Isikeli 32 - AI VOLA TABU

Sa lelevaki ko Ijipita ni sa ca mai, 1-10. A Kalou, sa lesia nai seleiwau i tui Papiloni me vakacacani Ijipita, 11-16. Ena cudruvi ki eli, kei ira kece na lewe ni veivanua erai valavala ca, 17-32.

¹ IA e nai katinikarua ni yabaki, e nai katinikarua ni vula, e nai matai ni siga ni vula, sa qai yaco vei au na vosa i Jiova, ka vaka,

² Na luve ni tamata, mo taurivaka na lele e na vuku i Fero na tui Ijipita, ka kaya vua, O sa tautauvata kei na dua na laioni cauravou ki na veimatanitu, ka vaka e dua na tavuto mai na wasawasa: ia ko a lako mai kei na nomu uciwai, ka sa vakayavalata na wai e na yavamu, ka vuvuta na nodra uciwai.

³ Sa vosa vakaoqo na Turaga ko Jiova: Ia koi au kei nai vavakoso tamata e lewe vuqa, keitou na lawataki iko e na noqu lawa; a ra na yarataki iko mai e na noqu lawa ni yavi.

⁴ Au na qai laivi iko ki na vanua, ia ki na dela ni soso kaʼu na biuti iko sara, ka vakatikora e delamu na manumanu kecega ni lomalagi, ka vakamamautaka e na lewemu na manumanu ni vuravura kecega:

⁵ ia kaʼu na virikotora na lewemu ki dela ni veiulu-ni-vanua, ka vakasinaita na veibuca e na kemui binibini:

⁶ au na vakasuasuataka talega na vanua ko sa qalo kina e na kemu dra, ka yala ki na veiulu-ni-vanua; ia na veiuciwai, ena sinai tu e na tikimu.

⁷ Ia niʼu na bokoci iko, kaʼu na tabonaka na lomalagi, ka vakabutobutotaka na kena kalokalo; a mata-ni-siga kaʼu na tabonaka e na o, a vula talega ena bureitaka na kena rarama.

⁸ A rarama kecega sa cila mai lomalagi kaʼu na vakabutobutotaka vei iko, ka tauca na butobuto ki na nomu vanua, sa kaya na Turaga ko Jiova.

⁹ Au na vakayagataka talega na veimataqali e vuqa, niʼu na kauti ira na kemui tebetebe ki na veimatanitu, ki na veivanua ko a tawa kila.

¹⁰ Io, kaʼu na vakidacalataki ira na veimataqali e vuqa e na vukumu, o ira talega na nodra tui era na rere vakalevu e na vukumu, niʼu na laveta cake na noqui seleiwau e matadra; a ra na dui sautaninini tikoga, na tamata yadua e na vukuna de mate, e na siga ko sa bale kina.

¹¹ Ni sa vosa vakaoqo na Turaga ko Jiova; Sai seleiwau i tui Papiloni ena yacovi iko:

¹² au na vakabalei ira na nomu lewe vuqa e na nodrai seleiwau na qaqa, era nodra bati qaqa na veimatanitu, ko ira kecega: a ra na vakacacana na viavialevu ni Ijipita, a ra na vakawabokotaki kecega na kena lewe vuqa.

¹³ Au na vakarusa tani talega na kena manumanu kecega mai na bati ni wai levu; ia na yava ni tamata ena sega ni vakaocataka tale, ena sega talega e so na ququ ni manumanu me na vakaocataka.

¹⁴ Au na qai vakamakaretaka na nodra wai, ia na nodra uciwai kaʼu na cakava me drodro me vaka na waiwai, sa kaya na Turaga ko Jiova.

¹⁵ Niʼu na solia na vanua ko Ijipita me lala, ka vakatakalia tani mai na vanua na ka ka sinai kina, niʼu na yaviti ira kecega sa tiko kina, era na qai kila ni sai au ko Jiova.

¹⁶ Sai koya o qo na lele era na lelevaki koya kina: o ira na gonealewa ni veimatanitu era na lelevaki koya: era na lelevaki koya ko Ijipita, kei ira kecega na nona lewe vuqa, sa kaya na Turaga ko Jiova.

