Jemesa 1 - AI VOLA TABU

A WASE I. —Sa vakarota ko Jemesi me ra reki na tamata lotu ni ra sa vakararawataki, 1-12. Oi keda ga eda sa vakatekivuna na ca, ia sa vu ni ka vinaka ko na Kalou, 13-18. Me da daurogoca, ka vakananuma ka muria na vosa ni Kalou; kevaka eda sega ni vakakina eda lotu lasu ga, 19-27.

¹ O JEMESI, nai talatala ni Kalou kei na Turaga ko Jisu Karisito, sa loloma yani vei ira na yavusa e tinikarua era sa duiveiseyaki.

² Oi kemudou na wekaqu, dou nanuma me ka ni reki sara, ni dou sa lutu ki na ka e vuqa sa dauveivakatovolei;

³ ni dou sa kila ni sa vakatubura na dauvosota na vakatovolei ni nomudou vakabauta.

⁴ Ia me tini vinaka na cakacaka ni dauvosota, mo dou qisi taucoko sara kina, me kakua na ka e yali.

⁵ Ia kevaka e dua vei kemudou sa lailai na vuku vei koya, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ena soli ga vua.

⁶ Ia me kerekere e na vakabauta, me kakua ni vakatitiqa. Io, ko koya sa vakatitiqa, sa vaka na ua ni waitui, sa cagina e na cagi ka veitubuyaki.

⁷ Ia me kakua ni vakasama na tamata ko ya ni na rawata e dua na ka mai vua na Turaga:

⁸ a tamata sa lomalomarua, sa yameke-meke e na nonai valavala kecega.

⁹ Ia me reki na tamata dravudravua e na nona laveti cake:

¹⁰ kei koya e vutuniyau, e na nona vakalolovirataki: ni na takali ga me vaka na se ni co.

¹¹ Ni sa cabe cake na siga ka todramakausu na kena buno, a sa vakamalaitaka sara na co, a sa mira na sena, a sa rusa na kena rairai vinaka ni yagona: ena malai yani vakakina na tamata vutuniyau e na nonai valavala.

¹² Sa kalougata na tamata sa vakatovolei ka vosota ga; io, ni sa vakatovolei oti, ena rawata nai sala ni bula o koya sa yalataka ko na Turaga kivei ira sa lomani koya.

¹³ Ni sa dauveretaki e dua, me kakua ni kaya, Sa dauveretaki au ko na Kalou: ni sa sega ni dauveretaki rawa na Kalou me valavala ca, a sa sega ni dauveretaka e dua na tamata ko koya:

¹⁴ ia ka sa dauveretaki na tamata yadua, ni sa vecei koya na nona garova ca ka bacani koya.

¹⁵ Ni sa qai kunekune na garova ca, sa vakasucuma kina nai valavala ca: a sa oti nai valavala ca, sa qai vakasucuma na mate.

¹⁶ Dou kakua ni cala, oi kemudou na wekaqu lomani.

¹⁷ Sa maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama, a sa sega vua na veivukiyaki, se veigoleyaki ni yaloyalona.

¹⁸ Sa vakasikavi keda ko koya e na nona veitalia ga e na vosa ni dina, me da vaka nai sevu ni veika sa bulia ko koya.

¹⁹ O koya o qo, oi kemudou na wekaqu lomani, mo dou kusarawa yadua me vakarorogo, mo dou berabera ga ni vosa, mo dou berabera ni cudru:

²⁰ ni sa sega ni vakatubura na ka e dodonu vua na Kalou na cudru ni tamata.

²¹ O koya o qo mo dou qai biuta tani na dukadukali kei na ka ca e vuabale tu, ka vakabauta e na yalomalua na vosa sa tei e na lomamudou, ko ya sa vakabula rawa na yalomudou.

²² Ta dou muria na vosa ka kakua ni rogoca walega, ka vakaisini kemudou kina vakai kemudou.

²³ Ia kevaka e dua sa rogoca walega na vosa, ka sega ni muria, sa tautauvata kei na tamata sa laʼki ilova na mata ni yagona e nai iloilo:

²⁴ ni sa laʼki ilovi koya, a sa qai lako tani yani, a sa guilecava vakasauri se sa vakaevei nai valavala ni yagona.

²⁵ Ia ko koya sa vakaraica matua ki na vunau vinaka sara ni lalaga, ka tu dei, sa sega ni daurogoca ka guilecava ko koya o qo, a sa kitaka talega na cakacaka ena kalougata kina ko koya o qo e na nona cakacaka.

²⁶ Kevaka e dua vei kemudou sa nanuma ni sa lotu, ia ka sega ni tarova na yamena, a sa dauvakaisina talega na yalona, sa ka walega na nona lotu na tamata o qo.

²⁷ Na lotu savasava ka tawa cala e mata ni Kalou ko Tamada sa vakaoqo, Me sa dauraici ira na luveniyali kei ira na yada, ni ra sa rarawa, me sa qarauni koya talega me kakua ni tauvi-duka e na ka vakavuravura.