Isikeli 3 - AI VOLA TABU

Sa vakavulici, ka vakaukauwataki, ka vakasalataki ko Isikieli. 1-27.

¹ A SA kaya vei au ko koya, Na luve ni tamata, na ka ko sa kunea mo kania, mo kania nai vola vivigi o qo, ka laʼki vosa ki na mataqali nei Isireli.

² Au a qai dalaga na gusuqu, a sa cakavi au ko koya meʼu kania nai vola vivigi ko ya.

³ A sa kaya vei au ko koya, Na luve ni tamata, na lomamu mo cakava me kania, ia na ketemu mo vakamamautaka e nai vola vivigi o qo kaʼu sa solia vei iko. Au a qai kania; ia e na gusuqu sa vaka na oni na kena kamikamica.

⁴ A sa kaya vei au ko koya, Na luve ni tamata, mo lako, lako yani ki na mataqali nei Isireli, ka vosataka na noqu vosa vei ira.

⁵ Ni sa sega ni mataqali e tawa nunuvi rawa na nodra vosa se dredre ni cavuti ko sa talai kina, ki na mataqali ga nei Isireli;

⁶ sa sega ki na mataqali e vuqa ka tawa nunuvi rawa na nodra vosa se dredre ni cavuti, mo tawa kila rawa kina na nodra vosa. Ke sai ira kaʼu a talai iko kina, ke ra na vakarorogo ga vei iko, se segai?

⁷ Ia na mataqali nei Isireli era na sega ni vakarorogo vei iko; ni ra na sega ni vakarorogo vei au: ni sai ira kece na mataqali nei Isireli era sa mata viavialevu ga ka yalokaukauwa.

⁸ Raica, au sa cakava na matamu me qaqa ki na matadra, kei na yadremu me qaqa ki na yadredra.

⁹ Ia me vaka na tiamodi e qaqa ka malumalumalumu na qiwa, kaʼu sa cakava na yadremu me vakakina: kakua ga ni ko rerevaki ira, se taqayataka na matadra, ia ka ra sa mataqali dautalaidredre ga.

¹⁰ Sa kaya talega vei au ko koya, Na luve ni tamata, na vosa kece kaʼu na vosataka vei iko mo vakabauta ga e lomamu, ka rogoca e daligamu.

¹¹ Ia mo lako, lako yani vei ira era vakabobulataki, vei ira na luvedra na kai nomu, ka vosa vei ira, ka tukuna vei ira, Sa vosa vakaoqo na Turaga ko Jiova; se ra na vakarorogo, se ra na kakua ga.

¹² Sa qai laveti au cake na Yalo, ia kaʼu sa rogoca mai dakuqu na domo ni ue levu, sa kaya, Me vakavinavinakataki nai ukuuku i Jiova mai na nona yasana.

¹³ Au a rogoca talega na rorogo ni tabadratou na ka bula e veitaratarai, kei na rorogo ni yava sa tu vata kei iratou, kei na rorogo ni ue levu.

¹⁴ Ia na Yalo, sa laveti au cake, ka kauti au yani, ia kaʼu sa lako ka rarawa ka katakata na yaloqu; ia na liga i Jiova sa tiko vakaukauwa ga vei au.

¹⁵ Au a qai yaco vei ira era bobula mai Teli-apipi, era tiko mai na uciwai ko Kipari, ia kaʼu a tiko e na yasana era sa tiko kina, kaʼu a tiko maikea ka bogi vitu ka kidacala tiko e na kedra maliwa.

¹⁶ Ia ni sa oti na bogi e vitu, sa qai yaco vei au na vosa i Jiova, ka vaka,

¹⁷ Na luve ni tamata, kaʼu sa lesi iko moi vakatawa ki na mataqali nei Isireli: ia mo rogoca mai gusuqu na vosa, ka vakasalataki ira maivei au.

¹⁸ Niʼu sa kaya vua na tamata ca, O na mate vakaidina; ia ke sa sega ni ko vakasalataki koya, se vunauca na tamata ca me biuta na nona sala ca, me vakabulai koya; ke na mate ga na tamata ca ko ya e na nona caka cala; ia na kena dra kaʼu na taroga vei iko.

¹⁹ Ia ko iko, kevaka ko sa vakasalataka na tamata ca, ka sa sega ni saumaki mai na nona ca, se na nona sala ca, ena mate ga ko koya e na nona caka cala; ia ko iko, ko sa sereka na yalomu.

²⁰ Ia ni sa saumaki tani na tamata yalododonu mai na nonai valavala dodonu, ka caka cala, niʼu sa tauca na ka e tarabe kina e matana, ena mate ko koya: e na vuku ni ko sa sega ni vakasalataki koya, ena mate ga e na nonai valavala ca, ia ena tawa nanumi na nonai valavala dodonu sa cakava; ia na kena dra kaʼu na taroga vei iko.

²¹ Ia ko iko, kevaka ko sa vakasalataka na tamata yalododonu, me kakua ni valavala ca na yalododonu, ka sa sega ni valavala ca, ena bula vakaidina ko koya, e na vuku ni sa vakasalataki; o iko talega, ko sa sereka na yalomu.

²² A SA tu vei au maikea na liga i Jiova; a sa kaya vei au ko koya, Tu cake, mo lako yani ki na buca, ia maikea kaʼu na ia na vosa vei iko.

²³ Au sa qai tu cake, ka lako yani ki na buca: ka, raica, sa tu maikina nai ukuuku i Jiova, me vaka nai ukuuku kaʼu a raica mai na uciwai ko Kipari: ia kaʼu sa bale vakatoboicu.

²⁴ A sa curumi au na Yalo, a sa vakaturi au e na yavaqu, a sa ia na vosa vei au, ka kaya vei au, Mo laʼki sogoti iko e loma ni nomu vale.

²⁵ Ia ko iko, na luve ni tamata, raica, era na vauci iko e na dali, a ra na vesuki iko kina, ia ko na sega ni curu rawa kitautuba kei ira:

²⁶ ia na yamemu kaʼu na vakabita ki na dela ni gusumu, mo galu kina, ka sega ni dauvunauci ira tiko: ni ra sa mataqali dautalaidredre.

²⁷ Ia niʼu na sa vosa vei iko, kaʼu na qai dalaga na gusumu, ia ko na qai kaya vei ira, Sa vosa vakaoqo na Turaga ko Jiova; O koya sa rogoca, me vakarorogo ga; ia ko koya sa kakua, me kakua ga: ni ra sa mataqali dautalaidredre.