Isikeli 47 - AI VOLA TABU

A raivotu ni wai tabu, 1-5, kena yaga, 6-12. Ai yalayala ni vanua, 13-21. Me vakalutuki na madigi e na vanua me ra vota vakakina na vanua vei ira na luve i Isireli, kei ira na vulagi era tiko kei ira, 22, 23.

¹ A SA kauti au tale ko koya ki na katuba ni vale; ka, raica, na wai sa dave yani mai na ruku ni lago ni vale kivakaki cake: ni sa donui cake na mata ni vale, ia na wai sa dave sobu mai na ruku ni vale mai na tabana ki matau, mai na yasana ni cabocabo-ni-soro ki na ceva.

² Sa qai kauti au yani ko koya e na sala ni matamata-ni-koro sa donuya na tokalau, a sa tuberi au voli e na sala etautuba ki na matamata-ni-koro kisau, e na sala sa qaradonu ki cake, ka, raica, na wai sa drodro mai na liga i matau.

³ Ia ni sa lako yani na tamata sa taura na wa i vakarau e na ligana, kivakaki cake, sa vakarauta na caga e rua na udolu, a sa kauti au ki loma ni wai; na wai sa yala ki na noqu qurulasawa.

⁴ Sa baki vakarauta tale ko koya e rua na udolu, ka kauti au ki loma ni wai; na wai sa yala ki na duruqu. Sa baki vakarauta tale ko koya e rua na udolu, ka kauti au yani kiloma; na wai sa yala ki na toloqu.

⁵ Sa baki vakarauta tale ko koya e rua na udolu: sa uciwai kaʼu sa tawa lakova rawa; ni sa titobu na wai, na wai me qalo kina, na uciwai sa tawa lakovi rawa.

⁶ A sa kaya vei au ko koya, Ko sa raica na ka o qo, na luve ni tamata, se segai? Sa qai kauti au ko koya, ka vakalesui au ki na bati ni uciwai.

⁷ Ia niʼu sa lesu, raica, e na bati ni uciwai sa tu na kau e vuqa sara e na batina ruarua.

⁸ Sa qai kaya vei au ko koya, A wai o qo sa dave yani ki na vanua vakaki cake, a sa lako sobu ki na veikau, ka yaco sara ki waitui; ia ni sa yaco sara ki waitui, ena bula kina na kena wai.

⁹ Ia ena yaco, na ka kece sa bula, ka lako voli, e na tikina kece sa yaco kina na uciwai, ena bula: ia ena levu sara na ika, e na vuku ni na yaco kina na wai o qo: ni na bula kina na wai; ena bula na ka kece talega sa yaco kina na uciwai.

¹⁰ Ia ena yaco, era na tu maikina na gonedau mai Eni-keti ka yala ki Eni-ekileimi; enai sasau ni lawa, ena vakamataqali na kena ika, mo vaka na ika ni waitui levu, na ka levu sara.

¹¹ Ia na kena tikina lolobo ka vakadranodrano ena sega ni bula; ena soli me tuituina.

¹² Ia e na bati ni uciwai e na batina ruarua ena tubu kece kina na kau kana, ena sega ni malai na drauna, se oti rawa na vuana: ena vuavua tikoga e na veivula, e na vuku ni kena wai ni sa dave o qori mai na tikina tabu: ia ena kakana na vuana, kei na drauna na wai ni mate.

¹³ Sa vosa vakaoqo na Turaga ko Jiova; Me sa kenai yalayala o qo, mo dou muria ni dou vota na vanua ki na veimataqali nei Isireli e tinikarua; me nei Josefa e ma nai votavota.

¹⁴ Ia dou na dui taukena vata ga, na tamata yadua, na vanua kaʼu a laveta cake na ligaqu meʼu solia vei ira na nomudou qase: ia na vanua o qo ena lutu vei kemudou mo dou taukena.

¹⁵ Ia ena vakaoqo nai yalayala ni vanua e na yasana vakatokalau, mai na waitui levu, e na sala ki Eciloni, ni sa lakovi ko Sitati;

¹⁶ o Emaci, kei Peroca, kei Sipireimi, mai na maliwa ni yalayala i Tamasiko kei nai yalayala i Emaci; na koro ko Atikoni, e nai yalayala i Avirani.

¹⁷ Ena kenai yalayala talega mai waitui na koro ko Enani, kei nai yalayala i Tamasiko, kei na yasayasa vakatokalau, kei nai yalayala i Emaci. Ia o qo na kenai yalayala vakatokalau.

¹⁸ A kenai yalayala talega ki cake dou na yalana mai Avirani, kei Tamasiko, kei Kiliati, kei na yasana vaka-Isireli mai Joritani, ia mai nai yalayala ko ya ki na waitui mai cake. Ia o qo na kenai yalayala ki cake.

¹⁹ A kenai yalayala vakaceva talega mai na ceva, ko Tamari ka yaco ki na wai ni veileti mai Katesa, mai na uciwai ka yala ki na waitui levu. Ia o qo na kenai yalayala vakaceva kivakaki na ceva.

²⁰ A kenai yalayala talega ki ra, na waitui levu mai nai yalayala ko ya, ka yala sara ki Emaci. O qo na kenai yalayala kira.

²¹ Ia dou na veivota na vanua o qo vakai kemudou na veimataqali nei Isireli.

²² Ia ena vakaoqo, dou na vakalutuka na madigi e na vanua mo dou-taukena vakai kemudou, kei ira na vulagi era tiko kei kemudou, sa ra na vakaluveni e na kemudou maliwa: ia me ra tauvata vei kemudou kei ira na luve i Isireli erai taukei dina; me rai taukei vata kei kemudou e na veimataqali nei Isireli.

²³ Ia ena vakaoqo, na mataqali sa na tiko kina o dua na vulagi, dou na solia kina vua na nona yasana me taukena, sa kaya na Turaga ko Jiova.