Isikeli 7 - AI VOLA TABU

Ena cudruvi vakaoti na vanua ko Isireli, 1-15. Ena vakabulai e so na tamata, ka laki tagici caka na nodrai valavala ca, 16-19. Ena soli na vale tabu vei ira na meca me vakacacani e na vuku ni sa vakacacataka ko ira na Isireli e na nodra matakau, 20-22. Sa vakatakarakarataki e ua sinucodo na nodra vakabobulataki vakaca na lewe ni vanua, 23-27.

¹ A SA yaco tale vei au na vosa i Jiova, ka vaka,

² Ia ko iko, na luve ni tamata, sa vosa vakaoqo na Turaga ko Jiova ki na vanua vaka-Isireli; Nai otioti, sa yaco mai nai otioti ki nai yalayala e va ni vanua.

³ Sa qai yaco o qo na kemui otioti, ia kaʼu na tala na noqu cudru vei iko, ka lewai iko me vaka na nomui valavala, ka sauma vei iko na nomu ka vakasisila kecega.

⁴ Ia ena sega ni vosoti iko na mataqu, au na sega talega ni yalololoma: ni sa nomui valavala kaʼu na sauma vei iko, ia na nomu ka vakasisila sa na tu ga vei iko: ia dou na kila ni sai au ko Jiova.

⁵ Sa vosa vakaoqo na Turaga ko Jiova: Na ca, na ca, raica, sa qai yaco vakadua mai o qo.

⁶ Sa yaco mai nai otioti, sa yaco mai nai otioti: sa yadravi iko; raica, sa qai yaco mai.

⁷ Sa kidaci iko mai na kena mataka, o iko sa tiko e na vanua: sa yaco mai na kena gauna, sa voleka mai na siga ni kidroa, ka sega ni yaloyalo wale ni domo ni veiulu-ni-vanua.

⁸ Sa vo ga e lailai meʼu qai sova yani na noqu cudru vei iko, ka vakaotia yani na noqu lesa vei iko: ia kaʼu na lewai iko me vaka na nomui valavala, ka sauma vei iko na nomu ka vakasisila kecega.

⁹ Ia ena sega ni vosovoso na mataqu, au na sega talega ni yalololoma: me vaka na nomui valavala kaʼu na sauma vei iko, ia na nomu ka vakasisila ena tu ga vei iko; ia dou na kila ni sai au ko Jiova sa ia na veiyaviti.

¹⁰ Dou raica na kena siga, raica, sa yaco mai: sa lako tu yani na mataka; sa sereki mai na taba ni kau, sa kubu mai na viavialevu.

¹¹ Na veivakacacani, sa tubu cake me taba ni kau ca sara: ena sega vei ira me vo, se vei ira na nodra lewe vuqa, se vei ira na daumasa: ena sega talega na tagi yaso e na vukudra.

¹² Sa yaco na kena gauna, sa toro voleka mai na siga: o koya sa voli ka, me kakua ni reki; o koya sa volitaka, me kakua ni tagicaka: ni sa cudruvi kecega na kedra lewe vuqa.

¹³ Ni sai koya sa volitaka na ka, ena sega ni lesu mai ki na ka sa volitaki, kevaka era sa bula dina tikoga: ni sa bale na raivotu o qo vei ira kecega na nodra lewe vuqa, ena sega me na lesu mai; ena sega talega e sa caka cala tiko me na vakaukauwataki koya kina.

¹⁴ Era sa uvuca na davui, io me ra vakarau kecega; a sa sega e sa lako ki nai; valu: niʼu sa cudruva kecega na nodra lewe vuqa.

¹⁵ Ai seleiwau, sa tu ga mai taudaku, kei na mate dauveitauvi kei na dausiga, mai vale: o koya sa tiko mai na were ena mate e nai seleiwau; o koya talega mai na koro, na dausiga kei na mate dauveitauvi ena kani koya.

¹⁶ A ra na dro ko ira sa dro bula, a ra; na tiko e na veiulu-ni-vanua me vaka na ruve ni veibuca, ka dui tagi yadua e na vuku ni nonai valavala ca.

¹⁷ A ligadra kece, ena wadamele; a durudra kece talega, ena vaka na wai.

¹⁸ A ra na vauci ira e nai sulu taqarotu, ena nodrai tutuvi talega na domobula; e na matadra kece ena tu na madua, e na uludra kece talega na drika.

¹⁹ A nodra siliva era na biuta ki na sala ni koro; kei na nodra koula ena biu ga; a nodra siliva kei na nodra koula, ena sega ni vakabulai ira rawa e na siga ni cudru i Jiova: a yalodra, ena tawa mamau kina; a ketedra talega, ena tawa vakamamautaki kina: e na vuku ni sa nodra caka cala o qo era sa tarabe kina.

²⁰ Ia na nona ka vakaiukuuku ka vakaturaga, ka vakaduria ko koya me ka lagilagi sara: ia na matakau ni nodra ka vakasisila ka velavela era sa cakava kina: o koya o qo kaʼu sa solia kina me veiyawaki kei ira:

²¹ ia kaʼu na solia ki na ligadra na kai tani, me vakayanaki; vei ira talega na tamata ca kei vuravura, mei toki ni valu; a ra na vakacacana.

²² Ia kaʼu na vagolea tani na mataqu vei ira, a ra na vakacacataka na noqu yasana tabu: ni ra na curu kina na dauvakacaca, ka vakacacana.

²³ Mo cakava na sinucodo: ni sa vanua o qo sa daulevu kina na veilabati; kei na koro o qo sa sinai tu e nai valavala kaukauwa.

²⁴ O koya o qo kaʼu na kauti ira kina mai era ca sara vei ira na lewe ni veivanua, a ra na taukena na nodra veivale: ia kaʼu na muduka na nodra viavialevu na kaukauwa: ena taukeni talega na nodra veiyasana tabu.

²⁵ Sa yaco mai na dauveivakarusai; a ra na ia na veisorosorovi, ka sega ga.

²⁶ Na ca ena veitaravi kei na ca; nai rogorogo talega kei nai rogorogo; era na qai taroga na raivotu vua na parofita; ia na vunau, ena yali mai vua na bete; kei na lewa, maivei irana qase.

²⁷ Ena tagi ko koya na tui, io ko koya na turaga ena vakaisulu e na rusa; a ligadra talega na lewe ni vanua, ena taqaya: me vaka na nodrai valavala, kaʼu na cakacaka vakakina vei ira; ka vaka na ka e dodonu me kedra, kaʼu na cudruvi ira vakakina; a ra na kila ni sai au ko Jiova.