Isikeli 28 - AI VOLA TABU

A Kalou, sa cudruvi tui Teiri e na vuku ni nona viaviakalou, 1-10. Sa lelevaki nai ukuuku i tui Teiri e na vuku ni sa vakacacani e na nonai valavala ca, 11-19. Sa cudruvi ko Saitoni, 20-24. O ira na Isireli era vakabobulataki era na vakabulai tale, 25, 26.

¹ A SA yaco vei au na vosa i Jiova, ka vaka,

² Na luve ni tamata, mo kaya vua na tui Teiri, Sa vosa vakaoqo na Turaga ko Jiova; E na vuku ni sa laveti cake na lomamu, ni ko sa kaya talega, Sa Kalou koi au, e nai tikotiko ni Kalou kaʼu sa tiko, e na loma ni wasawasa; ia ko sa tamata ga, ka sega ni Kalou, ka sa vakatura na lomamu me vaka na loma ni Kalou:

³ raica, sa vuku ko iko ka lialia ko Tanieli; sa sega e dua na ka vuni me ra tabonaka vei iko:

⁴ ni ko vuku ka yalomatua ko sa rawata kina na nomui yau, ka katoa na koula kei na siliva ki na nomu vale ni yau:

⁵ ni sa levu na nomu vuku kei na nomu dauveivoli ko sa vakalevutaka kina na nomui yau, a sa laveti cake na lomamu e na vuku ni nomui yau.

⁶ O koya o qo sa vosa vakaoqo kina na Turaga ko Jiova, E na vuku ni ko sa vakatura na lomamu me vaka na loma ni Kalou;

⁷ o koya o qo, raica, au na kauti ira mai kina vei iko na kai tani, na nodra bati qaqa na veimatanitu: a ra na ucuna na nodrai seleiwau me tauca na nomu vuku lagilagi, a ra na vakacacana na nomu matavinaka.

⁸ Era na kauti iko sobu ki na rusa, ia ko na mate me vaka ni ra mate era vakamatei e na loma ni wasawasa.

⁹ O na kaya tiko li, Sa Kalou koi au, e na mata i koya sa vakamatei iko? ia ko sa tamata ga, ka sega ni Kalou, e na liga i koya sa vuetaki iko.

¹⁰ E na mate era mate kina na tawa cilivi ko na mate ga kina e na ligadra na kai tani: ni sai au kaʼu sa cavuta, sa kaya na Turaga ko Jiova.

¹¹ A sa yaco tale vei au na vosa i Jiova, ka vaka,

¹² Na luve ni tamata, mo taurivaka na kena lele na tui Teiri, ka kaya vua, Sa vosa vakaoqo na Turaga ko Jiova; Sai iko sa vakaotia sara na kenai vakarau, ko sa vutu ni vuku, ka lagilagi duaduaga.

¹³ Mai Iteni na were ni Kalou ko a tiko kina; a vatu talei kecega sa kemui ubi, na saritiusi, na topasa, na tiamodi, na perili, na onikisa, kei na jasipa, na safairi, na emeralita, kei na rupi, kei na koula: sa mataitaki oti na nomu lali kei na nomu bitu-ni-vakatagi e tikimu, e na siga ko a buli kina sa vakarau tu ga.

¹⁴ Sai iko na jerupi lumuti sai vakaruru; ia kaʼu a vakatikori iko: ko a tiko e na ulu-ni-vanua tabu ni Kalou; ko a veilakoyaki tu e na loma ni vatu buka.

¹⁵ Sa dodonu sara ko iko e na nomui valavala mai na siga ko a buli kina, ni sa bera ni kune vei iko na caka cala.

¹⁶ Ni sa levu na nomu dauveivoli era sa vakasinaiti iko e nai valavala kaukauwa, ia ko sai valavala ca: o koya o qo kaʼu na vakacacataki iko tani kina mai na ulu-ni-vanua ni Kalou: ia kaʼu na vakarusai iko tani, na jerupi sai vakaruru, mai na loma ni vatu buka.

¹⁷ Sa laveti cake na lomamu e na vuku ni nomu lagilagi, o sa vakaucacataka na nomu vuku ni ko matavinaka: kaʼu na viritaki iko ki na qele, kaʼu na laivi iko tu e matadra na tui, me ra raici iko.

¹⁸ Ni sa levu na nomu caka cala kei na caka cala ni nomu dauveivoli, ko sa vakacacana kina na nomu veiyasana tabu; o koya o qo kaʼu na vakayacora kina na buka mai na kemu maliwa, ena kani iko o qori, ia kaʼu na vakamai iko mo sa dravusa e dela i vuravura e matadra kece era raici iko.

¹⁹ O ira kece vei ira na veimataqali era kilai iko era na kidacalataki iko: o na yaco me ka e rerevaki, ia ko na segasega sara.

²⁰ A SA yaco tale vei au na vosa i Jiova, ka vaka,

²¹ Na luve ni tamata, mo vaqara na matamu ki Saitoni, ka parofisaitaka na kena,

²² ka kaya, Sa vosa vakaoqo na Turaga ko Jiova; Raica, sai au na nomu meca, Saitoni; ia kaʼu na vakacaucautaki e na kemu maliwa: a ra na kila ni sai au ko Jiova, niʼu na ia na veicudruvi vua, ka sa vakarokorokotaki vua.

²³ Niʼu na tala vua na mate dauveitauvi, kei na dra ki na nona sala ni koro; a ra na bale na vuetaki e na kena maliwa e nai seleiwau sa na tauci koya e na veiyasana; a ra na kila ni sai au ko Jiova.

²⁴ Ia ena sega tiko vei ira na mataqali nei Isireli e dua na kedra soni dauveivuti, se dua na kedra wa-vakavotona dauveivakararawataki vei ira kece era tiko voliti ira, ka beci ira; a ra na kila ni sai au na Turaga ko Jiova.

²⁵ Sa vosa vakaoqo na Turaga ko Jiova; Niʼu na vakasoqoni ira oti na mataqali nei Isireli maivei ira na veimataqali era dui vakasevi kina, ka sa vakarokorokotaki vei ira e matadra na veimatanitu, era na qai tiko e na nodra vanua kaʼu a solia vei Jekope na noqu tamata:

²⁶ a ra na tiko vakacegu kina, ka tara vale, ka tea na veivainivaini; io, era na qai tiko vakacegu, niʼu na sa cudruvi ira oti kece era beci ira ka ra tiko voliti ira; a ra na kila ni sai au ko Jiova na nodra Kalou.