Isikeli 30 - AI VOLA TABU

Ena vakalalataki ko Ijipita kei na veivanua sa totaka, 1-19. Ena vakaukauwataki ko Papiloni me musuka na kaukauwa ni Ijipita, 20-26.

¹ SA yaco tale vei au na vosa i Jiova, ka vaka,

² Na luve ni tamata, mo ia na parofisai, ka kaya, Sa vosa vakaoqo na Turaga ko Jiova; Dou tagi qoqolou, Ule na siga ko ya!

³ Ni sa voleka mai na siga, io, sa voleka mai na siga i Jiova, na siga loaloa; ena kedra gauna na veimatanitu.

⁴ Ia ena yaco nai seleiwau ki Ijipita, kei na rarawa levu ena tauvi Kusi, ni ra qai bale na moku mai Ijipita, ni ra kauti ira tani talega na kena lewe vuqa ka sa talaraki sobu na kena yavu.

⁵ O Kusi, kei Futi, kei Luti, kei ira kece era dui kaikai, kei Kupi, kei ira na nodrai to na lewe ni vanua, era na qai bale vata kei ira e nai seleiwau.

⁶ Sa vosa vakaoqo ko Jiova; Era na bale talega era tokoni Ijipita; ia ena lako sobu na nona kaukauwa viavialevu: mai Mikitoli ka yala ki Siini era na bale maikina e nai seleiwau, sa kaya na Turaga ko Jiova.

⁷ Ena qai lala tu o qori e na maliwa ni veivanua lala, a nona veikoro talega, ena qai tu vata kei na veikoro rusa.

⁸ A ra na kila ni sai au ko Jiova, niʼu sa tauca na buka mai Ijipita, ka sa vakarusai kece na nonai to.

⁹ E na siga ko ya ena lako tani yani maivei au e so nai talaki o na waqa me vakarerei ira na kai Kusi era tiko wale, ia na rarawa levu ena tauvi ira me vaka e na siga kei Ijipita: ka, raica, sa lako tu mai.

¹⁰ Sa vosa vakaoqo na Turaga ko Jiova; au na vakaoti ira talega na kena lewe vuqa ko Ijipita e na liga i Nipukatiresari na tui Papiloni.

¹¹ O koya vata kei ira na nona tamata, na bati qaqa ni veimatanitu, era na kauti mai me vakarusa na vanua; a ra na ucuna na nodrai seleiwau me tauci Ijipita, ka vakasinaita na vanua e na moku.

¹² Ia kaʼu na vakadiva na uciwai, ka volitaka na vanua ki na ligadra na tamata ca: ia kaʼu na vakacacana na vanua kei na ka kece sa tiko kina, e na ligadra na kai tani: sai au ko Jiova kaʼu sa cavuta.

¹³ Sa vosa vakaoqo na Turaga ko Jiova; Au na vakarusa talega na matakau, ka muduka tani na nodra veika lasu mai Memifi: ia ena sega tale e dua na tui ni vanua ko Ijipita: au na tauca talega na rere e na vanua ko Ijipita.

¹⁴ Ia kaʼu na vakalalataki Pacirosi, ka tauca na buka mai Soani, ka ia na veicudruvi mai No;

¹⁵ ka sovaraka na noqu cudru ki Sini, na vu ni kaukauwa kei Ijipita; ka muduka laivi na kena lewe vuqa ko No;

¹⁶ au na tauca talega na buka mai Ijipita: ena rarawa vakalevu ko Sini, ia ko No ena basubasuki, ka vakararawataki ko Memifi e na veisiga.

¹⁷ O ira na cauravou ni Eveni kei Pi-piseci era na bale e nai seleiwau: ia na Veikoro o qo ena vakabobulataki.

¹⁸ Ia mai Tiapi-niesi, ena butobuto mai na siga, niʼu sa qai musuka maikea na matanakilagi ni Ijipita: io, ena mudu mai vua na kena kaukauwa viavialevu: ia ko koya, e dua na o ena tabonaki koya, o ira talega na luvena alewa era na vakabobulataki.

¹⁹ Au na ia vakaoqo na veicudruvi mai Ijipita: a ra na kila ni sai au ko Jiova.

²⁰ IA e nai katinikadua ni yabaki, e nai matai ni vula, e nai kavitu ni siga ni vula, sa qai yaco vei au na vosa i Jiova, ka vaka,

²¹ Na luve ni tamata, Na liga i Fero na tui Ijipita kaʼu sa musuka; ka, raica, ena sega ni vivi me bula, se viviraki kina e dua na wa me vauci, me kaukauwa kina me taura nai seleiwau.

²² O koya sa vosa vakaoqo kina na Turaga ko Jiova, ka vaka, Raica, sai au na meca i Fero na tui Ijipita, ia kaʼu na musuka ruarua na ligana, ko ya sa kaukauwa, ko ya talega sa ramusu; ia kaʼu na vakalutuma tani nai seleiwau mai na ligana.

²³ Ia kaʼu na dui vakasevi ira na kai Ijipita ki na veimatanitu, ka duibiubiuti ira ki na veivanua.

²⁴ Ia kaʼu na vakaukauwataka na liga i tui Papiloni, ka solia na noqui seleiwau ki na ligana: ia kaʼu na musuka ga na liga i Fero, ena vutugu talega e matana e na vutugu ni tamata sa vuetaki vakaca.

²⁵ Ia kaʼu na vakaukauwataka na liga i tui Papiloni, ia na liga i Fero ena lutu sobu; a ra na kila ni sai au ko Jiova, niʼu sa solia na noqui seleiwau ki na liga i tui Papiloni, ka sa dodoka ko koya ki na vanua ko Ijipita.

²⁶ Ia kaʼu na dui vakasevi ira na kai Ijipita ki na veimatanitu, ka duibiubiuti ira ki na veivanua; a ra na kila ni sai au ko Jiova.