Jeremaia 1 - AI VOLA TABU

A WASE I. —A gauna i Jeremaia, kei na nona lesi me parofita, 1-10. A raivotu ni taba ni amodi, Itei na kuro sa cawa, 11-13. A ka bibi sa lewai me yacovi ira na Juta, 11-16. Sa vakaukauwataki Jeremaia na Kalou e na nona vosa ni yalayala, 17-19.

¹ A VOSA i Jeremaia na luve i Ilikiya, e dua vei ira na bete era tiko mai Anacoci e na vanua ko Penijamini:

² a sa yaco vua na vosa i Jiova e na gauna i Josaia na luve i Amoni na tui Juta, e nai katinikatolu ni yabaki ni nona lewa.

³ A sa baki yaco tale e na gauna i Jioiakimi na luve i Josaia na tui Juta, ka yacova nai otioti ni kenai katinikadua ni yabaki i Sitikiya na luve i Josaia na tui Juta, ka yaco ki na siga sa kauti vakabobula kina ko Jerusalemi e nai kalima ni vula.

⁴ A SA yaco vei au na vosa i Jiova, ka vaka,

⁵ Niʼu a sega ni buli iko e na kete, kaʼu sa kilai iko; ia ni ko a sega ni lako mai na kete, kaʼu sa vakatabui iko, ka lesi iko mo nodra parofita na veimatanitu.

⁶ Au a qai kaya, Ule, Turaga Jiova! raica, kaʼu sa tawa kila vosa: niʼu sa gone ga koi au.

⁷ A sa vosa vei au ko Jiova, Mo kakua ni kaya, Au sa gone koi au: ni ko na lako vei ira kecega kaʼu sa talai iko kina, na ka kece talega kaʼu sa vakarota vei iko, ko na tukuna.

⁸ Mo kakua ni rerevaka na matadra: niʼu sa tiko kei iko koi au, me vakabulai iko, sa kaya ko Jiova.

⁹ A sa dodoka mai na ligana ko Jiova, ka tara na gusuqu. A sa kaya vei au ko Jiova, Raica, kaʼu sa tauca na noqu vosa ki na gusumu.

¹⁰ Raica, kaʼu sa lesi iko e na siga o qo ki na veivanua kei na veimatanitu, me cavuta, ka basuka, ka vakarusa, ka talaraka, ka tara, ka tea.

¹¹ A sa yaco vei au na vosa i Jiova, ka vaka, Jeremaia, a cava ko sa raica? Au a kaya, E dua na taba ni amodi kaʼu sa raica.

¹² A sa kaya vei au ko Jiova, Ko sa raica vinaka: niʼu na vakusarawataka na noqu vosa meʼu vakayacora.

¹³ A sa baki yaco tale vakarua vei au na vosa i Jiova, ka vaka, A cava ko sa raica? Au a kaya, E dua na kuro sa cawa kaʼu sa raica, ia na matana sa donuya na mata ni tokalau.

¹⁴ A sa kaya vei au ko Jiova, Mai na tokalau ena kabucaracara mai na ca vei ira kecega na lewe ni vanua:

¹⁵ niʼu na kaciva kece dina ga na mataqali ni veimatanitu mai na tokalau, sa kaya ko Jiova; a ra na lako mai, a ra na dui viritura na nodrai tikotiko vakaturaga ki na matamata-ni-koro ko Jerusalemi, kei na kena bai kecega e volita, kei na Veikoro vakadula kecega:

¹⁶ ia kaʼu na cavuta na noqu lewa vei ira e na vuku ni nodra ca kecega, era sa biuti au, ka vakacaudreva nai madrali boi vinaka ki na kalou tani, ka sorova na cakacaka ni ligadra.

¹⁷ Ia ko iko, mo vauca na tolomu, ka tu cake, ka tukuna vei ira na ka kecega kaʼu sa vakarota vei iko: kakua ni ko rerevaka na matadra, deʼu vakataqayataki iko e matadra:

¹⁸ ia koi au, raica, kaʼu sa cakavi iko e na siga o qo me koro kaukauwa, ka duru kaukamea, ka bai parasa ki na vanua taucoko, vei ira na tui Juta, vei ira na kena turaga, vei ira na kena bete, kei ira na lewe ni vanua:

¹⁹ ia era na veivala kei iko; a ra na sega ni gumatua vei iko; niʼu sa tiko kei iko, sa kaya ko Jiova, meʼu vakabulai iko.