Isikeli 6 - AI VOLA TABU

A nodra cudruvi na Isireli e na vuku ni nodra qarava na kalou lasu, 1-7. Ena vakavoci e so era veivutuni, 8-10. A ra sa vunauci me tagicaka na nodrai valavala vakasisila na Isireli, kei na kenai sau, 11-14.

¹ A SA yaco vei au na vosa i Jiova, ka vaka,

² Na luve ni tamata, mo vaqara na matamu ki na veiulu-ni-vanua ni Isireli, ka parofisaitaka,

³ ka kaya, Oi kemudou na veiulu-ni-vanua ni Isireli, dou rogoca na vosa ni Turaga ko Jiova; Sa vosa vakaoqo na Turaga ko Jiova ki na veiulu-ni-vanua, kei na veiulu-ni-koro, ki na veiuciwai, kei na veibuca; Raica, oi au, kaʼu na vakayacora vei kemudou nai seleiwau, ia kaʼu na vakarusa na nomudou veiyasana, cecere;

⁴ ena vakacacani na nomudoui cabocabo-ni-soro, ka musuki na nomudou matakau: ia kaʼu na vakabalei ira na nomudou vue e matadra na nomudou matakau;

⁵ ia kaʼu na viritaka na yagodra mate na luve i Isireli e na matadra na nodra matakau; ka veibiuyaka na suimudou me volita na nomudoui cabocabo-ni-soro.

⁶ E na nomudoui tikotiko kecega ena rusa kina na veikoro; ia na veiyasana cecere, ena lala ga; me rusa ka vakacacani kina na nomudoui cabocabo-ni-soro, ka musuki ka oti na nomudou matakau, ka ta sobu na nomudou matakau, ka yavu laivi yani na nomudou cakacaka;

⁷ a ra na bale na vuetaki e na kemudou maliwa, ia dou na kila ni sai au ko Jiova.

⁸ Ia kaʼu na vakavoca e so, me kemudou vo me bula mai nai seleiwau e na veimatanitu, ni dou na qai dui vakasevi ki na veivanua.

⁹ Ia ko ira vei kemudou sa bula, era na nanumi au e na veimatanitu era na kauti vakabobula kina, e navuku niʼu sa musuki e na lomadra dauyalewa, sa lako tani vei au, kei na matadra, sa daugole vakaca ki na nodra matakau: a ra na vakasisilataki ira e na vuku ni ka ca era sa cakava e na nodra ka vakasisila kecega.

¹⁰ A ra na kila ni sai au ko Jiova, kaʼu sa tawa kaya wale niʼu na cakava vei ira na ka ca o qo.

¹¹ Sa vosa vakaoqo na Turaga ko Jiova; Mo lali dibi e na ligamu, ka butubutu e na yavamu, ka kaya, Ule na nodra ka vakasisila ca kece na mataqali nei Isireli! ni sai seleiwau, ka dausiga, ka mate dauveitauvi, era na bale kina.

¹² O koya sa tiko vakayawa, ena mate e na mate dauveitauvi; kei koya sa tiko voleka, ena bale e nai seleiwau; kei koya sa vo tiko ni sa buku na druadrua ni koro, ena mate e na dausiga: au na vakayacora vakaoqo na noqu cudru vei ira.

¹³ Dou na qai kila ni sai au ko Jiova, ni sa qai davo tu vata yani na nodra vuetaki, kei na nodra matakau ka volita na nodrai cabocabo-ni-soro, e na ulu-ni-koro kecega, kei na dela ni veiulu-ni-vanua kecega, kei na ruku ni kau bulabula kecega, kei na ruku ni oki rugurugua kecega, na yasana era sa cabora kina na ka boi vinaka ki na nodra matakau kecega.

¹⁴ Ia kaʼu na dodoka na ligaqu vei ira, ka cakava na vanua me lala, io, me lala vakalevu ka lala vakalailai na veikau mai Tipila, e na nodrai tikotiko kecega: a ra na kila ni sai au ko Jiova.