Jemesa 4 - AI VOLA TABU

Sa tukuna ni sa tubu nai valu mai na yaloca, 1; a sa sega ni yaco na noda gadreva ni da sa yaloca, 2, 3. Me da kakua ni lomavata kei ira na tamata e tawa lotu, 4, 5. E ca na qaciqacia, 6-16. Sa ca ko ira era sa kila na ka dodonu, ka sega ni muria, 17.

¹ SA maivei na veiba kei na veivala vei kemudou? sa sega li mai na nomudou marau sa veivala e na veitiki ni yagomudou?

² Dou sa kocokoco, ka sega ni rawata: dou sa ravuravu, ka dauvuvu, ka sega ni taura rawa me nomudou: dou sa veivala ka veiba, ia dou sa sega ni rawata kina, e na vuku ni dou sa sega ni kerekere.

³ Dou sa kerekere ga, ka sega ni rawata, e na vuku ni dou sa kerekere vakaca, mo dou volitaka e na nomudou marau.

⁴ Oi kemudou na dauyalewa kei na dautagane, dou sa sega beka ni kila, ni sa Veicati kei na Kalou na lomana na veika vakavuravura? ia sa veimecaki kei ua Kalou ko koya sa via lomana na veika vakavuravura.

⁵ Dou sa vakasama beka ni sa kaya walega nai Vola, Sa gadreva vakavuvu ko na Yalo sa tiko e na lomada?

⁶ Ia ka sa solia vakalevu na loloma ko koya. O koya sa kaya kina ko koya, O ira sa qaciqacia sa vorati ira ko na Kalou, a sa solia na loloma vei ira era sa yalomalumalumu.

⁷ O koya mo dou qai vakamalumalumutaki kemudou vua na Kalou. Vorata na tevoro, ena dro tani kina vei kemudou ko koya.

⁸ Toro o leka yani vua na Kalou, ka na toro voleka mai ko koya vei kemudou. Vakasavasavataka na ligamudou, oi kemudou na lomalomarua.

⁹ Dou mai rarawa, ka qoqolou, ka tagi: me saumaki na nomudou dredre me qoqolou, kei na nomudou marau me mata-veveku.

¹⁰ Dou vakamalumalumutaki kemudou e na mata ni Turaga, ka na laveti kemudou cake ko koya.

¹¹ Kakua ni dou veikaseti, na veiwekani. O koya sa kaseta na wekana, ka lewai koya na wekana, sa kaseta na vunau talega, ka sa lewa na vunau: ia kevaka ko sa lewa na vunau, ko sa qai sega ni muria na vunau, ko sa lewa ga.

¹² Sa dua bauga sa lesia na vunau, sa ia rawa ko koya na veivakabulai, kei na veivakarusai: o cei ko iko mo lewa e dua tani?

¹³ Dou lako mai, oi kemudou sa daukaya, Edaidai se na sabogibogi eda na lako ki na koro ko ya, ka tiko kina me oti mada e dua na yabaki, ka veivoli kina, ka rawata nai yau:

¹⁴ ia dou sa sega ni kila na ka ni sabogibogi: ni sa cava na nomudou bula? A cawa walega, sa rairai ga ka vakadede vakalailai ga, a sa qai seavu yani.

¹⁵ Ia o qo mo dou kaya, Kevaka sa vinaka vua na Turaga, eda na bula, ka kitaka na ka o qo, se na ka ko ya.

¹⁶ Ia dou sa qai marau e na nomudou qaciqacia: e ca na marau kecega sa vakakoya.

¹⁷ O koya sa ca kina vei koya sa kila me caka vinaka, ka sega ni kitaka.