Jeremaia 19 - AI VOLA TABU

Na ca sa lewai me yacovi ira na kai Jutia sa vakatakarakarataki e na saqa sa vorolaka ko Jeremaia, a sa tukuna tale ni sai sau ni nodrai valavala ca, 1-15.

¹ SA vosa vakaoqo ko Jiova, Mo laʼki kauta e dua na kena saqa qele na dautuli bilo, ka so vei ira na tamata era qase, ka so vei ira na bete era qase;

² ia dou lako yani ki na buca ni luve i Inomi, mai nai curucuru ki na matamata-ni-koro mai cake, ia mo vunautaka maikea na vosa kaʼu na tukuna vei iko,

³ ka kaya, Dou rogoca na vosa i Jiova, oi kemudou na tui Juta, kei na kai Jerusalemi; Sa vosa vakaoqo ko Jiova ni lewe vuqa, na Kalou nei Isireli; Raica, au na vakayacora na ca ki na tikina o qo, ia ko ira kecega era rogoca, ena rara kina na daligadra:

⁴ ka ni ra sa biuti au, a ra sa vakacacataka na tikina o qo, a ra sa vakacaudreva kina na ka boi vinaka vei ira na kalou tani, era tawa kila, se ko ira, se na nodra qase, se ko iratou na tui Juta, a ra sa vakasinaita na yasana o qo e na kedra dra na tawa cala;

⁵ era sa tara talega na veiyasana cecere i Peali, me vakama na luvedra tagane e na buka mei soro kama vei Peali, na ka kaʼu a sega ni vakarota, se vosataka, a sa sega talega ni tubu e lomaqu.

⁶ Sa vosa vakaoqo ko Jiova, Raica, e na vuku ni ka o qo ena yaco mai kina na gauna, ena sega ni vakatokai tale kina na yasana o qo, ko Tofeci, se na buca ni luve i Inomi, ia na buca ga ni veivakamatei.

⁷ Ia kaʼu na vakatawayagataka na lewa i Juta kei Jerusalemi e na yasana o qo, kaʼu na cakava me ra bale e nai seleiwau e na matadra na nodra meca, e na ligadra talega era qarai ira me ra vakamatea: ia kaʼu na solia na yagodra me kedra na manumanu ni lomalagi, kei na manumanu ni vanua.

⁸ Ia kaʼu na cakava na koro o qo me koro rusa, ka vaka-siusiutaki: o ira kece era lako voli mai kina era na kidacala ka vakasiusiu e na vuku ni kena ca levu kecega.

⁹ Ia kaʼu na cakavi ira me kania na lewe ni luvedra tagane, kei na lewe ni luvedra alewai a ra na kania yadua na lewe ni wekana, ni sa buku na druadrua ni koro, e na vuku talega ni ka rarawa sa vakararawataki ira kina na nodra meca, kei ira era qarai ira me ra vakamatea.

¹⁰ Mo qai vorota na saqa e na matadra na tamata dou sa lako vata,

¹¹ ka kaya vei ira, Sa vosa vakaoqo ko Jiova ni lewe vuqa; Au na vorolaka vakakina na tamata o qo kei na koro o qo, me vaka sa vorolaki na kena bilo na dautuli bilo, sa sega ni caka vinaka rawa tale: a ra na ia na veibulu e Tofeci, me sega na tikina e vo me veibulu kina.

¹² Au na cakacaka vakaoqo ki na yasana o qo, sa kaya ko Jiova, kivei ira talega na lewena, ia kaʼu na cakava na koro o qo me vakai Tofeci:

¹³ ena yaco talega na veivale mai Jerusalemi, kei na nodratou veivale na tui Juta, me tawa savasava me vaka na tikina ko Tofeci, e na vuku ni vale kecega era sa vakacaudreva e delana na ka boi vinaka ki na kalokalo ni lomalagi kecega, ka livia nai sevu vei ira na kalou tani.

¹⁴ SA qai lako tani mai Tofeci ko Jeremaia, ka talai koya yani kina ko Jiova me ia na parofisai; a sa laʼki tu e na lomanibai ni vale i Jiova; a sa kaya vei ira na tamata kecega,

¹⁵ Sa vosa vakaoqo ko Jiova ni lewe vuqa, na Kalou nei Isireli; Raica, au na vakayacora ki na koro o qo, kei na kena veikoro kecega na ca kecega kaʼu a vosa kina e na vukuna, e na vuku ni ra sa vakadomoqataki ira, me ra kakua ni rogoca na noqu vosa.