Jeremaia 15 - AI VOLA TABU

Era sa biuti, ka lewai me cudruvi ga ko ira na kai Jutia, 1-9. O Jeremaia, ni sa vosavakacacani, sa tagi vua na Kalou, a sa vakaceguya ko koya e na vosa loloma vua, kei na vosa veivakararawataki vei ira, 10-14. Sa masu ko koya, a sa rogoci na nona masu, 15-21.

¹ A SA kaya vei au ko Jiova, Ke rau tu ko Mosese kei Samueli e mataqu, ke na sega ga ni gole na lomaqu vei ira na tamata o qo: biuti ira tani e mataqu, me ra lako tani ga.

² Ia ena yaco, kevaka era kaya vei iko, Me keimami lako yani kivei? mo qai kaya vei ira, Sa vosa vakaoqo ko Jiova; O ira sa lako ki na mate, ki na mate ga; kei ira sa lako ki nai seleiwau, ki nai seleiwau ga; kei ira sa lako ki na viakana, ki na viakana ga; kei ira sa laʼki bobulataki, ki na veivakabobulataki ga.

³ Ia na yavusa e va kaʼu na lesia me rawai ira, sa kaya ko Jiova: nai seleiwau me ia na veivakamatei, kei na koli me ia na veidresulaki, kei na manumanu ni lomalagi, kei na manumanu ni vanua, me kania ka vakarusai ira.

⁴ Ia kaʼu na soli ira me veikauyaki ki na veimatanitu kecega e vuravura, e na vuku i Manase na luve i Isikiya na tui Juta, e na vuku ni ka sa cakava e Jerusalemi.

⁵ Ia ko cei ena lomani iko, Jerusalemi? se ko cei me na tagicaki iko? se ko cei me na lesu tani me laʼki taroga, se vakaevei na nomu tiko?

⁶ O iko ko sa biuti au, sa kaya ko Jiova, o sa lako kimuri: o koya o qo kaʼu na dodoka kina na ligaqu vei iko, ka vakarusai iko; au sa oca e na veivutuni.

⁷ Ia kaʼu na irivi ira e nai iri e na matamata-ni-koro ni vanua; kaʼu na vakawayalitaki ira, kaʼu na vakarusai ira na noqu tamata, ni ra sa sega ni saumaki mai na nodrai valavala.

⁸ Sa ka levu mai vei au na nodra alewa dawai, ka lailai na mata ni nuku ni wasawasa; au sa vakayacora vei ira, io, vua na tinadra na cauravou e dua na dauvakacaca e na siga levu: au sa cakava me vakidacala na nona lutuki koya, ia na ka veivakarerei ki na koro.

⁹ Sa malumalumu mai ko koya sa vakasucuma e lewe vitu: sa ciba ko koya: sa dromu na nona mata-ni-siga ni sa siga toka: sa madua ka taqaya ko koya: ia na kedra vo kaʼu na solia ki nai seleiwau e matadra na nodra meca, sa kaya ko Jiova.

¹⁰ Ule koi au, tinaqu, ni ko sa vakasucumi au me tamata dauveileti ka tamata dauveivala kei vuravura kecega! au a sega ni soli lavo meʼu vakaisausaumi tawa dodonu kina, a sa sega e so era vakaisausaumi tawa dodonu vakakina vei au; ia ko ira kece era sa rukaki au ga.

¹¹ Sa kaya ko Jiova, E dina, na vo ni nomu bula ena vinaka ga; e dina, kaʼu na cakava na meca me ia na veisorosorovi kei iko e na gauna ni ca kei na gauna ni rarawa.

¹² Me dua li na aironi me vorota na aironi vaka-tokalau kei na parasa?

¹³ na nomui yau kei na nomu ka talei kaʼu na solia ga me tokitaki wale, me sega na kenai voli, io e na vuku ni nomui valavala ca kecega e na nomui yalayala kecega:

¹⁴ ia kaʼu na vakalakovi kemudou kei na nomu meca ki na vanua ko sa sega ni kila: ni sa dua na buka sa tutuvaki e na noqu cudru, ena kati kemudou.

¹⁵ O iko, Jiova, ko sa kila ga: mo nanumi au, ka mai raici au, ka cudruvaki au vei ira era vakacacani au; kakua ga, e na vuku ni nomu dauvosota, ni ko kauti au tani: kila ga, ni sai iko kaʼu sa vakarogocataki kina.

¹⁶ Sa kune na nomu vosa, ia kaʼu a kania; a sa yaco na nomu vosa me ka ni rereki kei na marau ni lomaqu: ni sa vakatokai vei au na yacamu, Jiova na Kalou ni lewe vuqa:

¹⁷ kaʼu a sega ni tiko e na nodrai soqosoqo na dauveivakalialiai, seʼu mamarau; e na vuku ni ligamu kaʼu a tiko duaduaga: ni ko sa vakasinaiti au e na cudru levu.

¹⁸ A cava sa dei kina na noqu rarawa me tawa mudu, kei na noqu vue me tawa bula rawa, a sa bese ni bula? mo sa vaka dina sara beka e dua na daulasu vei au, ka vaka na wai yaliyali?

¹⁹ O koya o qo sa vosa vakaoqo kina ko Jiova, Kevaka ko na saumaki mai, kaʼu na qai vakayacori iko tale, mo tu ga e mataqu: ia kevaka ko na wasea tani na ka talei mai na ka tawa yaga, ko na qai vaka na gusuqu: me ra saumaki mai vei iko ko ira; ia ko iko mo kakua ni saumaki vei ira.

²⁰ Ia kaʼu na cakavi iko mo kedra bai parasa e vakaivalu na tamata o qo: era na veivala kei iko, a ra na sega ni gumatua vei iko: niʼu sa tiko kei iko me vakabulai iko ka kaliraki iko, sa kaya ko Jiova:

²¹ ia kaʼu na kaliraki iko mai na ligadra na tamata ca, ka vakabulai iko mai na ligadra na daurerevaki.