Isikeli 5 - AI VOLA TABU

Sa vakatakarakarataki na nodra cudruvi vakalevu na kai Jerusalemi e na vuku ni nodra dautalaidredre ki na vunau ni Kalou, 1-10. Era na cudruvi e nai valu, kei na dausiga, kei na veivakasevi, 11-17.

¹ IA ko iko, na luve ni tamata, mo taura e dua na nomui sele gata, io, e dua nai toroi ni dauveitasi mo taura, ka tasia kina na ulumu kei na kumimu: mo qai taura e dua nai vakarau ni bibi, ka wasea tolu na drau ni ulumu:

² e dua na wase mo qai vakama e na buka e na loma ni koro, ni na sa vakaoti na veibogi sa buku kina na druadrua: ia mo taura e dua na wase, ka yavita vakavolivolita e nai sele: ia e dua na wase mo veibiuyaka ki na mata ni cagi; ia nai seleiwau kaʼu na ucuna me muria.

³ Ia mo taura maikina e vica walega na vuana, ka vauca ki nai tutu ni nomu sulu.

⁴ Ia e so tale mo qai taura, ka biuta ki na loma ni buka, ka vakama e na buka; ena lako tani maikina na buka ki na mataqali kecega nei Isireli.

⁵ Sa vosa vakaoqo na Turaga ko Jiova, O qo ko Jerusalemi: e na maliwa ni veimatanitu kaʼu sa vakatikora, a sa tu voliti koya na veivanua.

⁶ A sa vukica vakalevu ko koya na noqu lewa me ca ka vakalailai na veimatanitu, kei na noqui lesilesi talega, ka vakalailai na veivanua sa tu voliti koya: ni ra sa beca na noqu lewa kei na noqui lesilesi, era sa sega ni muria.

⁷ O koya o qo sa vosa vakaoqo kina na Turaga ko Jiova; E na vuku ni dou sa masa vakalevu ka vakalailai na veimatanitu sa tu voliti kemudou, dou a sega talega ni muria na noqui lesilesi, kei na noqu lewa dou a tawa vakabauta, se cakava me vaka na nodra lewa dodonu na veimatanitu sa tu voliti kemudou;

⁸ o koya o qo sa vosa vakaoqo kina na Turaga ko Jiova; Raica, oi au sa nomu meca, io koi au, kaʼu na ia e na kemudou maliwa na veicudruvi e matadra na veimatanitu.

⁹ Ia kaʼu na cakava na ka vei iko kaʼu a sa sega ni cakava, io na ka kaʼu na tawa cakava tale me vakakina, e na vuku ni nomu ka vakasisila kecega:

¹⁰ io ko ira na tama ni gone era na kania na luvedra e na kemudou maliwa, o ira talega na gone era na kania na tamadra; ia kaʼu na ia na veicudruvi vei iko, ka dui cagina kece tani na kemudou vo ki na mata ni cagi kecega.

¹¹ Ia, me vaka na dina ni noqu bula, sa kaya na Turaga ko Jiova; E na vuku ni sa noqu vale tabu ko sa vakadukadukalitaka e na nomu ka velavela kecega, kei na nomu ka vakasisila kecega, oi au talega kaʼu na vakalailaitaki iko; ia ena sega ni vosovoso na mataqu, oi au kaʼu na sega sara ni yalololoma.

¹² E dua na kemudou wase ena mate e na mate dauveitauvi, ia e na dausiga era na oti ga kina e na kemudou maliwa: e dua tale na kemudou wase ena bale e nai seleiwau ena voliti iko: e dua talega na kemudou wase kaʼu na dui vakaseva ki na mata ni cagi kecega, ia nai seleiwau kaʼu na ucuna me muri ira.

¹³ Ena vakayacori vakaoqo na noqu cudru, ia kaʼu na vakatauca na noqu cudru katakata vei ira, kaʼu na qai vakacegu: a ra na kila ni sai au ko Jiova kaʼu sa vosa e na noqu lomakatakata, niʼu sa vakayacora na noqu cudru levu vei ira.

¹⁴ Ia kaʼu na soli iko mo vakalalataki, ka vakalialiai e na kedra maliwa na veimatanitu era tiko voliti iko, e na matadra kece era lako voli yani.

¹⁵ Ia ko na yaco me ka e vakalialiai ka vosavakacacataki, me ka e vakavuvulitaki ka kidacalataki ki na veimatanitu sa tu voliti iko, niʼu na sa ia na veicudruvi e na kemudou maliwa e na cudru, kei na lesa, kei na veivunauci cudrucudru. Oi au ko Jiova kaʼu sa tukuna.

¹⁶ Niʼu na sa tala na gasau ca ni dausiga vei ira, na ka era na rusa kina, na ka talega kaʼu na tala me vakarusai kemudou: ia na dausiga kaʼu na vakaikuritaka vei kemudou, ka musuka na nomudoui titoko, na madrai:

¹⁷ ia kaʼu na tala vei kemudou na dausiga kei na manumanu ca, a ra na vakamatei ira na luvemu; ia na mate dauveitauvi kei na veilabati ena lako voli yani vei iko; kei nai seleiwau kaʼu na vakayacora vei iko. Oi au ko Jiova kaʼu sa tukuna.