Isikeli 26 - AI VOLA TABU

O Teiri, ni sa vosalevutaki Jerusalemi, sa cudruvi kina, 1-6. Ena gumatua ko Nipukatiresari ni sa veivaluti kaya, 7-14. O ira kece na turaga ni veivanua era dausokota era na tagicaki koya ni sa bale, 15-21.

¹ IA e nai katinikadua ni yabaki, e nai matai ni siga ni vula, sa yaco vei au na vosa i Jiova, ka vaka,

² Na luve ni tamata, e na vuku ni sa vosataki Jerusalemi ko Teiri, ka kaya, Ue, sa ramusu ko koya ka nodra matamata-ni-koro na veimataqali; sa vuki mai vei au ko koya: au na vakavutuniyautaki, ni sa lala mai ko koya:

³ o koya o qo sa vosa vakaoqo kina na Turaga ko Jiova, ka vaka; Raica, au sa veimecaki kei iko, Teiri, ia kaʼu na vakalakova cake vei iko na veimatanitu e vuqa, me vaka ni sa biuta cake mai na wasawasa na kena biau.

⁴ A ra na vakacacana na bai ni Teiri, ka basuka sobu na kena veivale cecere: ia kaʼu na taviraka tani vua na kena kuvu-ni-soso, ka cakavi koya me tautauvata kei na dela ni vatu.

⁵ Ena yaco me sasau ni lawa e loma ni wasawasa: ni sai au kaʼu sa cavuta, sa kaya na Turaga ko Jiova: ia ena yaco ko koya me nodrai toki ni valu na veimatanitu.

⁶ A luvena alewa talega mai tailevu era na mate e nai seleiwau, a ra na kila ni sai au ko Jiova.

⁷ Ni sa vosa vakaoqo na Turaga ko Jiova; Raica, au na kauti koya cake ki Teiri ko Nipukatiresari na tui Papiloni, mai na mata ni tokalau, ko koya vata na nodra tui na tui, kei na ose kei na vale-vodoki, kei nai valu e vodo lako e na ose, kei nai vavakoso, kei na tamata e lewe vuqa.

⁸ Na luvemu alewa mai tailevu ena vakamatea ko koya e nai seleiwau: ia ena cakava na kemu vale-kau ni valu, ka viria na kemu suva, ka vakaduria na kemui vakaruru.

⁹ Ia na kemui tukituki-ni-bai ena vakaduria ko koya ki na nomu bai, ka basuka sobu na nomu vale-cecere e na nona matau.

¹⁰ E na vuku ni levu ni nona ose ena ubi iko na nodra kuvu ni-soso: e na vuku ni domo ni valu sa vodo tu e na ose, kei na yava vakavale-vodoki, kei na vale-vodoki, ena yavala kina na nomu bai, ni sa curu ko koya ki na nomu matamata-ni-koro, me vaka ni sa curumi na koro sa kabasu.

¹¹ E na ququ ni nona ose ena butuka kece kina na nomu sala: ena vakamatei ira na nomu tamata e nai seleiwau, kei na nomu bai ni valu kaukauwa ena bale sobu ga ki na qele.

¹² A ra na tokitaka na nomui yau, ka koveraka na nomu ka ni veivoli: a ra na basuka sobu na nomu bai, kei na nomu veivale domoni era na vakacacana: ia na nomu veivatu kei na nomu kau ni vale kei na nomu kuvu-ni-soso era na viritaka ki loma ni wai.

¹³ Ia kaʼu na vakaotia na domo ni nomu meke: ia na domo ni nomu api ena sega ni rogo tale.

¹⁴ Ia kaʼu na cakavi iko me tautauvata kei na dela ni vatu: o na yaco me sasau ni lawa; o na sega ni tara tale; ni sai au ko Jiova kaʼu sa cavuta, sa kaya na Turaga ko Jiova.

¹⁵ Sa vosa vakaoqo na Turaga ko Jiova ki Teiri; Ni sa rorogo na nomu bale, ni ra kudrukudru tu na vuetaki, ni sa ia na veivakamatei e na kemu maliwa, me na qai sega li ni yavala kina na veiyanuyanu?

¹⁶ Era na qai lako sobu mai na nodrai tikotiko na turaga kece ni wasawasa, ka biuta na nodrai tutuvi, ia na nodrai sulu veivolavolai era na luvata tani: era na vakaisulu e na sautaninini; era na tiko ki na qele, ka sautaninini tikoga, ka kidacalataki iko.

¹⁷ A ra na taurivaka na lele e na vukumu, ka kaya vei iko, Na kemu rusa, ko iko ka tawa e na kai wai, na koro rogo, ka daugumatua e na wasawasa, ko koya kei na lewena, ka ra kedrai vakarere kecega era tiko e vuravura!

¹⁸ Ena qai sautaninini mai na veiyanuyanu e na siga ni nomu bale; io, ena kidroa mai na veiyanuyanu e na loma ni wasawasa ni ko sa lako tani.

¹⁹ Ni sa vosa vakaoqo na Turaga ko Jiova; Niʼu na cakavi iko me koro lala, me vaka na Veikoro sa sega ni tawa; niʼu na kauta cake mai vei iko na wasa titobu, ka sa luvuci iko na wai levu;

²⁰ niʼu na kauti iko sobu kei ira era lako sobu ki nai keli, vei ira na tamata eliu, ka vakatikori iko ki na ruku i vuravura, ki na tikina sa rusa makawa, kei ira era lako sobu ki nai keli, mo kakua ni tawa tale; niʼu na vakatikora talega nai ukuuku e na nodra vanua na bula;

²¹ kaʼu na qai cakavi iko me ka e rerevaki, ia ko na segasega sara: ke ko dauqarai, ke ko na sega sara ga ni kune tale, sa kaya na Turaga ko Jiova.