Isikeli 40 - AI VOLA TABU

A raivotu ni koro ni Kalou, kei koya na agilose sa vakarauta na kena veimatamata-ni-koro, kei na vata-ni-soro, kei na nodra veivale na dau-ni-meke kei na bete, kei nai curucuru ni vale tabu, 1-49.

¹ E NAI karuasagavulu ka lima ni yabaki ni neimami tiko vakabobula, e nai vakatekivu ni yabaki, e nai katini ni siga ni vula, e nai katinikava ni yabaki ni koro ni samuti, e na siga dina ko ya sa tiko vei au na liga i Jiova, a sa kauti au yani kikea.

² E na raivotu ni Kalou sa kauti au mai ki na vanua nei Isireli, ka vakatikori au ki dela ni dua na ulu-ni-vanua cecere sara, a sa vaka e tu maikina e dua na koro sa tara rawa tu ki na mata ni ceva.

³ A sa kauti au kikea ko koya, ka, raica, sa dua na tamata, ka raici tu me vaka sa parasa, a sa dua na dali laino e na ligana, ka dua na gasau i vakarau; a sa wavu tu ko koya e na matamata-ni-koro.

⁴ A sa kaya vei au na tamata o qori, Na luve ni tamata, mo vakaraica o na matamu, ka rogoca e na daligamu, ka vakasara na lomamu ki na ka kecega kaʼu na vakaraitaka vei iko; ni sa kawa ni ka o qo, meʼu vakaraitaka vei iko, ko sa kauti mai kina kike: tukuna na ka kece ko sa raica ki na mataqali nei Isireli.

⁵ Ka, raica, sa dua na bai mai taudaku ni vale ka tu volita, ia e na ligana na tamata sa dua kina na gasau i vakarau na kena balavu e caga tinikarua, ka dua na tikina, a sa vakarauta na kena raraba ni bai, a sa gasau e dua: kei na kena cecere, a sa gasau e dua.

⁶ Sa qai lako mai ko koya ki na matamata-ni-koro sa qaradonu vakaki cake, a sa cabeta na kenai kabakaba, ka vakarauta e dua nai lago ni matamata-ni-koro, a sa gasau e dua na kena raraba; kei nai lago kadua, a sa gasau e dua na kena raraba.

⁷ Ia na veivalevale sa dui gasau e dua na kena balavu, ka dui gasau e dua na kena raraba; ia na kena tadrua ni veivalevale sa dui caga tini; ia nai lago ni matamata-ni-koro e nai curucuru ni matamata-ni-koro kiloma sa gasau e dua.

⁸ Sa vakarauta talega ko kova nai curucuru ni matamata-ni-koro kiloma, a sa gasau e dua.

⁹ Sa qai vakarauta ko koya nai curucuru ni matamata-ni-koro, a sa caga tinikaono; kei na kena duru, a sa caga e va; ia nai curucuru ni matamata-ni-koro sa tu kiloma.

¹⁰ Ia na veivalevale ni matamata-ni-koro ki cake sa tolu vaka, ka tolu vaka; sai vakarau vata tolutolu ga: a sai vakarau vata na duru ni kedra katuba e na tabana o qo kei na tabana ko ya.

¹¹ A sa vakarauta na kena raraba ni curucuru ni matamata-ni-koro, a sa caga ruasagavulu; kei na kena cecere, a sa caga ruasagavulu ka ono.

¹² Ia na kedra mata vale na veivalevale sa dui caga rua e na tabana o qo, ka dui caga rua e na tabana ko ya; ia na veivalevale sa dui caga tinikarua e na tabana o qo, ka dui caga tinikarua e na tabana ko ya.

¹³ Sa qai vakarauta ko koya na matamata-ni-koro mai na daku ni valevale e dua ki na daku ni kenai sa: sa rabana e caga limasagavulu, a sa dui veidonui na katuba.

¹⁴ A sa cakava ko koya nai yatu duru, a sa dui caga drau ka ruasagavulu, ka yala ki na duru ni lomanibai sa tu volita na matamata-ni-koro.

¹⁵ Ta mai na mata ni matamata-ni-koro mai nai curucuru ka yala ki na mata ni curucuru ni matamata-ni-koro kiloma sa caga drau.

