Isikeli 8 - AI VOLA TABU

Sa vakatakilai tei Isikieli e na raivotu ni Kalou mai Jerusalemi, 1-4, na matakau i na Vuvu e na vale tabu, 5, 6, kei na nodra vale ni ka vakalialia na qase ni vanua, 7-12, kei ira na alewa era tagicaki Tamusi, 13, 14, kei na tamata era qarava na mata-ni-siga, 15-17. Sa cudru vakalevu sara ko Jiova e na vuku ni nodra qarava na kalou lasu, 18.

¹ A SA yaco e nai kaono ni yabaki, e nai kaono ni vula, e nai kalima ni siga ni vula, niʼu a tiko e na noqu vale, ia ko ira na qase ni Juta era sa tiko e mataqu, sa qai tauci au maikea na liga ni Turaga ko Jiova.

² Au a qai vakasarava, ka raica, sa dua nai vakatakarakara ka rairai me vaka sa buka waqa: mai na ka e rairai me vaka na tolona ka lako sobu, sa buka waqa; mai na tolona talega ka lako cake, sa rairai me vaka na rarama, me vaka na parasa matavinaka.

³ A sa dodoka mai ka vaka sa ligana, ka tauri au e na drau ni uluqu; a sa laveti au cake na Yalo e na maliwa kei vuravura kei lomalagi, a sa kauti au e na raivotu ni Kalou ki Jerusalemi, ki na matamata-ni-koro kiloma sa donuya na mata ni tokalau; a sa tu maikina nai tikotiko ni matakau i na Vuvu, e sa ia na vei vakavuvutaki.

⁴ Ka, raica, sa tu maikea nai ukuuku ni Kalou nei Isireli, me vaka na raivotu kaʼu a raica e na buca.

⁵ Sa qai kaya vei au ko koya, Na luve ni tamata, mo ta cake mada e na matamu ki na sala kivakaki na tokalau. Au a qai ta cake e na mataqu ki na sala kivakaki na tokalau, ka, raica, sa tu mai na mata ni tokalau mai na matamata-ni-koro ni cabocabo-ni-soro na matakau ko ya i na Vuvu mai nai curucuru.

⁶ A sa kaya tale vei au ko koya, Na luve ni tamata, ko sa kunea li na ka era cakava? io na ka vakasisila vakalevu era sa cakava eke na mataqali nei Isireli, meʼu lako vakayawa tani kina mai na noqu vale tabu? ia mo lesu tale, mo mai raica na ka vakasisila vakalevu cake.

⁷ A sa kauti au ko koya ki na mata ni bai; ia niʼu a vakasarava, raica, sa dua na qara e na bai vatu.

⁸ Sa qai kaya vei au ko koya, Na luve ni tamata, mo keli mada ki na bai o qo: ia niʼu a keli ki na bai, raica, sa dua na katuba.

⁹ A sa kaya vei au ko koya, Mo curu yani, mo raica na ka vakasisila ca sara era sa cakava eke.

¹⁰ Au a qai curu yani ka vakasarava; ka raica kece na yavusa ka daukasi, kei na manumanu vakasisila, kei na nodra matakau kece na mataqali nei Isireli, sa volai vakavolivoliti tu ki na lalaga:

¹¹ a ra lewe vitusagavulu na tagane era qase ni mataqali nei Isireli, ia ko Yeesaniya na luve i Safani sa tu e na kedra maliwa, era sa tu e matadra, ka ra dui taura tu yadua na nona miqa ni ka boi vinaka e na ligana; a sa dua na o loaloa ni ka boi vinaka sa kuvu cake tu.

¹² Sa qai kaya vei au ko koya, Ko sa kunea li, na luve ni tamata, na nodra ka na qase ni mataqali nei Isireli era sa dui cakava e na butobuto, na tamata yadua e na loqi ni nona matakau? ni ra sa kaya, O Jiova, sa sega ni raici keda; o Jiova, sa biuti vuravura.

¹³ A sa kaya vei au ko koya, Mo baki lesu tale, mo mai raica na ka vakasisila vakalevu cake era sa cakava.

¹⁴ Sa qai kauti au ko koya ki na matamata-ni-koro ni vale i Jiova sa donuya na mata ni tokalau; ka, raica, ni sa maikea e so na alewa era tiko ka tagicaki Tamusi.

¹⁵ Sa qai kaya vei au ko koya, Ko sa kunea li na ka o qo, na luve ni tamata? mo baki lesu tale, mo mai raica na ka vakasisila vakalevu cake e na ka o qo.

¹⁶ A sa kauti au ko koya ki na lomanibai eloma ki na vale i Jiova, ka, raica, ni sa tu mai na mata ni vale i Jiova, e na tadrua ni curucuru kei nai cabocabo-ni-soro, e lewe ruasagavulu ka lima beka na tagane, ia na dakudra sa qara ki na vale i Jiova, kei na matadra kivakaki cake; a ra sa cuva ki na mata-ni-siga kivakaki cake.

¹⁷ Sa qai kaya vei au ko koya, Ko sa kunea li na ka o qo, na luve ni tamata? E ka wale beka vei ira na mataqali nei Juta ni ra cakava na ka vakasisila era sa cakava eke? ni ra sa vakasinaita na vanua e nai valavala kaukauwa, a ra qai lesu me mai vakacudrui au: ka, raica, era sa taura na taba ni kau ki na ucudra.

¹⁸ O koya o qo kaʼu na cakacaka kina e na cudru: ena sega ni vosovoso na mataqu, au na sega talega ni yalololoma: ia ke ra tagi vakadomoilevu e na daligaqu, keʼu na sega ga ni rogoci ira.