga.

⁹ O koya o qo kaʼu na ia tiko kina na veilewai kei kemudou, sa kaya ko Jiova, io, kei ira talega na luvedra na luvemudou kaʼu na ia na veilewai.

¹⁰ Ia dou lako mada yani ki na yatu Kitimi, ka raica; ka talaki ki Kitari, ka vakananuma matua, ka kila, se dua kina na ka vakaoqo.

¹¹ Se dua li na matanitu sa vakaisosomitaka na kena kalou, ka ra sa sega ni kalou? ia ko ira na noqu tamata era sa vakaisosomitaki koya na nodrai ukuuku e na ka sa tawa yaga.

¹² Dou kidacala, na lomalagi, e na ka o qo, ia dou rikotaka, dou matabutobuto sara mai, sa kaya ko Jiova:

¹³ ni sa rua na ka ca era sa cakava na noqu tamata; oi au era sa biuta, na mata-ni-wai bula, a ra sa taya me nodra nai keli-ni-wai, nai keli-ni-wai kaca, sa sega ni malu kina na wai.

¹⁴ Sa bobula beka ko Isireli? se na luve ni bobula beka ko koya? a cava sa vakacacani kina?

¹⁵ a laioni cauravou era sa tagici koya, era sa tabalaka na domodra, ka vakalalataka na nona vanua: a nona Veikoro sa kama, sa sega e tiko kina.

¹⁶ O ira talega na gone ni Memifi kei Tapanesi era sa saulaka na buradelamu.

¹⁷ A ka o qo ko sa vakayacora vei iko, se segai, ni ko sa biuti Jiova na nomu Kalou, ni sa kauti iko e na sala?

¹⁸ Ia o qo, a cava me nomu mo sa lako kina ki Ijipita, me gunuva na wai ni Siori? se cava me nomu mo sa lako kina ki Asiria, me gunuva na wai ni Uciwai?

¹⁹ Ena vakanakuitataki iko na nomu ca, ia na nomu vuki tani ena vunauci iko: mo mani kila ka raica ni sa ka ca ka gaga na nomu biuti Jiova na nomu Kalou, ni sa sega talega ni tiko vei iko na rerevaki au, sa kaya na Turaga ko Jiova ni lewe vuqa.

²⁰ Ni sa mailiu kaʼu a musuka na kemui vua, ka drutia na kemui vau; ia ko a kaya, Au na sega ni talaidredre; ia e na ulu-ni-koro cecere kecega kei na ruku ni kau bulabula kecega ko sa lako sese kina, ka ia na dauyatagane.

²¹ Ia koi au kaʼu a tei iko me vaini vinaka ga, mo kau dinadina sara; ia ko sa qai vuki vakaevei me kau ca ni vaini tani vei au?

²² Ia ke ko sa vui iko e na lase, ka vakalevutaka na nomu vuso, ke sa ceuti tu ga e mataqu na nomu caka cala, sa kaya na Turaga ko Jiova.

²³ O sa kaya vakacava, Au sa sega ni vaqeleqeleataki, au a sega ni muri Peali? raica na nomui valavala e na buca, kila na ka ko sa cakava: na kameli totolo ko iko sa vereverea na kenai lakolako;

²⁴ kei na asa kila sa daulasa mai veikau, a ya ni sa gagano tu, sa boica na cagi; ni rau sa veiyacovi, ko cei me vakalesui koya tani? o ira kece era qarai koya, era na tawa via oca wale; ni sa oti na nona vula, era na qai kunei koya.

²⁵ Mo tarova na yavamu, me kakua ni tawa vakaivava; kei na nomui tilotilo, me kakua ni viagunu: ia ko a kaya, Sa ka li me yalolailaitaki? sa segai sara; niʼu a lomani ira na ka tani, ia kaʼu na muri ira ga.

²⁶ Me vaka ni sa madua na butako ni sa kune, sa madua vakakina na mataqali i Isireli; o ira, kei na nodra tui, kei na nodra turaga, kei na nodra bete, kei na nodra parofita,

²⁷ ni ra kaya ki na kau, O iko na tamaqu; ki na vatu talega, O iko ko a vakasucumi au: ka ni ra sa vakanadaku vei au, ka sega ni vakanamata: ia e na gauna ni nodra ca era na kaya, Mo tu cake mai, ka vakabulai keimami.

²⁸ Ia sa evei na nomu kalou ko sa cakava mo nomu? me ra tu cake mai, kevaka era vakabulai iko rawa e na gauna ni nomu ca: ni sa levu vata na nomu veikoro kei na nomu kalou, Juta.

²⁹ A cava dou na ia kina na veilewai kei au? oi kemudou kecega dou sa vuki tani vei au, sa kaya ko Jiova.

³⁰ Sa tawa yaga na noqu yaviti ira na luvemudou; era sa sega ni vakavulici kina: a nomudoui seleiwau sa kani ira na nomudou parofita, me vaka na laioni e veivakarusai.

³¹ Nai tabatamata, dou raica mai na vosa i Jiova. Kaʼu a vaka beka na veikau vei Isireli; se na vanua butobuto loaloa?, a cava era sa kaya kina na noqu tamata, Keimami sa lewa; keimami na sega ni lako tale yani vei iko?

³² Me guilecava li na gonealewa na nona ka ni ukuuku, se na alewa sa qai vakawati na nonai sulu? ia na noqu tamata era sa guilecavi au ka vakabogi tautau.

³³ A cava ko sa ia nai valavala veiwe-devi me kere loloma kina? ia ko ira talega na ca ko sa vakavulica e na nomui valavala:

³⁴ e na bui ni nomui sulu talega sa kune kina na dra ni yalodra na tawa cala era dravudravua: sa sega e na vuku niʼu sa kelia kaʼu sa kunea, sa tu ga vei ira kecega o qo.

³⁵ Ia ko sa kaya, E na vuku niʼu sa tawa cala, ena lesu tani ga vei au na nona cudru. Raica, kaʼu na ia na veilewai kei iko, e na vuku ni ko sa kaya, Au sa sega ni valavala ca.

³⁶ A cava ko sa gade voli vakalevu me vakatanitaka kina na nomui valavala? e na vuku i Ijipita talega ko na madua, me vaka ko sa madua e na vuku i Asiria.

³⁷ Io, maivei koya talega ko na lako tani kina, ka toka na ligamu ki ulumu: ni sa biuta ko Jiova na ka ko sa vakaravita, ia ko na sega ni vakayacori kina.