¹⁷ IA e nai katinikarua ni yabaki, e nai katinikalima ni siga ni vula, sa qai yaco vei au na vosa i Jiova, ka vaka,

¹⁸ Na luve ni tamata, mo tagicaki ira na lewe vuqa ni Ijipita, ka vakabiuti ira sobu, ko koya, kei ira na gonealewa ni veimatanitu rogo, ki ruku i vuravura, kei ira era lako sobu ki nai keli.

¹⁹ O sa lagilagi cake vei cei li? mo lako sobu ga, ka koto vata kei ira na tawa cilivi.

²⁰ E na kedra maliwa era vakamatei e nai seleiwau sa ra na bale ga kaya: sa soli ko koya ki nai seleiwau: yarataki koya yani kei ira kece na nona lewe vuqa.

²¹ Sa na vosa vua ko ira na nodra qaqa na kaukauwa mai loma i bulu kei ira na nonai to: sa ra lako sobu ga, sa ra koto vata kei ira na tawa cilivi, era vakamatei e nai seleiwau.

²² Sa koto maikea ko Asuri kei na nonai vavakoso: sa tu voliti koya na nodrai bulubulu: sai ira kece era vakamatei, era bale e nai seleiwau:

²³ sa tu mai na sarisari ni keli na nodrai bulubulu, ia na nonai vavakoso sa ra koto volita na nonai bulubulu: sai ira o qo era vakamatei kece, era bale e nai seleiwau, ka ra daurerevaki sara e na vanua ni bula.

²⁴ Sa koto maikea ko Elama kei na nona lewe vu qa, ka ra koto volita na nonai bulubulu; sai ira kece era vakamatei, era bale e nai seleiwau, a ra sa lako sobu ka tawa cilivi ki na ruku i vuravura, ka ra daurerevaki sara e na vanua ni bula; ia ka ra sa colata ga na nodra madua kei ira era lako sobu ki nai keli.

²⁵ E na kedra maliwa era vakamatei era sa virikotora kina na nodrai davodavo kei na nonai vavakoso: sa tu voliti koya na nodrai bulubulu: sai ira kece era tawa cilivi, sa ra vakamatei e nai seleiwau: e na vuku ni ra daurerevaki sara e na vanua ni bula, era sa colata kina na nodra madua kei ira era sa lako sobu ki nai keli: e na kedra maliwa era vakamatei sa virikotora ko koya.

²⁶ Sa koto maikea ko Meseki, kei Tupali, kei na nodrau lewe vuqa; sa tu voliti rau na nodrai bulubulu: sai ira kece era tawa cilivi, sa ra vakamatei e nai seleiwau, ia ka ra daurerevaki sara ga e na vanua ni bula.

²⁷ A ra na tawa koto vata kei ira na qaqa, na tawa cilivi sa ra bale, ka lako sobu ki bulu kei na nodrai yaragi-ni-valu, ka virinoca na nodrai seleiwau e ruku ni uludra: ia na nodra caka cala ena tauca na suidra, ni ra daurerevaki sara vei ira na qaqa e na vanua ni bula.

²⁸ Io ko iko, ko na musuki e na kedra maliwa na tawa cilivi, ka koto vata kei ira era vakamatei e nai seleiwau.

²⁹ Sa koto maikea ko Itomi, ko ira na nodra tui, kei na nodra turaga kecega, o ira vata kei na nodra kaukauwa era sa koto vata ga kei ira era vakamatei e nai seleiwau: era na koto vata kei ira na tawa cilivi, kei ira era lako sobu ki nai keli.

³⁰ Sa ra koto maikea na tui mai na mata ni tokalau, ko ira kece, kei ira kece na kai Saitoni, era sa lako sobu vata kei na nodra daurerevaki vei ira era vakamatei; a nodra kaukauwa era sa maduataka; sa ra koto ka tawa cilivi kei ira era vakamatei e nai seleiwau; a ra sa colata na nodra madua kei ira era lako sobu ki nai keli.

³¹ Sai ira o qo ena raica ko Fero, ka vakacegui mai e na vukudra na nona lewe vuqa era vakamatei e nai seleiwau, io ko Fero kei ira kecega na nonai valu, sa kaya na Turaga ko Jiova.

³² Niʼu sa daurerevaki sara e na vanua ni bula: ia sa na vakotori vata ga e na kedra maliwa na tawa cilivi era vakamatei e nai seleiwau, ko Fero kei na nona lewe vuqa kecega, sa kaya na Turaga ko Jiova.