¹⁶ A sa dui vakatuba qiqo na veivale vale, na tadrua talega ni dui kedra duru e tu voli e loma ni matamata-ni-koro, a sa dui vaka talega kina na kedrai lolo: ia na kedra katuba lalai sa tu voli eloma; ia ki na duru sa dui ceuti tu ga kina na balabala.

¹⁷ Sa qai kauti au ko koya ki na lomanibai kisau, ka, raica, sa tu nai yatu vale, kei na raravatu sa caka tu me volita na lomanibai: sa yatolusagavulu na vale e dui donuya tu na raravatu.

¹⁸ Ia na raravatu ki taba ni matamata-ni-koro ka balavu vata kei na matamata-ni-koro, sai koya na raravatu era.

¹⁹ Sa qai vakarauta ko koya na kena raraba mai na mata ni matamata-ni-koro era ka yala ki na mata ni matamata-ni-koro kisau ni lomanibai eloma, a sa dui caga rua na drau kivakaki cake, kei na tokalau.

²⁰ Ia na matamata-ni-koro ni lomanibai esau o koya sa donuya na mata ni tokalau, sa vakarauta ko koya na kena balavu kei na kena raraba.

²¹ Ia na kena veivalevale sa tolu e na tabana o qo ka tolu e na tabana ko ya; ia na dui kena duru kei na dui kenai lolo sai vakarau vata ga kei nai matai ni matamata-ni-koro: ia na kena balavu kei na kena raraba sa dui caga drau ka caga limasagavulu.

²² Ia na kedra katuba lalai, kei na kedrai lolo, kei na kedra balabala, sai vakarau vata ga kei na matamata-ni-koro sa qaradonu ki cake; ia nai kabakaba sai vava vitu sa ra cabe cake kina; ia na kenai lolo sa tu ga ki matadra.

²³ Ia na matamata-ni-koro ni lomanibai eloma sa dui donuya na matamata-ni-koro ki na mata ni tokalau, kei koya ki cake; a sa vakarauta ko koya mai na matamata-ni-koro e dua ki na matamata-ni-koro kadua, a sa caga rua na drau.

²⁴ A sa qai kauti au ko koya kivakaki na mata ni ceva, ka, raica, sa dua na matamata-ni-koro sa donuya na mata ni ceva: a sa vakarauta na kena duru kei na kenai lolo, a sa vaka nai vakarau ga ko ya.

²⁵ A sa vakatuba o qo kei na kenai lolo sa tu voli, me vaka na katuba lalai ko ya: sa caga drau na kena balavu, ka caga limasagavulu na kena raraba.

²⁶ A sa dua kina na kenai kabakaba ei vava vitu, ia na kenai lolo sa tu kiliu: sa vakabalabala talega, e dua vaka, ka dua vaka, e na kena duru.

²⁷ A sa dua na matamata-ni-koro e na lomanibai eloma kivakaki na mata ni ceva: a sa vakarauta ko koya mai na matamata-ni-koro e dua ki na matamata-ni-koro kivakaki na ceva, a sa caga rua na drau.

²⁸ A sa kauti au ko koya ki na lomanibai kiloma e na matamata-ni-koro vakaceva; a sa vakarauta na matamata-ni-koro ki na mata ni ceva, a sa vaka nai vakarau ga ko ya;

²⁹ kei na kena veivalevale, kei na kena duru, kei na kenai lolo, a sa vaka nai vakarau ga ko ya; a sa vakatuba o qo kei na kenai lolo sa tu voli: a sa caga drau na kena balavu, ka caga limasagavulu na kena raraba.

³⁰ Ia na kenai lolo e tu volita sa dui caga limasagavulu na kena cecere, ka dui caga tini na kena raraba.

³¹ Ia na kenai lolo sa donuya tu na lomanibai kisau; ia na balabala sa ceuti tu ga ki na kena duru: ia na kenai kabakaba sai vava walu.

³² A sa kauti au ko koya ki na lomanibai kiloma kivakaki cake: a sa vakarauta na kena matamata-ni-koro, a sa vaka nai vakarau ga ko ya.

³³ Ia na kena veivalevale, kei na kena duru, kei na kenai lolo, sa vaka nai vakarau ga ko ya: a sa vakatuba o qo, kei na kenai lolo e tu voli: a sa caga drau na kena balavu, ka caga limasagavulu na kena raraba.

