Isikeli 45 - AI VOLA TABU

Ai votavota vanua mo yasana tabu, 1-5, kei na kena na koro, 6, kei na nona na turaga, 7, 8. Ai vakaro vua na turaga, 9-25.

¹ IA ni dou sa vota na vanua me taukeni, dou qai vakacabora e dua na tikina mei sevu vei Jiova, mei votavota tabu ni vanua: me kena balavu e rua na oba ka lima na udolu, kei na kena raraba e dua na oba. Ena tabu na tikina o qo e na kenai yalayala kecega e na veiyasana.

² E na tikina o qo me dua na yasana tabu e lima na drau na kena balavu, ka lima na drau na kena raraba, ka takiveilevu na veiyasana; a me caga drau na kenai bili e na veiyasana.

³ Ia mai na tikina o qo mo vakarauta e rua na oba ka lima na udolu na kena balavu, ka dua na oba na kena raraba: a me tu kiloma na yasana tabu kei na yasana tabu sara.

⁴ Ai votavota tabu ni vanua me na nodra na bete era qarava na yasana tabu, sa ra na toro mai me qaravi Jiova: ia mei tutu ni nodra veivale ko ya, ka dua na tikina tabu me yasana tabu sara.

⁵ Ia na kena rua na oba ka lima na udolu na kena balavu, ka dua na oba na kena raraba, me nodra talega na luve i Levi, era qarava na vale, me ra taukena vakai ira mei tutu ni veitiki ni vale e ruasagavulu.

⁶ Ia nai votavota ni koro mo dou solia, me lima na udolu na kena raraba, ka rua na oba ka lima na udolu na kena balavu, me donuya nai sevu tabu: ena nodra kecega na mataqali nei Isireli.

⁷ Me nona talega na turaga e dua nai votavota ki na tabana vaka ka vaka ni sevu tabu, kei nai votavota ni koro, me donuya nai sevu tabu, me donuya talega nai votavota ni koro, me vu mai na tabana e ra ka yala sara ki ra, me vu talega mai na tabana e cake ka yala sara ki cake: ia na kena balavu me donuya e dua nai votavota, ka vu mai na kenai yalayala mai ra ka yala ki na kenai yalayala ki cake.

⁸ E na vanua, mo na tu ga kina na nonai votavota e Isireli: ia ko ira na qau turaga me ra kakua ni vakararawataki ira tale na noqu tamata; ia na vanua, me ra solia vei ira na mataqali nei Isireli me vaka na dui nodra veimataqali.

⁹ Sa vosa vakaoqo na Turaga ko Jiova; Kua so mada, oi kemudou na turaga ni Isireli: dou biuta tani nai valavala kaukauwa kei na veivakacacani, ia na ka vinaka ka dodonu ga, mo dou cakava, me takali tani na nomudou vakasaurarataki ira na noqu tamata, sa kaya na Turaga ko Jiova.

¹⁰ Nai vakarau ni bibi dodonu, kei na efa dodonu, kei na paca dodonu ga, me sa nomudou.

¹¹ Na efa kei na paca me sai vakarau vata ga, me tauya na paca nai katini ni dua na omeri, me tauya na efa talega nai katini ni dua na omeri: me vakaomeri ga na kenai vakarau.

¹² Ia na sikeli, me ruasagavulu na kera: na sikeli e ruasagavulu, na sikeli e ruasagavulu ka lima, na sikeli e tinikalima, me sa dui nomudou mane ga ko ya.

¹³ Me vakaoqo nai madrali dou na cabora: nai kaono ni efa e dua mai na omeri witi e dua, nai kaono talega ni efa e dua mo dou solia mai na omeri parile e dua:

¹⁴ ia na ka sa lesi e na vuku ni waiwai, na paca waiwai, nai katini ni dua na paca mo dou solia mai na kori waiwai e dua, a ya sa dua na omeri e tini na kena paca; ni sa paca e tini e dua na omeri:

¹⁵ me dua talega na lami mai na qele ni sipi e rua na drau, mai na nodra veico vinaka na Isireli, mei madrali laukana, kai soro kama, kai soro ni veivinakati, me sorovaki ira, sa kaya na Turaga ko Jiova.

¹⁶ O ira kece na lewe ni vanua me ra vakaitavi vata e nai madrali o qo kei koya na turaga mai Isireli.

¹⁷ Ia ena nonai tavi na tui nai soro kama, kei nai madrali laukana, kei nai madrali gunuvi, e na solevu, kei na vula vou, kei na siga tabu, e na nodra gauna tabu kecega na mataqali nei Isireli: sai koya ena vakarautaka nai soro ni valavala ca, kei nai madrali laukana, kei nai soro kama, kei nai soro ni veivinakati, me sorovaki ira na mataqali nei Isireli.

¹⁸ Sa vosa vakaoqo na Turaga ko Jiova: E nai matai ni vula, e nai matai ni siga ni vula, mo qai kauta e dua na luve ni karavau sa tawa ca, ka vakasavasavataka na tikina tabu:

¹⁹ ia me kauta ko koya na bete e so na dra ni soro ni valavala ca, me kureitaka ki na duru ni vale, kei na tutuna e va ni rara ni cabocabo-ni-soro, kei na duru ni matamata-ni-koro ni lomanibai eloma.

²⁰ Ia mo cakacaka vaka talega kina e nai kavitu ni siga ni vula e na vukudra yadua sa caka cala, ka vakacala-ka: dou na sorovaka vakaoqo na vale.

²¹ E nai matai ni vula e nai katinikava ni siga ni vula, mo dou qai ia na lako-sivia, na solevu bogi vitu; na madrai tawa vakaleveni me sa kani kina.

²² Ia na turaga me qai vakarautaka e na siga ko ya e na vukuna kei na vukudra kece na lewe ni vanua e dua na karavau mei soro ni valavala ca.

²³ Ia e na veibogi e vitu ni solevu me vakarautaka ko koya nai soro kama vei Jiova, e vitu na karavau ka vitu na sipi tagane e tawa ca, e na veisiga ni bogi vitu; kei nai soro ni valavala ca e dua na luve ni koti e na veisiga:

²⁴ kei nai madrali laukana, e dua na efa na kena e dua na karavau, ka dua na efa na kena e dua na sipi tagane, ka dua na ini waiwai na kena e dua na efa, me na vakarautaka ko koya.

²⁵ E nai kavitu ni vula, e nai katinikalima ni siga ni vula, e na kena solevu bogi vitu, me cakacaka vaka talega kina ko koya, me vaka nai soro ni valavala ca, ka vaka nai soro kama, ka vaka nai madrali laukana, ka vaka na waiwai.