Jeremaia 13 - AI VOLA TABU

Sa vakatakarakarataki na nodra rusa na kai Jutia e nai vau malo sa vunitaki e na qaravatu, 1-11. Sa tukuni e na vosa vakatautauvata ni ra na mateni e na ka rarawa, 12-14. Sa vakarota vei ira na veivutuni, me vakadaroi kina na nodra cudruvi, 15-22. A nodrai valavala ca ga na vu ni nodra cudruvi, 23-27.

¹ SA vosa vakaoqo vei au ko Jiova, Mo laʼki kauta e dua na nomui vau malo, ka vauca kina na tolomu, ia mo kakua ni tonia e na wai.

² Au a qai kauta e dua nai vau me vaka na vosa i Jiova, ka vauca kina na toloqu.

³ A sa baki yaco tale vakarua vei au na vosa i Jiova, ka vaka,

⁴ Mo kauta na nomui vau o qori, sa vau kina na tolomu, katu cake mo lako ki na Uferetisi, ka vunia maikea e na qaravatu.

⁵ Au a qai lako, ka vunia mai na Uferetisi, me vaka ka vosa vei au ko Jiova.

⁶ A sa yaco ni sa oti na bogi e vuqa, sa qai kaya vei au ko Jiova, Tu cake, mo lako ki na Uferetisi, ka kauta maikina nai vau, a ya kaʼu a kaya mo vunia maikea.

⁷ Au a qai lako ki na Uferetisi, ka keli, ka kauta nai vau mai na tikina kaʼu a vunia kina: ka, raica, sa ca mai nai vau, sa sega e dua na ka e yaga kina.

⁸ Sa qai yaco mai vei au na vosa i Jiova, ka vaka,

⁹ Sa vosa ko Jiova, Ena vakaoqo kaʼu na vakacacana na viavialevu i Juta, kei na viavialevu i Jerusalemi sa levu.

¹⁰ A tamata ca o qo, era bese ni rogoca na noqu vosa, era muria na kaukauwa ni lomadra, era muria talega na kalou tani, me qaravi ira, ka soro vei ira, era na vaka ga nai vau o qo, a ya sa sega e dua na ka e yaga kina:

¹¹ ni sa vaka sa kabita nai vau na tolo ni tamata, kaʼu sa vakabita vakakina vei au na mataqali kecega i Isireli kei na mataqali kecega i Juta, sa kaya ko Jiova; me ra yaco me noqu tamata, meʼu rogo, ka vakavinavinakataki, ka vakarokorokotaki kina: ia era bese ga ni vakarorogo.

¹² Ia mo tukuna vei ira na vosa o qo, Sa vosa vakaoqo ko Jiova na nodra Kalou na Isireli, A tavaya kece ena vakasinaiti ga e na waini: a ra na kaya vei iko, Se keimami sa lecava beka ni na vakasinaiti na tavaya kecega e na waini?

¹³ Mo qai kaya vei ira, Sa vosa vakaoqo ko Jiova, Raica, oi au kaʼu na vakasinaiti ira kecega na lewe ni vanua o qo, io ko ira na tui era sa tiko e nai tikotiko i Tevita, kei ira na bete, kei ira na parofita, kei ira kece na kai Jerusalemi, me ra mateni:

¹⁴ kaʼu na veiviritaki ira vata na tamata kei na kai nona, io ko ira vata na qase kei na luvedra, sa kaya ko Jiova: kaʼu na sega ni lomana, se vosota, se yalololoma kina, kaʼu na vakarusai ira ga.

¹⁵ Dou rogoca, ka vakatu daliga; dou kakua ni viavialevu: ni sa vosa ko Jiova.

¹⁶ Dou vakarokorokotaki Jiova na nomudou Kalou, ni sa sega ni vakayacora na butobuto, ni sa sega talega ni tarabe na yavamudou e na veiulu-ni-vanua loaloa; ka dou sa yadrava na rarama, ka sa vukica ga ko koya me yaloyalo ni mate, ka cakava me butobuto sara.

¹⁷ Ia kevaka dou na sega ni rogoca, ena tagi e na tikina vuni na yaloqu e na vuku ni nomudou viavialevu; ena tagi vakalevu na mataqu, ia ena dave maikina na wai, e na vuku ni sa vakabobulataki na qele ni sipi i Jiova.

¹⁸ Mo kaya vei rau na tui kei na ranadi, Drau vakamalumalumutaki kemudrau, drau tiko sobu: ni na lako sobu mai na kemudrau ka levu, io na nomudraui sala vakaiukuuku:

¹⁹ a veikoro mai na mata ni ceva ena sogo tu, ka sega e dua me dolava: era na kauti tani na Juta kecega, era na kauti tani vakaoti sara.

²⁰ Ta cake e na matamudrau, ka raici ira era sa lako mai na mata ni tokalau: sa evei na qele ni sipi ka soli vei iko, na nomu sipi matavinaka?

²¹ A cava mo qai kaya ni sa qai cudruvi iko ko koya? ia ko iko ga ko sa vakavulici ira me ra nomu turaga, me ra liu: me sega beka na rarawa me tauvi iko, me vaka na alewa sa taratara?

²² Ia kevaka ko sa kaya e lomamu, E na vuku ni cava sa yacovi au kina na ka o qo? E na vuku ni levu ni nomu caka cala sa luvati kina na bui ni nomui sulu, ka dresulaki tani sara mai na bukubuku-ni-yavamu.

²³ Sa vakatanitaka li na kai Kusi na kulina, se na leparite na kena veivolavolai? se dou na qai rawata me caka vinaka, oi kemudou sa vuku ga ni caka ca:

²⁴ o koya o qo kaʼu na dui vakasevi ira tani kina me vaka na vu-ni-sila sa cagina tani e na cagi mai veikau:

²⁵ sa kemu ga o qo, nai votavota kaʼu sa vakarauta me nomu, sa kaya ko Jiova; e na vuku ni ko sa guilecavi au, ka vakaravita na ka lasu:

²⁶ ia koi au kaʼu na luvata kina na bui ni nomui sulu ki matamu, me votu kina na nomu madua.

²⁷ A nomu veibutakoci, kei na nomu daugarogaro, kei na levu ni nomu dauyatagane e na veiyasana cecere ni vanua, io na nomui valavala vakasisila, kaʼu sa raica oti. Ena ca vei iko, Jerusalemi! o na sega li ni vakasavasavataki? me na yaco mada ga ninaica?