³⁴ Ia na kenai lolo sa donuya tu na lomanibai kisau; ia na balabala sa ceuti tu ga ki na kena duru, e na tabana o qo kei na tabana ko ya: a sai vava walu na kenai kabakaba.

³⁵ A sa kauti au ko koya ki na matamata-ni-koro ki na mata ni tokalau, a sa vakarauta ko koya, a sa vaka nai vakarau ga koya;

³⁶ a kena veivalevale, kei na kena duru, kei na kenai lolo; kei na kena katuba lalai e tu volita: a sa caga drau na kena balavu, ka caga limasagavulu na kena raraba.

³⁷ Ia na kena duru sa donuya tu na lomanibai kisau; ia na balabala sa ceuti tu ga ki na kena duru, ki na tabana o qo, kei na tabana ko ya: a sai vava walu na kenai kabakaba.

³⁸ Ia na kenai yatu vale, kei na kedra katuba sa volekata tu na duru ni matamata-ni-koro, ia maikea era dausilima kina nai soro kama.

³⁹ Ia e nai curucuru ni matamata-ni-koro sa rua kina na vata-ni-soro e na tabana o qo, ka rua na vata-ni-soro e na tabana ko ya, me vakamatei kina e delana nai soro kama kei nai soro ni valavala ca kei nai soro ni caka cala.

⁴⁰ Ia e na tabana e dua ki taudaku, e nai kabakaba mai na mata ni matamata-ni-koro sa donuya na tokalau, sa rua kina na vata-ni-soro; e na tabana talega kadua, mai na mata ni matamata-ni-koro, sa rua kina na vata-ni-soro.

⁴¹ Sa va na vata-ni-soro ka tu vaka, ka va talega na vata-ni-soro ka tu vaka, e na taba ni matamata-ni-koro; e walu na vata-ni-soro, era vakamatea kina nai soro.

⁴² Ia na vata-ni-soro o qo e dui va, na kei nai soro kama, sa caka e na vatu e ta, a sa dui caga tolu na kena balavu, ka dui caga tolu na kena raraba, ka dui caga rua na kena cecere: era dauviria talega kina nai yaya era vakamatea kina nai soro kama kei nai soro.

⁴³ A sa so na vata rabailailai sa vakarautaki voli tu kiloma: ia e na vata-ni-soro ga sa no kina na lewe-ni-manumanu sai soro.

⁴⁴ Ia maitaudaku ni matamata-ni-koro kiloma sa tu kina na nodrai yatu vale na dau-ni-meke, e na lomanibai kiloma, mai na taba ni matamata-ni-koro ki na mata ni tokalau; a sa donuya tu na mata ni ceva: e dua talega ka tu ki na taba ni matamata-ni-koro ki cake, a sa donuya tu na mata ni tokalau.

⁴⁵ A sa kaya vei au ko koya, Ai yatu vale o qo, sa donuya na mata ni ceva, sa nodra na bete, era taura na cakacaka ni vale.

⁴⁶ Ai yatu vale talega o qo sa donuya na mata ni tokalau sa nodra na bete, era taura na cakacaka ni cabocabo-ni-soro: sai ira o qo na luve i Satoki na luve i Levi, era torovi Jiova me cakacaka vei koya.

⁴⁷ A sa vakarauta ko koya na lomanibai, a sa caga rua na drau na kena balavu, ka caga rua na drau na kena raraba, a sa takiveilevu na veiyasana; kei nai cabocabo-ni-soro e na mata ni vale.

⁴⁸ A sa kauti au ko koya ki nai curucuru ni vale tabu, a sa vakarauta na duru ni curucuru, a sa dui caga tini ki na tabana o qo, ka dui caga tini ki na tabana ko ya: ia na kena raraba ni katuba sa caga ono ki na tabana o qo, ka caga ono ki na tabana ko ya.

⁴⁹ A kena balavu ni curucuru sa caga vasagavulu, kei na kena raraba sa caga ruasagavulu ka rua: a sa kauti au cake ko koya ki nai kabakaba era cabeta kina: a sa tu mai na duru lelevu ka volekata na duru wale, e dua vaka, ka dua vaka.