Jemesa 5 - AI VOLA TABU

Sa cudruvi ira na tamata vutuniyau na Kalou ni ra sa tamatai valavala ca, 1-6. Ai valavala e kilikili kei ira na tamata lotu, 7-12. A ka e yaga sara na masu, 13-18. Sa ka vinaka na saumaki ira na tamata sa cala, 19, 20.

¹ DOU lako mai, oi kemudou na tamata vutuniyau, dou tagi ka qoqolou e na vuku ni nomudou ka rarawa ena yaco mai.

² Sa vuca na nomudoui yau, a sa kania na nomudoui sulu na sarasara.

³ Sa veveka na nomudou koula kei na siliva; ka na tukuni kemudou na kena veveka, ka na kania na lewemudou me vaka na buka-waqa. Dou sa kumuna vata nai yau me yacova na gauna maimuri sara.

⁴ Raica, sa tagi na nodrai voli na tamata daucakacaka, era sa tamusuka na nomudou veiwere, o koya dou sa bureitaka: ia sa cura ki na daligana na Turaga ni lewe vuqa na nodra tagi era sa dautamusuka.

⁵ Dou a marau tikoga e vuravura, dou a daukana tiko; dou a dauvakania na lomamudou, me vaka ni sa siga sa ia kina na dauveivakamatei.

⁶ Dou a lewai Koya sa yalododonu, dou a vakamatea; sa sega ni vorati kemudou ko koya.

⁷ O koya ga o qo, na veiwekani, mo dou qai vosota, me yaco mada na nona lako mai na Turaga. Raica, nai vakatau-ni-were sa waraka na vua ni qele e talei, a sa wawa vakadede, me rawata mada na uca sa liu, o qori talega sa muri.

⁸ Dou wawa koi kemudou talega; vakataudeitaka na yalomudou: ni sa roro mai na nona lako mai na Turaga.

⁹ Dou kakua ni dui vosakudrukudru, na veiwekani, de dou cudruvi: raica, sa tu e na mata ni katuba na Dauveilewai.

¹⁰ Oi kemudou na wekaqu, vakadamurimuri ira na parofita, e na nodra vosota na ka rarawa, kei na nodra dauvosota, era a vosa e na yaca ni Turaga.

¹¹ Raica, eda sa dauvakatokai ira era sa vosota me kalougata. Dou a rogoca na dauvosota nei Jope, dou sa raica talega ni sa tinia vakaevei ko na Turaga; ni sa yalovinaka sara na Turaga, ka sa dauloloma.

¹² Ia na ka levu sara o qo, oi kemudou na wekaqu, mo dou kakua sara ni bubului, kakua ki lomalagi, se ki vuravura, se e dua tani na bubului: me io ga na nomudou io; ia me segai ga, na segai; de dou cudruvi kina.

¹³ Kevaka e dua vei kemudou sa vakararawataki, me masu tiko. Kevaka e dua sa marau, me sere.

¹⁴ Kevaka e dua vei kemudou sa tauvi-mate, me kacivi ira na qase ni vavakoso lewe ni soro; ia me ra masulaki koya, ka walia e na waiwai e na yaca ni Turaga:

¹⁵ ia na masu ni vakabauta ena vakabulai koya sa tauvi-mate, ka na vakabulai koya ko na Turaga, ia kevaka ka kitaka nai valavala ca, ena sega ni cudruvi kina.

¹⁶ Vakatusa vakai kemudou nai valavala ca, ka veimasulaki, mo dou vakabulai kina. Sa kaukauwa vakalevu na nona masu gumatua na tamata yalododonu.

¹⁷ A tamata sa vakataki keda sara ko Ilija, a sa masu vakaukauwa me kakua ni tau na uca; a sa sega kina ni tau mai na uca e vuravura, a sa oti mada na yabaki e tolu kei na vula e ono.

¹⁸ A sa qai masu tale, a sa solia na uca ko lomalagi, a sa vuataka na vuana na qele.

¹⁹ Oi kemudou na veiwekani, kevaka e dua vei kemudou sa cala mai nai vakavuvuli dina, a sa dua sa saumaki koya tale;

²⁰ me kila ko koya o qo, o koya sa saumaka tale na tamata caka cala mai na nonai valavala e cala sa vakabula na yalo mai na mate, a sa ubia talega nai valavala ca e vuqa.