Jeremaia 10 - AI VOLA TABU

Na ka dauveivakalialiai na matakau, 1-16. Sa tagicaki ira na kai nona ko Jeremaia, ni sa voleka mai na kedra ca, 17-22. Sa ia vakaya-lomalumalumu na masu, 23-25.

¹ DOU rogoca na vosa sa tukuna ko Jiova vei kemudou na mataqali i Isireli:

² sa vosa vakaoqo ko Jiova, A nodrai valavala na veimatanitu dou kakua ni vulica, ia e nai vakatakilakila ni lomalagi dou kakua ni taqaya kina; ni ra sa taqaya kina na veimatanitu.

³ Ni sa ka lasu na nodrai valavala na tamata: ni sa dua na kau sa taya mai veikau, na cakacaka ni liga ni matai e na matau:

⁴ e na siliva kei na koula era sa vakaiukuukutaka kina; e nai vako kei nai tukituki era vakadeitaka, me kakua ni yavala:

⁵ sa vaka na balabala na kena tu donu, ia ka sa sega ni vosa: sa daucolati tu, ni sa sega ni lako rawa. Kakua ni dou rerevaka na ka o qori; ni sa sega na ca e cakava rawa, a sa sega talega na vinaka sa rawa vei ira me cakava.

⁶ E na vuku ni sa sega e dua me vakataki iko, Jiova; sa levu ko iko, a sa levu na yacamu e na kaukauwa:

⁷ o cei me na sega ni rerevaki iko, na Tui ni veimatanitu? ni sa kilikili kei iko: io vei ira kece na vuku e na veivanua, kei na nodra veimatanitu kecega, sa sega e dua me vakataki iko.

⁸ Ia era sa yalosese vata ka lialia ga: na kau vakai koya ga sa veivunauci kei na nodra ka lasu:

⁹ nai botani siliva sa kau mai Tarisisi, kei na koula mai Ufasi, na cakacaka ni matai, kei na liga i koya na matai ni koula: na ka loaloa ka damudamu sa kedrai sulu: na nodra cakacaka kecega na ta mata vuku:

¹⁰ ia ko Jiova ga na Kalou dina ko koya, na Kalou bula, kei na tui tawa mudu: ni sa cudru ko koya, ena sautaninini ko vuravura, ia na veimatanitu ena sega ni vosota rawa na nona cudru.

¹¹ (Mo dou vosa vei ira me vakaoqo, A kalou, era sa sega ni cakava na lomalagi kei na vuravura, era na rusa tani yani mai dela ni vuravura, mai na ruku ni lomalagi o qori talega.)

¹² Sa cakava na vanua ko koya e na nona kaukauwa, ka vakataudeitaki vuravura e na nona vuku, ka tevuka yani na lomalagi e na nona yalomatua:

¹³ ni sa tabalaka na domona, sa levu na wai mai lomalagi, a sa vakuvuca cake ko koya na kabukabu mai na vu-ni-lagi; sa cakava na livaliva kei na uca, a sa kauta mai na cagi mai na nona lololo.

¹⁴ Sa vakasesei tani na tamata kecega mai na vuku: sa vakamaduataki na matai kecega e na matakau ceuceu: ni sa ka lasu sara na nona matakau e vakawaicalataki, a sa sega na cegu e lomadra.

¹⁵ Sa ka lasu ga o qori, na cakacaka dauveivakalialiai: e na gauna era cudruvi kina era na rusa.

¹⁶ Sa sega ni vakakina na nodrai votavota na Jekope: ni sa bulia na ka kecega ko koya; ia ko ira na Isireli, era sai votavota sa taukena ko koya: o Jiova ni lewe vuqa na yacana.

¹⁷ MO vakasoqona na nomui yaya e na vanua, o iko na lewe ni koro kaukauwa:

¹⁸ ni sa vosa vakaoqo ko Jiova, Raica, oi au, kaʼu na rabotaki ira tani na lewe ni vanua me vakadua ga o qo, kaʼu na vakararawataki ira, me ra kunea sara.

¹⁹ Ule na noqu vue! sa ka rarawa na noqu yaviti: ia koi au kaʼu a kaya, E dina sa ka veivakararawataki o qo, ia kaʼu sa na vosota ga.

²⁰ A noqu vale malo, sa vakacacani, a noqu dali kecega, sa cavuka: a luvequ, era sa lako tani vei au, era sa yali: sa sega e dua me birika tale na noqu vale malo, se rubeca na noqu gatu.

²¹ Ni ra sa yalosese mai nai vakatawa, ia ko Jiova, era sa sega ni qarava: o koya o qo era na sega ni cakacaka yaco kina, ia na nodra sipi kecega ena dui vakasevi.

²² Raica, na domo ni rogorogo sa rogo mai, ia na ue levu mai na vanua mai na tokalau, me cakava na Veikoro vaka-Juta me lala, me qara ni gata lelevu.

²³ Au sa kila, Jiova, ni sa sega ni mai vua na tamata na nona sala: sa sega ni mai vua na tamata sa lako tu me lewa rawa na nonai lakolako:

²⁴ mo vakanakuitataki au, Jiova, e na lewa vinaka ga, me kakua e na nomu cudru, do ko vakarusai au sara:

²⁵ sovaraka na nomu cudru ki na veimatanitu sa tawa kilai iko, kei na veiyavusa sa sega ni masuta na yacamu: ni ra sa kani ira na Jekope, ka tilomi ira, ka vakaoti ira, ia na nodrai tikotiko era sa vakalalataka.