Isikeli 34 - AI VOLA TABU

Sa vunauci ko ira nai vakatawa ca, 1-6. Sa cudruvi ira na Kalou, 7-10. A nona vakaraici ira vinaka na nona sipi, 11-19. A nona matanitu na Mesaia, 20-31.

¹ A SA yaco vei au na vosa i Jiova, ka vaka,

² Na luve ni tamata, mo parofisaitaka na kedra sa ra nodrai vakatawa na Isireli, mo ia na parofisai, ka kaya vei ira, Sa vosa vakaoqo na Turaga ko Jiova vei ira nai vakatawa; Ena ca ko ira na nodrai vakatawa na Isireli sa ra vakani ira ga vakai ira! me na sega li na qele ni sipi me ra vakania nai vakatawa?

³ Na uro dou sa kania, kei na vutika ni sipi dou sa vakasulumi kemudou kina, na sipi sa vakani dou sa vakamatea: ia na qele ni sipi dou sa sega ni vakania.

⁴ Na sipi malumalumu dou sa tawa vakaukauwataka, kei na ka sa tauvi mate dou sa tawa vakabula, kei na ka sa ramusu dou sa tawa vauca, kei na ka sa vakasevi dou sa tawa vakauta tale mai, kei na ka sa yali dou sa tawa vakasaqara; ia sa vakaukauwa ga na nomudou lewai ira, ka vakalomaqa.

⁵ A ra sa dui vakasevi tani, e na vuku ni sa sega nai vakatawa: a ra sa yaco me kedra kakana na manumanu kecega ni vanua, ni ra vakasevi tani.

⁶ Era sa lako sese voli na noqu sipi ki na veiulu-ni-vanua kecega, kei na dela-ni-koro kecega: io, e dela i vuravura kecega, era sa dui veiseyaki kina na noqu sipi, ka sega e dua sa taroga se vakasaqara.

⁷ O koya o qo, oi kemudou nai vakatawa, dou rogoca kina na vosa i Jiova;

⁸ Me vaka na dina ni noqu bula, sa kaya na Turaga ko Jiova, e navuku ni noqu qele ni sipi ni sa tokitaki, ka sa yaco na noqu sipi me kedra kakana na manumanu kecega ni vanua, e na vuku ni sa sega nai vakatawa, ni ra sa tawa vakasaqara na noqu sipi na noqui vakatawa, a ra sa vakani ira vakai ira ga nai vakatawa, ia na noqu sipi sa ra tawa vakania;

⁹ o koya o qo, oi kemudou nai vakatawa, dou rogoca kina na vosa i Jiova;

¹⁰ sa vosa vakaoqo na Turaga ko Jiova; Raica, sai au sa veimecaki kei ira nai vakatawa, ia kaʼu na taroga na noqu sipi vei ira, ka muduki ira me ra kakua ni vakania tiko na sipi; me ra kakua talega ni vakani ira tiko vakai ira nai vakatawa; niʼu na kaliraka na noqu qele ni sipi mai na gusudra, me kakua ni kedra kakana.

¹¹ Ni sa vosa vakaoqo na Turaga ko Jiova; Raica, oi au, io koi au, kaʼu na taroga na noqu sipi, ka vakasaqarai ira.

¹² Me vaka nai vakatawa sa vakasaqara na nona sipi e na siga sa tiko kina e na kedra maliwa na nona sipi sa veiseyaki; au na vakasaqara vakakina na noqu sipi, ka kaliraki ira mai na veiyasana kecega era sa dui veiseyaki kina e na siga loaloa ka butobuto.

¹³ Ia kaʼu na kauti ira tani maivei ira na veimataqali, ka vakasoqoni ira mai na veivanua, ka kauti ira ki na nodra vanua, ka vakani ira e na veiulu-ni-vanua nei Isireli e na bati ni uciwai, kei nai tikotiko kece ni vanua.

¹⁴ E na veico vinaka kaʼu na vakani ira kina, e na veiulu-ni-vanua cecere talega nei Isireli ena tu kina na kedra bai: era na davo tu maikea e na lomanibai vinaka, ia e na vanua bulabula era na kana kina e dela ni veiulu-ni-vanua nei Isireli.

