Isikeli 41 - AI VOLA TABU

Ai vakarau, kei na veitikina, kei nai ukuuku ni vale tabu, 1-26.

¹ SA qai kauti au ko koya ki na vale tabu, a sa vakarauta na duru, a sa dui caga tinikarua na kena raraba ki tabana e dua, ka dui caga tinikarua na kena raraba ki tabana ka dua, a kena raraba ni vale malo ko ya.

² Ia na kena raraba ni katuba sa caga ruasagavulu; ia na taba ni katuba sa caga tini vaka, ka caga tini vaka; a sa vakarauta ko koya na kena balavu, a sa caga walusagavulu: kei na kena raraba, a sa caga vasagavulu.

³ Sa qai curu kiloma ko koya, ka vakarauta na duru ni katuba, a sa caga va; kei na katuba, a sa caga tinikarua, kei na raba ni katuba, a sa caga tinikava.

⁴ A sa vakarauta ko koya na kena balavu, a sa caga vasagavulu; kei na rabana, a sa caga vasagavulu e na mata ni vale tabu, a sa kaya vei au ko koya, Sai koya o qo na tikina tabu sara.

⁵ Sa qai vakarauta ko koya na lalaga ni vale, a sa caga tinikarua; kei na raba ni loqi ki sarisari ni vale, a sa dui caga walu, ka volita na vale e na veiyasana.

⁶ Ia nai taba loqi e veitaqataqai, sa tolu, ka yatolusagavulu na kena loqi; a sa la-goni mai ki na lalaga ni vale sa kedra dina voli tu na loqi ki sarisari ni vale, me taura, a sa sega ni taura na lalaga ni vale tabu.

⁷ A sa rabailevu cake tu, ni sa cabeti voli tu kicake nai taba loqi: e na vuku ni sa cabeti voli tu kicake na vale ka volita sara na vale tabu: o koya o qo sa rabailevu cake tu kina na vale kicake, ni sa cabeti vakaoqo nai taba loqi kicake sara, mai na kena era sara, ka basika na kena eloma.

⁸ Au a raica talega na kena cecere ni vale e na veiyasana mai na dui kenai lago nai taba loqi, a sa dui gasau levu e dua e caga tinikarua.

⁹ A kena raraba ni bai ni taba loqi kisau, sa caga tini: ia na tikina sa vo mai ki vale sa kedra nai taba loqi sa tu mai kiloma.

¹⁰ Ia na tadrua ni yatu vale sa caga vasagavulu ka muri volita na vale tabu e na veiyasana.

¹¹ Ia na kedra katuba lelevu nai taba loqi sa dui donuya tu na tikina sa vo, sa dua na katuba e donuya na tokalau, ka dua tale na katuba sa donuya na ceva: ia na kena raraba ni tikina sa vo sa caga tini voli tu.

¹² Ia na vale sa tara tu e na mata ni yasana tabu ki na tikina ki ra sa caga drau ka vasagavulu na kena raraba; ia na lalaga ni vale e tara tu sa caga tini voli tu na kena vavaku, ka caga drau ka walusagavulu na kena balavu.

¹³ Ia sa vakarauta ko koya na vale tabu, e caga rua na drau na kena balavu; kei na yasana tabu, kei na vale sa tara tu, kei na kena veibai, e caga rua na drau na kena balavu;

¹⁴ na kena raraba talega ni mata vale, kei na yasana tabu ki cake, e caga rua na drau.

¹⁵ A sa vakarauta ko koya na kena raraba ni vale e tara tu ka donuya na yasana tabu mai dakuna, kei na kena virada vaka ka vaka, e caga rua na drau; kei na vale tabu kiloma, kei nai curucuru ni lomanibai;

¹⁶ kei na duru ni katuba lelevu, kei na katuba qiqo, kei na virada e dui volita nai taba loqi e tolu ka donuya na katuba, ka botani voli tu e na kau, mai na qele talega ka yala ki na katuba lalai, ia na katuba lalai sa lati tu,

¹⁷ ka yacova o qori ki dela ni katuba, ka yala sara ki na vale tabu kiloma, na taudaku talega, ka muria voli sara tu na bai e na veiyasana eloma e taudaku talega, me vaka na dui kenai vakarau.

¹⁸ A sa caka kina na jerupi kei na balabala, ia e dua na balabala sa ceuti tu ga e na maliwa ni jerupi e rua; a sa dui yarua na matadra na jerupi;

¹⁹ ia na mata vakatamata sa donuya na balabala vaka, kei na mata vakalaioni cauravou sa donuya na balabala vaka: sa caka voli tu e na veiyasana kecega ni vale tabu.

²⁰ Sa vu mai na qele ka yala ki na tikina e dela ni katuba na jerupi kei na balabala sa caka kina, e na lalaga ni vale tabu talega.

²¹ A duru ni katuba ni vale tabu sa dui ta vakarivirivi, kei na matana na tikina tabu sara; sa rairai tautauvata ruarua.

²² Ai cabocabo-ni-soro kau sa caga ono na kena cecere, ka caga va na kena balavu; ia na tutuna, kei na delana, kei na sarisarina, sa kau ga: a sa kaya vei au ko koya, O qo na vata-ni-soro sa tu e na mata i Jiova.

²³ A sa dui yarua na katuba ni vale tabu kei na tikina tabu sara.

²⁴ A sa dui lobi rua na katuba, e dui rubi tu ruarua; sa lobi rua na katuba e dua, ka lobi rua na katuba kadua.

²⁵ A sa caka kina, io ki na katuba ni vale tabu, na jerupi kei na balabala, me vaka sa caka e na lalaga; a sa so na papa vavaku e na mata ni lalaga ni curucuru kituba.

²⁶ A sa vakatuba qiqo ka vakabalabala vaka ka vaka e na sarisari ni curucuru, ia nai taba loqi ni vale, sa vakapapa vavaku talega.