Isikeli 46 - AI VOLA TABU

A ka e so sa lesi me cakava ko koya na turaga, 1-8, kei ira na lewe ni vanua, ni ra laʼki cuva e na mata i Jiova, 9-15. A nonai votavota vanua na tui me na taukeni veitaravi, me kakua ni soli tani, 16-18. A rara e so me ia kina na vakasasaqa kei na vavavi, 19-24.

¹ SA vosa vakaoqo na Turaga ko Jiova; A matamata-ni-koro ni lomanibai eloma sa donui cake me sogo tu ga e na bogi e ono sa ia kina na cakacaka; ia o na siga tabu mo qai dolavi, e na siga ni vula vou talega me qai dolavi.

² Ia me curu mai na turaga mai na sala ni curucuru ni matamata-ni-koro ko ya maitautuba, me mai tu ko koya mai na duru ni matamata-ni-koro, a ra na cakava na bete na nonai soro kama kei na nonai soro ni veivinakati, a me cuva ko koya mai nai lago ni matamata-ni-koro: me qai lako yani ko koya; ia na matamata-ni-koro me kakua ni sogo, me yakavi mada.

³ Me ra mai cuva talega na lewe ni vanua mai na katuba ni matamata-ni-koro o qo e na mata i Jiova e na veisiga tabu kei na veivula vou.

⁴ Ia nai soro kama ena cabora na turaga vei Jiova e na siga tabu, me ono na lami sa tawa ca, ka dua na sipi tagane sa tawa ca:

⁵ kei nai madrali laukana e dua na efa na kena e dua na sipi tagane, ia na kedrai madrali laukana na lami, me vaka na ka sa rawa vua me solia, ka dua na ini waiwai mo kena e dua na efa.

⁶ Ia e na siga ni vula vou me dua kina na luve ni karavau sa tawa ca, ka ono na lami, ka dua na sipi tagane: me sa tawa ca o qori.

⁷ Ia ka dua na efa na kena e dua na karavau, ka dua na efa na kena e dua na sipi tagane, me vakarautaka ko koya mei madrali laukana, kei na kedra na lami me vaka na ka sa rawa vua, ka dua na ini waiwai me kena o dua na efa.

⁸ Ia ni sa curu mai na turaga, me qai curu ko koya mai na sala ni curucuru ni matamata-ni-koro ko ya, e na kena sala talega ko ya me na curu yani kina.

⁹ Ia ni ra lako mai na lewo ni vanua ki na mata i Jiova e na gauna tabu, o koya sa curu mai na sala ni matamata-ni-koro mai na tokalau me mai cuva, mo qai curu yani ko koya e na sala ni matamata-ni-koro ki na ceva: kei koya sa curu mai na sala ni matamata-ni-koro mai na ceva, me curu yani ko koya e na sala ni matamata-ni-koro ki na tokalau: me kakua ni lesu yani ko koya e na sala ni matamata-ni-koro ka curu mai kina, e na sala ga sa donuya, me na curu yani kina ko koya.

¹⁰ Ia na turaga e na kedra maliwa, ni sa curu mai ko ira, me qai curu mai ko koya; ni sa curu yani ko ira, me qai curu yani ko koya.

¹¹ Ia e na solevu kei na gauna tabu me dua na efa mei madrali laukana na kena e dua na karavau, ka dua na efa na kena e dua na sipi tagane, kei na kedra na lami me vaka na ka sa rawa vua me solia, ka dua na ini waiwai me kena e dua na efa.

¹² Ia ni sa cakava na turaga e dua nai soro kama, ni sa lomana ga, se dua nai soro ni veivinakati, ni sa lomana ga kina vei Jiova, me qai dolavi vua na matamata-ni-koro sa donui cake, me mai cakava ko koya na nonai soro kama kei na nonai soro ni veivinakati, me vaka sa cakava e na siga tabu: me qai curu tale yani ko koya; ia ni sa curu yani, me qai sogo na matamata-ni-koro.

¹³ Ia e dua na lami, sa dua na kena yabaki ka tawa ca, mo cakava e na veisiga mei soro kama vei Jiova: e na sabogibogi kece mo cakava ga o qori:

¹⁴ a kenai madrali laukana talega mo cakava e na sabogibogi kecega, nai kaono ni dua na efa, kei nai katolu ni dua na ini waiwai me natuki vata kei na madrai droka ni witi; sai madrali laukana sa lesi me caka tikoga vei Jiova ka tawa mudu.

¹⁵ Ia me ra vakarautaka vakaoqo na lami, kei nai madrali laukana, kei na waiwai, e na sabogibogi kecega, mei soro kama tikoga.

¹⁶ Sa vosa vakaoqo na Turaga ko Jiova; Ni sa solia na turaga e dua na ka ni loloma vua e dua vei ira na luvena, na ka sa qai taukena mai ko koya o qo ena nodra na luvena; era na taukena veitaravi.

¹⁷ Ia ni sa solia e dua na ka sa taukena ko koya vua e dua vei ira na nona tamata, ena nona tiko ka yacova na yabaki ni veisere; ena qai suka vua na turaga: ia na ka sa taukena ko koya ena nodra dina sara na luvena.

¹⁸ Ia me kakua ni kovea na turaga na nodra tiki ni vanua na tamata, me vakasavi ira tani kina mai na nodra tiki ni vanua; me so ga na tiki ni nona vanua dina me solia ko koya me ra taukena na luvena: me ra kakua ni dui vakasevi tani na noqu tamata mai na nodra tiki ni vanua.

¹⁹ Sa qai kauti au yani ko koya ki nai curucuru mai na taba ni matamata-ni-koro, ki na nodra veitiki ni vale tabu na bete, sa donuya na tokalau: ka, raica, sa dua na yasana ki na tabana ruarua ki ra.

²⁰ Sa qai kaya vei au ko koya, O qo na nodra tikina na bete me ra vakasaqa kina nai soro ni caka cala kei nai soro ni valavala ca, me ra vavia talega kina nai madrali laukana; me ra kakua ni kauta ki na lomanibai kitaudaku, me vakatabui ira kina na tamata.

²¹ Sa qai kauti au yani ko koya ki na lomanibai kitaudaku, ka vakalakovi au voli ki na tutuna e va ni lomanibai; ka, raica, sa yadua na kena rara na veitutuna ni lomanibai.

²² E na veitutuna e va ni lomanibai sa yadua kina na kena rara e vakabai, e caga walusagavulu na kena balavu ka onosagavulu na kena raraba: sai vakarau vata vava na veitutuna o qori.

²³ A sa yadua na kedrai yatu vale e tu volita na loma ni rara, sa tu volita vava o qori, ka so na riri e caka tu e ruku ni yatu vale me volita.

²⁴ Sa qai kaya vei au ko koya, O qo na nodra tikina na dauvakasasaqa, na nodra era dauqarava na vale me ra vakasaqa kina na nodrai soro na tamata.