¹⁵ Oi au, kaʼu na vakania na noqu sipi, io koi au, kaʼu na vakadavori ira tiko, sa kaya na Turaga ko Jiova.

¹⁶ Na ka sa yali kaʼu na vakasaqara, ka vakauta tale mai na ka sa vakasevi, na ka sa ramusu kaʼu na vauca, na ka sa malumalumu kaʼu na vakaukauwataka: ia na ka sa uro ka kaukauwa kaʼu na vakarusa; kaʼu na vakani ira e na cudru.

¹⁷ Ia koi kemudou, na noqu sipi, sa kaya na Turaga ko Jiova; Raica, au na veilewayaka na sipi e so kei na sipi e so, kei na sipi tagane kei na koti tagane.

¹⁸ E ka lailai beka vei kemudou ni dou sa kania na veico vinaka, ia na vo ni kemudou veico dou sa buturaka li e na yavamudou? ni sa kena wai titobu talega dou sa gunuva, ia na kena vo mo dou sa vuvuta li e na yavamudou?

¹⁹ Ia na noqu qele ni sipi, na ka dou sa butuka e na yavamudou, era sa kania; kei na ka dou sa vuvuta e na yavamudou, era sa gunuva.

²⁰ O koya o qo sa vosa vakaoqo kina na Turaga ko Jiova vei ira; Raica, oi au, io koi au, kaʼu na veilewayaka na sipi uro kei na sipi suivotu.

²¹ E na vuku ni dou sa ia na veibiliyaki e na sarisarimudou, kei na tabamudou, ka culai ira kece era tauvi mate e na nomudou kaukamea, ka mo dou dui vakasevi ira mada;

²² o koya o qo kaʼu na vakabulai ira kina na noqu sipi, a ra na tawa tokitaki tale; ia kaʼu na dui veilewayaka na sipi e so kei na sipi e so.

²³ Ia kaʼu na vakatikora e dua me nodrai vakatawa, ia ena vakani ira ko koya, na noqu tamata ko Tevita; ena vakani ira ko koya, ena yaco talega ko koya me nodrai vakatawa.

²⁴ Ia koi au ko Jiova kaʼu na yaco me nodra Kalou, kei na noqu tamata ko Tevita me nodra Turaga; oi au ko Jiova kaʼu sa cavuta.

²⁵ Ia kaʼu na ia kei ira na veiyalayalati ni veivinakati, ka muduka tani na manumanu ca e na vanua: a ra na tiko vinaka mai na veico, ka moce e na veikau.

²⁶ Ia kaʼu na cakavi ira kei na veiyasana e volita na noqu ulu-ni-koro me ka e veivakalougatataki; au na vakatauca na uca talega e na kena gauna; ena tau mai na uca e veivakalougatataki.

²⁷ A kau ni vanua talega ena vuataka na vuana, ia ko vuravura ena vuataka na kena vuata, a ra na tiko vinaka e na nodra vanua, a ra na kila ni sai au ko Jiova, niʼu sa cavuka nai vau ni kedrai vua, ka kaliraki ira mai na ligadra era a vakabobulataki ira.

²⁸ A ra na sega ni yaco tale me nodrai toki ni valu na veimatanitu, a manumanu ni vanua talega ena sega ni kani ira; era na tiko vinaka ga, ka sega ena vakarerea.

²⁹ Ia kaʼu na vakatubura e dua na nodra coke rogo, a ra na sega ni takali tani tale e na vuku ni sa dausiga na vanua, se vakamaduataki tale vei ira na veimatanitu.

³⁰ A ra na kila kina ni sai au ko Jiova na nodra Kalou sa tiko kei ira, ni sai ira talega, na mataqali nei Isireli, era noqu tamata, sa kaya na Turaga ko Jiova.

³¹ Ia koi kemudou na noqu sipi, na sipi ni noqu veico, sa tamata, sai au na nomudou Kalou, sa kaya na Turaga ko Jiova.